Lesona 5

O Le Togiola e Le Iu a Iesu Keriso

Folasaga

O le Togiola a Iesu Keriso—o se mea silisili lea na tupu—ua mafai ai e tagata uma lava ona faamagaloina mai le agasala ma mau faatasi ma le Tama Faalelagi ma Iesu Keriso i le faavavau atoa. E ala mai le Togiola, o le a toetutu tagata uma ma toe foi atu i le afioaga o le Atua e faamasinoina. Ona o le Togiola e manaomia Iesu Keriso ia puapuagatia i ni auala e le ma faitaulia, e i ai Lona malamalama alofa mo i tatou taitoatasi.

Faitauga Faaopoopo

Boyd K. Packer, “O le Togiola,” Ensign po o le Liahona, Nov. 2012, 75–78.
D. Todd Christofferson, “Togiola,” Ensign po o le Liahona, Me 2013, 109–12.

Fautuaga mo le Aoaoina Atu

Mosaea 3:5–11; Alema 34:8–12

Ua na o Iesu Keriso lava e mafai ona faataunuuina le Togiola e le iu

Faaali atu ma valaaulia se tamaitiiti aoga e faitau leotele le saunoaga lenei a Peresitene James E. Faust (1920–2007) o le Au Peresitene Sili:

“Ou te fia tautala atu i nisi o mea silisili na tutupu i le talafaasolopito atoa. O lena mea e tasi na tupu o le Togiola le mafaatusalia lea a lo tatou Alii ma le Faaola, o Iesu Keriso. O le galuega sili lenei ona taua ua faataunuuina” “O le Togiola: O lo Tatou Faamoemoega Sili,” Liahona, Ian. 2002, 18).

Valaaulia ni tamaiti aoga se toalua pe toatolu e feauauai i le faitauina leotele mai le Alema 34:8-12 a o maka e le vasega upu ma fuaitau na e faaalia ai pe aisea ua avea ai le Togiola ma se mea silsili na tupu i le talafaasolopito.

Aisea ua avea ai le Togiola o se mea silisili na tupu? (Faamamafa atu lenei upumoni: O le Togiola a Iesu Keriso e le iu ma e faavavau, ua mafai ai ona maua le faaolataga mo tagata uma.)

Mafaufau e faasoa atu le saunoaga lenei a Elder Russell M. Nelson o le Korama a Aposetolo e Toasefululua:

“Sa manaomia se togisala le faatapulaaina e togiola ai Atamu, Eva, ma a la fanau uma. … E tusa ma tulafono faavavau, sa manaomia i lena togisala se taulaga e faia e se Tagata tino ola pea ua i ai le pule i le oti. Peitai e tatau ona Ia maliu ma toe faatuina mai Lona lava tino. Sa na o le Faaola lava sa mafai ona faia lenei mea. Sa Ia maua mai Lona tina faaletino le mana e maliu ai. Ae sa Ia maua mai Lona Tama le mana e manumalo ai i le oti” (“O le Tumau i le Lotolotoi o Suiga,” Liahona, Ian. 1994, 39).

Aisea ua na o Iesu Keriso ai e mafai ona faaolaina tagata? (O Ia o se tagata faavavau e le oo i ai le oti.)
O a auala ua mafai ai ona le iu ma faavavau le taulaga togiola a Iesu Keriso?

Ina ia fesoasoani e taliina lenei fesili, faaali atu le saunoaga lenei a Peresitene Russell M. Nelson, o le Fitugafulu ma fai atu i se tamaitiiti aoga e faitau leotele:

“[O le Togiola [a Iesu Keriso] e le faatuaoia—e leai sona iuga. E le faatuaoia foi ina ia mafai ona faaolaina tagata ola uma mai le oti e le uma. E le faatuaoia pe a fuafua i Lona puapuagatia tele. … E le faatuaoia i se tulaga—na faia i le taimi e tasi mo tagata uma. Ma sa faalauteleina atu le alofa mutimutivale o le togiola e le gata i tagata e le mafaitaulia ae faapea foi lalolagi e le mafaitaulia na foafoaina e Ia. E le faatuaoia i le tulaga e le oo i ai se fua faatatau po o se malamalama o le tagata soifua” (“O le Togiola,” Liahona, Ian. 1997, 39).

