Biblíuljósmyndir

Biblíuljósmyndir

Biblíuljósmyndir

Formáli
Þessar ljósmyndir af mikilvægum stöðum eru dæmi um það land sem Jesús gekk um, þar sem spámenn á tímum Biblíunnar lifðu, kenndu og þar sem margir atburðir ritninganna gerðust.
Yfirlit
Kortið hér að neðan sýnir staðsetningar þeirra ljósmynda sem finna má í þessum hluta. Á hverri blaðsíðu sem fylgir hér á eftir má finna númeraða ljósmynd og stutta lýsingu á staðnum. Þýðingarmiklir atburðir ritninganna sem gerðust á viðkomandi stað eru því næst taldir upp, ásamt ritningargreinum svo að vita megi hvar hægt sé að lesa sér frekar til um þá atburði.
1. Nílarfljót og Egyptaland
Gróðurfar á bökkum Nílar. Það var á slíkum stað sem móðir Móse faldi ungan son sinn. Fjær eru eyðimerkursvæðin sem þekja mestan hluta Egyptalands.
2. Sínaífjall (Hóreb) og óbyggðir Sínaí
Það eru nokkrir möguleikar í boði þegar rætt er um hvert sé Sínaífjall. Hefð er fyrir því að Jebel Musa sé líklegasta fjallið, (Fjall Móse), sjá á meðfylgjandi ljósmynd.
3. Óbyggðir Júdeu
Óbyggðir Júdeu liggja austur af Jerúsalem og niður í átt að Dauðahafinu.
4. Kades Barnea
Hér er horft í norðausturátt yfir hinn mikla eyðimerkurdal (einnig nefndur wadi) þar sem Kades Barnea er staðsett. Vatnsflaumurinn sem hér rennur á regntímanum gerir staðinn rakan og gróðursælan mitt í Sín-óbyggðunum.
5. Grafhýsi patríarkanna
Þessi bygging er ein frægasta byggingin í gjörvöllu Landinu helga og byggði Heródes konungur hana í Hebron, yfir þeim stað sem arfsögnin sagði vera Makpelahelli, sem Abraham hafði keypt til að nota sem fjölskyldugrafreit. (1 Mós 23).
6. Fjalllendi Júdeu
Fjalllendi Júdeu er um 56 kílómetra langt og 27 kílómetra breitt. Mikill hluti þess er grýtt land og illa fallið til ræktunar. Hæðirnar eru sundurgrafnar af dalskorningum með nokkuð frjósömum jarðvegi. Hinir fyrstu Ísraelítar bjuggu á þessum hæðum og bjuggust þar til varnar gegn innrásarherjum.
7. Betlehem
Þessi mynd sýnir klettahæðir og fjárhaga í forgrunni, með Betlehem nútímans í bakgrunni.
8. Jerúsalem
Horft til norðurs yfir Jerúsalem. Á miðri mynd er musterishæðin. Á henni er nú helg bygging múslima með gulli lögðu þaki, kölluð Helgidómurinn á klettinum. Hér voru guðsþjónustur Gyðinga til forna í musteri þeirra. Múrarnir nálægt Helgidóminum á klettinum umlykja hina fornu borg Jerúsalem. Hægra megin við múrinn er Kídrondalurinn. Lengst til hægri, rétt utan við ljósmyndina, er Olíufjallið. Í norðri, handan við Helgidóminn á klettinum, er sá staður sem talinn er vera Golgata eða Hauskúpustaður.
9. Musteri Heródesar
Þessi mynd sýnir nútíma eftirmynd af musteri Heródesar (hlutfall 1:50) eins og talið er að það hafi verið árið 67 e.Kr. Múrinn umhverfis byggingar musterisins afmarkar griðastaðinn sem hefur að geyma Hið allra helgasta, Hið heilaga, og þrjá mikla forgarða.
