1 Pwe kedekedeo, mwurin ei inangihada I en esehla dahme ei pahpao kilangehr, oh pwehki ei kamehlele me Kauno kak kasalehiengie, ni ahnsou me I wie mwomwohd oh medemedewe nan ei mohngiong, Ngehn en Kauno ahpw tiada pohi, ei, oh ketin weiehla pohn nahna ieu me ileile mehlel, me ehdin ei kilang, oh ehdin ei sokedi powe.

2 Oh Ngehno mahsanihongie: Kilang, dahme ke inangih?

3 I ahpw nda: I inangih kilang soahng kan me ei pahpao kilangehr.

4 Oh Ngehno mahsanihongie: Ke kamehlele me ahmw pahpao kilangada tuhke me e koasoaiadahro?

5 Oh I sapengki: Ei, komw mwahngih me I kamehlele ahn ei pahpao koasoai koaros.

6 Oh mwurin ei nda koasoai pwukat, Ngehno kapitie laudida, mahsanih: Kepinga ong Kauno, Koht wasalapalahpie; pwe ih me iei Koht en sampah pwon, iei, me lapalapasang koaros. Oh meid pai kowe, Nihpai, pwehki ahmw kamehlele Sapwellimen Koht wasalapalahpie; eri, ke pahn kilang soahng kan me ke inangih kilang.

7 Oh kilang ape wet pahn kasansalehnguhk ni kilel ehu, me mwurin ahmw pahn kilang tuhke me ahm pahpao songehr wahu, ke pahn pil kilang emen ohl ketketdihdo sang nanleng, oh ke pahn kadehde ih; oh mwurin ahmw pahn kadehdehda ih ke pahn kin kadehdehki me ih iei Sapwellimen Kohto.

8 Kedekedeo, Ngehno ahpw mahsanihongie: Kilang! Oh I kilengla oh kilangada tuhkehieu; oh e duwehte tuhke me ei pahpao kilangadahu; oh linganih udahn lingalingsang lingan koaros; oh pwetepwetih pwetepwetsang pwetepwet en sinoh.

9 Kedekedeo, mwurin ei kilangehr tuhkehu, I ndahieng Ngehno: I ese me komw kasalehiongie tuhke me keieu kesempwalasang koaros.

10 Oh e kalelapak rehi: Dahme ke inangih?

11 Oh ngehi sapengki: I en esehla kawehwehpe—pwe I koasoaieng duwehte aramas ar kin koasoakoasoaipene; pwe I kilang me paliware duwehte aramas; ahpw, I ese me ih iei Ngehn en Kauno; oh e koasoaiong ie duwehte aramas ar kin koasoakoasoaipene.

12 Kedekedeo e ahpw mahsanihongie: Kilang! Oh I kilenglahng pwe I en kilang ih, oh I sohte kilangada; pwe e sohrasang ie.

13 Kedekedeo I kilengla oh kilangada kahnimw lap en Serusalemo, oh pil ekei kahnihmw kan. Oh I kilangada kahnihmw en Nahsared; oh nan kahnihmw en Nahsared I kilangada lih meipwon men, oh e pwetepwet oh lingan mehlel.

14 Kedekedeo I kilangada nanleng ritida; oh tohnleng men ketdihdo oh uh mwohi; oh mahsanihongie: Nihpai, dahme ke kilangadahro?

15 Oh ngehi sapengki: Meipwon men, me keieu masamwahu oh kaselel sang meipwon koaros.

16 Oh e mahsanihongie: Komw wehwehki Koht e pein ketkihdi pein ih?

17 Oh ngehi sapengki: I ese me e ketin poakohng sapwellime seri kan; ahpw, I sohte ese wehwehn soahng koaros.

18 Oh e mahsanihongie: Kilang, meipwon me ke kilangada iei inen Sapwellimen Kohto, ni paliwar en uduk.

19 Kedekedeo I kilangada me Ngehno wahsang; oh mwurinte ahnsou kis me Ngehno wahsang, tohnlengo mahsanihongie, ketihtihki: Kilang!

20 Oh I kilengla oh pwurehng kilangada meipwono, kolokol seri men nan pehko.

21 Oh tohnlengo mahsanihongie: Kilang Sihmpwul en Koht, ei, iei Sapwellimen Sahm Soutuk! Ke ese wehwehn tuhke me ahmw pahpao kilangadahu?