Faamatala atu faapea i le faaiuga o lana nofoaiga, na aoao ai e le Tupu o Peniamina lona nuu faapea na tau atu e le agelu ia te ia se savali o le “tala fiafia o le olioli tele” ina ia mafai e tagata ona “faatumuina i le olioli” (Mosaea 3:2–4). Fai i ni nai tamaiti aoga e feauauai i le faitauina leotele mai leMosaea 3:5-11 ao mulimuli le vasega i le faitauga, ma vaavaai mo “le olioli tele” na faamatalaina e le Tupu o Peniamina.

O a savali i nei fuaiupu e te manatu na mafua ai ona faatumulia le nuu o Peniamina i le olioli? (A o tali mai tamaiti aoga, faamamafa atu faapea o Iesu Keriso ua mafai ai ona maua le faaolataga.
O a upu po o fuaitau ua faamatalaina ai le tau na totogi e Iesu Keriso mo lo tatou faaolataga?

Valaaulia se tamaitiiti aoga e faitau le saunoaga lenei a Elder James E. Talmage (1862–1933) o le Korama a Aposetolo e Toasefululua:

“O tiga o Keriso i le faatoaga e lemafuatiaina e le mafaufau e gata, i le maoae ma le mafuaaga. … Sa tauivi o ia ma oi i lalo o se avega lea e leai se isi lava tagata na ola i le lalolagi e ono mafai faapea e mafai [ona faia]. Sa le na o se tiga faaletino, po o se ita faalemafaufau, na mafua ai ona puapuagatia o ia i sauaga faapena lea na oo ai ina tafe mai le toto mai pu afu uma; ae o se tiga faaleagaga o le agaga lea e na o le Atua lava e mafai ona oo i ai. E leai se isi tagata, po o le a lava le tele o ona mana faaletino po o le malosi faalemafaufau, ona mafai ona puapuaga faapea” (Jesus the Christ, lom. lona 3. [1916], 613).

O a manatu ma lagona ua e maua ao e mafaufau loloto i le maoae o le puapuagatia o Iesu Keriso mo i tatou?

2 Nifae 9:6–12, 20–22

Na manumalo Iesu Keriso i le oti faaletino ma le faaleagaga

Fai i tamaiti aoga e vaavaai faalemafaufau pe o le a le mea semanu e tupu pe ana faapea e leai le Togiola. Ina ia fesoasoani i tamaiti aoga e vaavaai faalemafaufau i le tulaga o le tagata semanu e i ai pe ana leai le Togiola, fai i se tamaitiiti aoga e faitau leotele le 2 Nifae 9:6–9. Valaaulia le vasega e mulimuli i le faitauga, ma vaavaai mo fuaitau na e faamatalaina lo tatou tulaga pagatia semanu e i ai e aunoa ma le Togiola.

E tusa ai ma le perofeta o Iakopo, o le a le mea o le a tupu i o tatou tino pe ana leai le Togiola? O le a le mea o le a tupu i o tatou agaga?

Faamatala i tamaiti aoga faapea o le savali tutotonu o le talalelei e faapea ona o le Togiola a Iesu Keriso e le tatau ai ona tatou oo i lenei pagatia matautia.

Fai i ni tamaiti aoga se toalua e feauauai i le faitauina leotele mai le 2 Nifae 9:10–12, 20–22 ao vaavaai le vasega mo mea e laveaiina i tatou mai le oti faaleagaga ma le faaletino.