10. Musterisþrepin
Musterissvæðinu var skipt niður í garða sem afmörkuðust af veggjum, og ytri garðarnir stóðu lægra í landslaginu. Tilbiðjendur komu inn um hin ýmsu hlið, meðal annars þar sem leiðin lá upp á við frá þessum þrepum inn í ytri garðana og þaðan inn í innri garðana. Þúsundir manna hafa í tímanna rás farið um þessi þrep, meðal þeirra Guðssonurinn. Þegar her Títusar tortímdi musterinu árið 70 e.Kr., huldust þrepin lausagrjóti. Þegar hluti hinnar gömlu Jerúsalem var grafinn upp af fornleifafræðingum á áttunda áratugnum, komu þrepin í ljós.
11. Olíufjallið
Hér er horft í suðvestur á Olíufjallið. Byggingin í forgrunni er á mögulegri staðsetningu Getsemanegarðsins. Hinn 24. október 1841 gekk öldungur Orson Hyde, einn úr Tólpostulasveitinni, upp á Olíufjallið og flutti spádómsbæn til helgunar endurkomu barna Abrahams og til byggingar musterisins.
12. Getsemanegarður
Þessi mynd af öldnu ólífutré er tekin þar sem talið er að Getsemanegarðurinn hafi verið. Hér nálægt baðst frelsarinn fyrir eftir að hann fór úr loftsalnum nóttina sem hann var svikinn.
13. Golgata
Þessi klettur, sem líkist hauskúpu og er rétt utan við Damaskushliðið í Jerúsalem (Jóh 19:17, 20), er mögulega sá staður þar sem Jesús Kristur var krossfestur.
14. Garðgröfin
Möguleg staðsetning garðgrafar Jósefs frá Arimaþeu. Margir nútímaspámenn eru á þeirri skoðun að líkami frelsarans hafi verið lagður í þessa gröf, sem hér má sjá.
15. Jeríkó
Þessi mynd sýnir gróðurinn í Jeríkó nútímans. Til forna var hér borg umgirt múrum í Jórdandalnum, 252 metrum neðar sjávarmáli. Nú er hér gróðursælt landbúnaðarhérað þar sem döðlupálmar og sítruslundir dafna. Í bakgrunni er hið álitna fjall freistinganna (Matt 4:1–11).
16. Síló
Séð í vesturátt eru rústir hinnar fornu borgar Síló, rétt vinstra megin við miðju myndar.
17. Síkem
Hin forna borg Síkem. Í forgrunni er Garímsfjall og aftar á myndinni er Ebalfjall. Síkem stendur á milli þessara tveggja fjalla.
18. Dótan í Samaríu
Dótan einkennist af fjallshryggjum og dölum. Hér er gott beitiland. Þegar Ísraelítar byggðu landið, kom þetta hérað í hlut Manasse.
19. Sesarea og Saronsléttan til Karmel
Horft í norður yfir hina fornu höfn Sesareu og Saronsléttuna. Einnig sést fjallgarðurinn Karmel efst á myndinni.
20. Joppe
Horft í norðvesturátt yfir hafnarborgina Joppe (Jaffa).
21. Jesreeldalur
Horft í suðvestur frá tindi Taborfjalls og sést þá hluti Jesreeldals, einnig þekktur sem Esdraleon sléttan. Þótt oft sé litið á Jesreel sem einn stóran dal, er hann í rauninni röð dala sem tengja Akkósléttuna við Jórdandalinn og svæðið í kringum Galíleuvatn. Megiddódalur er til dæmis í vesturhluta þessa dals. Um Jesreeldal lá aðalsamgönguleiðin austur og vestur um Landið helga milli Miðjarðarhafs í vestri og Jórdandals í austri.
22. Taborfjall
Horft í norðvesturátt í átt að Taborfjalli. Láglendið umhverfis Taborfjall er hluti af Jesreeldalnum. Nasaret er í hæðunum nálægt Taborfjalli.
23. Galíleuvatn og fjall sæluboðanna
Horft í suðvestur yfir norðvesturhorn Galíleuvatns, sem er ferskvatn. Hæðin fyrir miðju í forgrunni er fjall sæluboðanna að talið er. Kapernaum er til vinstri, utan myndar. Tíberías er sunnar, meðfram vesturströndinni.