22 Oh I sapeng ih oh koasoaia: Ei, E wia limpoak en Koht, me e ketin kihong nan mohngiong en aramas akan; eri, ih me keieu anahnepe nan soahng koaros.

23 Oh e mahsanihongie, ketihtihki: Ei, oh me keieu kaperen ong palingehn.

24 Oh mwurin e mahsaniher mahsen pwukat, e ahpw mahsenihongie: Kilang! Oh I kilengla, oh I kilangada Sapwellimen Kohto e ketketseli rehn aramas akan; oh I kilangada tohto me kin poaridiong ni alualuwe kan oh pwongih ih.

25 Kedekedeo I kilangada me reil reirieo, me ei pahpao kilangadahu, iei mahsen en Koht, me kahluhwahla ni utun pihl en komouro, de tuhkehn komouro; pihl wet me wehwehki limpoak en Koht; oh I pil kilang me tuhkehn komouro wehwehki limpoak en Koht.

26 Oh tohnlengo pwurehng mahsanihongie: Kilengla oh kilang Koht e pein ketkihdi pein ih!

27 Oh I kilengla oh kilangada Soundoar en sampah, me ei pahpao koasoaiadahr; oh I pil kilangada soukohp me pahn kaunopada mwowe. Oh Sihmpwul en Koht ketla oh pepdaisla reh; oh mwurin eh pepdaisla, I kilangada nanleng ritida, oh Ngehn Sarawi ketdihdo sang nanleng oh ketket powe ni mwomw en mwuroi.

28 Oh I kilang me e ketketseli kalkalohkehng aramas akan, ni manaman oh lingan lapalahpie; oh pokon tohto kohpene pwe irail en rong ih; oh I kilang me irail kausasang ih nan pwungarail.

29 Oh I pil kilangada meh ehk-riemen ideidawehn ih. Kedekedeho Ngehno pil wairailsang mwohn meseie, oh I sohla kilang irailda.

30 Kedekedeo, tohnlengo pwureng mahsandohngie, ketihtihki: Kilang! Oh ngehi kilengla, oh kilangada nanleng pwurehng ritpeseng, oh I kilangada tohnleng kei ketketdihdo rehn aramas akan; oh irail kalohkehng irail.

31 Oh e pwurehng mahsanihongie, ketihtihki: Kilang! Oh ngehi kilengla, oh I kilangada Sihmpwul en Koht ketketseli rehn aramas akan. Oh I kilangada lapalahn pokon en aramas me soumwahu, oh lokolongki soangoasoangen soumwahu, oh tepil kan oh ngehn saut akan; oh tohnlengo mahsanih oh kasalehongie mepwukat koaros. Oh irail kamwahula sang ni manaman en Sihmpwul en Kohto; oh tepil kan oh ngehn saut akan pekeusla.

32 Kedekedeo tohnlengo pwurehng mahsanihongie, ketihtihki: Kilang! Oh I kilengla oh kilangada Sihmpwul en Koht, me aramasako wahsangehr; ei, sampah kadeikadahr Sapwellimen Koht Soutuk Ieroso; oh I kilang oh kadehdehki.

33 Oh Ngehi, Nihpai, kilang me e kalohpwuala pohn lohpwuo oh kamakamkihla dipen sampah.

34 Oh mwurin eh kamakamala I kilangada pokon kan en sampah, arail kohpene pwe irail en pelian wahnpoaron en Sihmpwulo; pwe tohnleng en Kauno kahdanikinirail meh ehk-riemeno.

35 Oh pokon en sampah kapokonpene; oh I kilangada me irail mih nan ihmw lapala oh tehlap ehu, duwehte ihmw me ei pahpao kilangada. Oh tohnleng en Kauno pwurehng mahsanihongie, ketihtihki: Kilang sampah oh eripitih; ei, kilang peneinei en Israelkan kapokonpenehr pwe irail en peiong wahnpoaron ehk-riemen en Sihmpwulo.

36 Kedekedeo I kilangada oh kadehdehki, me ihmw kalaimwon oh tehlapo iei kahngohdi en sampah; oh e pwupwidi, oh eh pwupwidio udahn lepelepen pwupw. Oh tohnleng en Kauno pwurehng mahsanihongie, ketihtihki: Ih pahn mwomwen kamwomwalahn wehi kan, keinek kan, lokaia kan, oh aramas akan, me pahn peiong wahnpoaron ehk-riemen en Sihmpwulo.