O a mea ua saunia mo i tatou e aloese ai mai le oti faaleagaga ma le faaletino? (Fesoasoani i tamaiti aoga e aotele lenei aoaoga faavae: E ala i Lana Togiola, na manumalo Iesu Keriso i taunuuga o le oti faaletino ma le faaleagaga.)
O a mea ua aoao mai e nei fuaiupu e uiga i faamanuiaga o le Toetu? (O o tatou tino faaletino ma o tatou agaga o le a toefaatasia mo le faavavau. O le a toe aumaia i tatou i le afioaga o le Atua mo le faamasinoga.)

Faaali atu le saunoaga lenei a Elder D. Todd Christofferson o le Korama a Aposetolo e Toasefululua, ma fai i se tamaitiiti aoga e faitau leotele:

“E ala i Lana Togiola ma le Toetu, ua manumalo ai Iesu Keriso i vaega uma o le Pa’ū. O le oti faaletino o le a na o sina taimi le tumau, ma e oo lava i le oti faaleagaga ua i ai sona mutaaga, aua o le a tatou toe foi uma i le afioaga o le Atua, mo na o sina taimi le tumau, ina ia faamasinoina” (“O le Toetu o Iesu Keriso,” Ensign po o le Liahona, Me 2014, 112).

O anafea na e lagona ai le lotofaafetai faapea o Iesu Keriso na manumalo i le oti faaletino ma le faaleagaga?

Mosaea 3:11, 16; 15:7–9; Alema 7:11–13; Moronae 8:8–12; Mataupu Faavae ma Feagaiga 137:7–9

E ala mai i Lana Togiola, ua ofoina mai ai e Iesu Keriso le laveaiina i tagata uma

Faamanatu atu i tamaiti aoga e faapea e faaopoopo atu i le laveaiina o tagata uma mai le oti faaletino ma le faaleagaga na mafua ona o le Pa’u, e mafai e Iesu Keriso ona laveai i tatou mai le oti faaleagaga lea e mafua ona o a tatou lava agasala. Valaaulia se tamaitiiti aoga e faitau leotele le Mosaea 15:7-9 ao vaavaai le vasega pe na faapefea e Keriso ona mafai ona laveaiina i tatou mai a tatou agasala.

O a mea ua aoao mai e nei fuaiupu e uiga i le pe faapefea ona mafai e Keriso ona laveaiina i tatou mai a tatou agasala? (Faamamafa atu lenei aoaoga faavae: E ala i le Togiola, na motusia ai e Iesu Keriso noataga o le oti ma tauave o tatou leaga i Ona luga, e faamalie ai manaoga o le faamasino tonu ma maua ai le mana e fai ai le puluvaga mo i tatou.)
O le a le uiga o le upu puluvaga? O le Puluvaga o le faatinoga o le aofia ai i le va o ni vaega e fesoasoani ia i latou e faaleleia ni eseesega. I lenei tulaga, o Iesu e tu i lo tatou va ma le Atua ina ia faaleleia le sootaga ua faaleagaina e a tatou agasala.)

Faamatala atu faapea o le Tusi a Mamona ua fesoasoani ia i tatou e malamalama ai pe faapefea e le Togiola a Iesu Keriso ona faaolaina tamaiti laiti ma tagata na maliliu ae lei mauaina le talalelei pe papatisoina.

Tuu atu i se vaega o le vasega e faitau le leoa le Mosaea 3:16ma faafesootai i le Moronae 8:8-12. Tuu atu i le isi vaega o le vasega e faitau le leoa le Mosaea 3:11 ma faafesootai i le Mataupu Faavae ma Feagaiga 137:7-9.

O a mea ua aoao mai e nei fuaiupu e uiga i le faaolataga o tamaiti o e maliliu ae lei papatisoina?
O a mea ua aoao mai e nei fuaiupu e uiga i le faaolaina o i latou “o e na maliliu e aunoa ma le iloa o le finagalo o le Atua”? (Mosaea 3:11.)

