1 Kedekedeo Ngehi, Nihpai, mwurin Ngehno tiada pohi, oh [I] kilangehr mepwukat koaros, I pwurodo ni imwen ei pahpao impwalo.

2 Kedekedeo I kilangada riei pwutak ko, oh irail wie mwoaroamwoarongkipene duwen soahng kan me ei pahpao koasoaiahengirailehr.

3 Pwe e koasoaiahiong irailehrni mehlel soahng kesempwal tohtoh, me apwal [aramas] en wehwehki, ihte ma aramas pahn peki rehn Kauno; oh mohngiongirail kan keptakai, kahrehda ar sohte kin kilenglahng Kauno nin duwen me irail konehng wia.

4 Oh met ngehi, Nihpai, nsensuwed pwehki keptakai en mohngiongirail kan, oh pil, pwehki soahng kan me I kilangehr, oh ese me re uhdahn pahn wiawi pwehki uwen suwed me aramas kan kin wiahda.

5 Kedekedeo ngehi eri luwetla pwehki ei kahpwal akan, pwe I leme me ei kahpwal akan laud sang mehkoaros, pwehki kamwomwalahn nei aramas akan, pwe I kilangehr arail pwupwilao.

6 Kedekedeo mwurin ei kehlaildahro I koasoaieng riei pwutak kan, pwe I men esehda mehlel kahrepen arail mwoarmwoarong.

7 Oh irail nda: Kilang, se sohte kak wehwehki soahng kan me aht pahpao koasoaiahier me pid rahn tuhke olihpo, oh pil duwen Mehn Liki kan.

8 Oh I kalelapakrehrail: Kumwail pekier rehn Kauno?

9 Oh irail sapengkinie: Soh; pwe Kauno sohte kin ketin kasalehiong kiht mepwukat.

10 Kilang, I ndahieng irail: Ia duwen amwail sohte kin kapwaiada kosonned en Kauno? Ia duwen amwail pahn lekidekla, pwehki mohngiongimwail kan kekeluwakalahr?

11 Kumwail sohte tamataman soahng kan me Kauno ketin mahsaniher?—Ma kumwail sohte pahn kekeluwakiala mohngiongimwail kan, oh peki rehi ni pwoson, kamehlele me kumwail pahn alehdi, iangahki kapwaiada ei kosonned akan, ni mehlel kumwail pahn wehwehkihla mepwukat koaruhsie.

12 Kilang, I ndahieng kumwail, me peneinei en Israel rasohng tuhke olihpo, sang ni Ngehn en Kauno me mie rehn atail pahpao; oh kilang kitail seu tipwasangehr peneinei en Israel, oh kitail seu wia apwoat rahn tuhkehn peneinei en Israelo?

13 Oh met, wehwehn dahme atail pahpao koasoiadahr me pid rahntuhke mehlel kan ar kapatapatehng ni tuhkeo sang ni unseklahn Mehn Liki kan, iei, me nan imwin rahn akan, ahnsou me kadaudoketail kan pahn pwupwikihdi ar sohpwoson, iei, erein sounpar tohto, oh dih tohto mwurin Mesaia eh pahn ketin pwarohng aramas akan ni paliwar, eri rongamwahu unsek en Mesaiao pahn kohieng Mehn Liki kan, oh sang rehn Mehn Liki kan e ahpw pahn uhd kohieng kadaudoketail kan me luwehdi—

14 Oh ni ahnsouo kadaudoketail kan me luwehdi pahn esehda me irail iei kisehn peneinei en Israel, oh me irail iei sapwellimen Kauno aramas en inouo; oh irail ahpw pahn esehda oh wehwehkihda duwen arail pahpa kahlap oko, oh pil wehwehkihla rongamwahu en arail Soundoaro, me pein ih ketin padahkihong arail pahpa kalahp oko; eri, irail pahn wehwehkihla duwen arail Soundoaro oh uhdahn karepen sapwellime padahk, pwe irail en kak ese duwen arail pahn kohdohng reh oh komourla.

15 Oh ni rahno irail seu pahn perenda oh kapingahki arail Koht soutuk, arail paipalap oh komourparail? Iei, ni rahno, irail sou pahn ale kakehlaparail oh ketihnaparail sang ni tuhkehn wain me mehlelo? Iei, irail sou pahn kohdohng nan udahn sapwellimen Koht kehl mehlelo?