24. Kapernaum
Kapernaum, sem staðsett er á norðurströnd Galíleuvatns, var miðpunktur þjónustu Jesú í Galíleu (Matt 9:1–2; Mark 2:1–5). Þessi mikilvæga verslunar- og fiskveiðistöð var byggð mönnum af Þjóðunum engu síður en Gyðingum. Á fyrstu öld komst íbúafjöldinn sennilega aldrei yfir 1.000. Kapernaum stóð þar sem mættust mikilvægar verslunarleiðir og umhverfis var frjósamt land. Rómverskir hermenn gerðu hér baðhús og birgðastöðvar. Þrátt fyrir þau mörgu kraftaverk sem hér voru unnin, hafnaði fólkið yfirleitt trúboði frelsarans. Þess vegna lagði Jesús bölvun á borgina (Matt 11:20, 23–24). Er tímar liðu varð Kapernaum rústir einar og þar er nú engin byggð.
25. Jórdanáin
Jórdanáin á upptök norðan Galíleuvatns, sem hún fellur í, og rennur síðan í suður frá vatninu til Dauðahafsins. Þessi ljósmynd var tekin nálægt afrennsli árinnar frá Galíleuvatni.
26. Sesarea Filippí
Sesarea Filippí er staðsett við rætur Hermonfjalls. Þessi lækur er ein af aðrennslisæðum Jórdanárinnar. Heródes Filippus, sem réð hér ríkjum, byggði hér borg til heiðurs Sesari (keisara sínum) og sjálfum sér; fyrrum var borgin kölluð Panias og í dag Banias og einnig Sesarea Filippí.
27. Nasaret
Þessi mynd af Nasaret nútímans er tekin í suðurátt. Á tímum Biblíunnar var Nasaret lítið þorp.
28. Dan
Hin forna borg Dan var kölluð Lesem (Jós 19:47) eða Laís (Dóm 18:7, 14) áður en Ísraelítar lögðu landið undir sig. Lækurinn sem hér rennur, ásamt læknum í Sesareu Filippí, eru meginuppsprettur Jórdanárinnar. Hér má sjá mynd af musteri Jeróbóams.
29. Aþena
Þessi ljósmynd, sem tekin er frá Areopagus (Areashæð) sýnir Akrópólis í Aþenu sem var helgistaður ýmissa heiðinna guða. Aþena var hinn forni, gríski höfuðstaður Attíku og á tímum Nýja testamentis taldist hún til rómverska héraðsins Akkíu. Henni var í heiðni nafn gefið til heiðurs hinni grísku gyðju Aþenu. Þegar á tímum Nýja testamentis hafði Aþena misst að mestu sitt fyrra mikilvægi og ljóma, en þar voru þó enn margar styttur og minnismerki um marga guði og gyðjur, þar á meðal til heiðurs „ókunnum guði“ (Post 17:23).
30. Korinta
Korinta er helsta borg rómverska héraðsins Akkíu. Hún stóð á eiðinu sem tengir Pelóponnisos við meginland Grikklands, og hafði hafnir bæði til austurs og vesturs. Hún var auðug og voldug hafnarborg.
31. Efesus
Rústir gríska leikhússins í Efesus, þar sem Páll prédikaði. Á tímum Nýja testamentis var Efesus víðfræg um allan hinn þekkta heim fyrir sitt stórfenglega musteri sem reist var til heiðurs hinni heiðnu gyðju Grikkja, Artemis. Efesus, nú rústir einar, var eitt sinn höfuðstaður rómverska héraðsins Asíu og mikil miðstöð verslunar. Silfursmiðir borgarinnar komu sér upp blómlegri verslun með myndir af Artemis.
32. Eyjan Patmos
Eyjan Patmos í Eyjahafi, sem Jóhannes var gerður útlægur til (Op 1:9). Arfsagnir segja, að þar hafi hann unnið í marmaranámum.