Tau atu i tamaiti aoga faapea e ala mai i le Togiola na maua ai e le Faaola le alofa atoatoa e malamalama ai ia i tatou ma fesoasoani ai ia i tatou e ala mai i luitau o le olaga faitino. Fai i tamaiti aoga e suesue le Alema 7:11-13, ma vaavaai mo upu na e faamatalaina luitau o le olaga faitino na aafia ai Iesu Keriso o se vaega o le Togiola. Ao lipoti mai e tamaiti aoga mea na latou maua, lisi upu nei i le laupapa: tiga, puapuaga, faaosoosoga, mai, oti, le atoatoa (vaivaiga pe le atoatoa le malosi), ma le agasala. Faasino atu le fuaitau “ituaiga eseese uma” i le Alema 7:11, ma fai i tamaiti aoga e faasoa mai faataitaiga o tulaga eseese ua lisiina i le laupapa.

Faasino atu faapea o le fuaitau “ave i ona luga” e tau soo mo ni nai taimi i fuaiupu 11–13. (Manatua: O le faailoaina o le tau soo o se tomai o le suesueina o tusitusiga paia e mafai ona e faamamafaina iinei. O le matauina o mau e tau soo e mafai ona fesoasoani i tagata aoao e faailoa manatu autu e faamamafaina.)

E tusa ai ma fuaiupu 11–12, aisea na “tauave ai i ona luga” e Iesu Keriso o tatou tiga, mai, le atoatoa ma isi tulaga o loo lisiina i le laupapa? (Fesoasoani i tamaiti aoga e faailoa mai lenei mataupu faavae: Na tauave e le Faaola i ona lava luga o tatou tiga, mai, ma le atoatoa ina ia mafai ona ia fesoasoani ia i tatou ao tatou feagai ma luitau o le olaga faitino.)

Faaali atu le saunoaga lenei a Elder Jeffrey R. Holland o le Korama a Aposetolo e Toasefululua, ma fai i tamaiti aoga e faitau leotele:

“Ou te molimau atu o le Togiola a le Faaola e siieseina ai mai ia i tatou e le gata o avega o a tatou agasala, ae faapena foi i avega o o tatou mafatiaga ma faanoanoaga, o o tatou lototiga ma o tatou lē fiafia [tagai Alema 7:11–12]. Mai lava i le amataga o le faatuatua i se fesoasoani faapena o le a tuuina mai ai ia i tatou e le gata i le mafuaaga ma se auala e faaleleia ai, ae o se faamalosiauga ina ia tuuese a tatou avega ae tauave lo tatou faaolataga”“O Mea Malepelepe e Fonofonoina,” Ensign po o le Liahona, Me 2006, 70–71).

E faapefea e le faalagolago i le Togiola a le Faaola ona aafia ai au faatinoga ma lau vaaiga e faavavau?
E faapefea ona fesoasoani ia te oe le malamalama i upumoni i le Alema 7:11–13 ao e feagai ma luitau?

Valaaulia tamaiti aoga e faasoa mai ni aafiaga na latou lagona ai le mana o le Togiola a Iesu Keriso i o latou olaga (ia lapatai i latou e aua le faasoaina mai se mea e paia pe patino tele).

Valaaulia tamaiti aoga e tusi i lalo mea e mafai ona latou faia ia sili atu ai le faaaogaina o le mana faamalolo ma faamalosi o le Togiola a le Faaola i o latou olaga. Valaaulia i latou e faatino nei uunaiga.

Faitauga a Tamaiti Aoga

2 Nifae 9:6–12, 20–22; Mosaea 3:5–11, 16; 15:7–9; Alema 7:11–13; 34:8–12; Moronae 8:8–12; Mataupu Faavae ma Feagaiga 137:7–9.
D. Todd Christofferson, “Togiola,” Ensignpo o le Liahona, Me 2013, 109–12.