16 Kilang, I ndahieng kumwail, Mehlel; irail pahn pwurehng tamanirailda nan pwungen peneinei en Israel kan; irail pahn poadehng tuhkehn olip mehlelo, pwehki arail wia rahn tuhke mehlel en olipo.

17 Oh iei met me atail pahpao kawehwe; oh e kawehwe me e sohte pahn wiawi lao lel mwurin Mehn Liki kan arail pahn kamwereirailpeseng; oh e kawehwe me e pahn kohdo sang rehn Mehn Liki kan, oh Kauno kak ketin kasalehieng Mehn Liki kan sapwellime manaman, pwehki mehn Suhs akan, de peneinei en Israel arail soikala.

18 Eri, atail pahpao sohte koasoiahte kadaudoketail kan, ahpw pil peneinei en Israel koaros, nin duwen inouo eh pahn pweida nan imwin rahn akan; inouo me Kauno ketin wiahieng samatail Eipram, mahsanih: Nan kadaudokemw kan seri koaruhsie nan sampah pahn kapaida.

19 Kedekedeo ngehi, Nihpai, koasoaiahiong irail soahng tohto me pid duwen mepwukat; mehlel, I koasoaiahiong irail duwen kopwurupwurdohn mehn Suhs akan ni imwin rahn akan.

20 Oh I wadekohng irail mahsen akan en Aiseia, me mahsanih duwen kopwurupwurodohn mehn Suhs akan, de peneinei en Israel; oh mwurin arail pahn pwurodo re sohlahr pahn pwurehng namanekla, de re solahr pahn pwurehng mwerpeseng. Kedekedeo I koasoaiahieng riei pwutak ko soahng tohto, kahrehda re meleileidi oh akitikitikla mwohn Kauno.

21 Kedekedeo irail pwurehng koasoaiong ie, ndinda: Ia wehwehn soahng wet me atail pahpao kilangada nan ouramano? Ia wehwehn tuhke me e kilangadao?

22 Oh ngehi eri ndaiong irail: E wehwehki tuhkehn koumouro.

23 Oh irail ndaiong ie: Ia wehwehn reil mete me atail pahpao kilangadahro, me uhlahng ni tuhkeo?

24 Ngehi ndahng ira me iei mahsen en Koht; oh mehmen me pahn rong mahsen en Koht, oh koledi teng, irail sohte pahn lekidekla; oh pil sohte lohdi pahn manaman en arail kasongosong kan oh kesik ketieu kan en soun kasongosongo, me pahn kahluwairaillang mehla.

25 Eri, Ngehi, Nihpai, kangoangehkinirail re en rong mahsen en Kauno; mehlel, I kangoangehkinirail sang ni kehl en palingeni koaros, oh sang ni koahiek koaros me I ahneki, pwe irail en kak rong mahsen en Koht oh tamataman re en kin kapwaiada sapwellime kosonned akan ahnsou koaros ni mehkoaros.

26 Oh irail kalelapak rehi: Ia wehwehn pillap me atail pahpao kilangadao?

27 Oh I ndaiong irail me pihl me atail pahpao kilangadahro me inenen samin; oh uwen ah madamadau eh direkihla soahng teikan karehda e sohte kilang uwen samin en pihlo.

28 Oh I ndaiong irail me iei wahu kamasepwehko mwo, me katohrehsang me suwed kan tuhkehn komouro oh pil sapwellimen Koht souleng kan.

29 Oh I ndaiong irail me e wehwehki ehl kamasepwehko, me tohnlengo mahsanihong ie me [e] kaunoupdahr ong me suwed akan.

30 Oh I ndaiong irail me aht pahpao pil kilangada me sapwellimen Koht pwuhng me katohrepeseng me suwed kan sang me mwahu kan; oh marainpeo duwehte marain en mpwul en kisiniei, me kin kohkohdahla rehn Koht kohkohlahte, oh sohte imwi.

31 Oh irail pil kalelapak rehi: Soahng wet wehwehki kalokolok en paliwar nan mour wet, de e wehwehki dahme ngehn pahn wiahla mwurin mehlahn paliwar, de e koasoakoasoaia duwen soahng kan me pid sampah?

32 Kedekedeo I ndahieng irail me e wehwehki mehkan me pid paliwar oh palingehn; pwe rahno pahn lelledo me irail pahn pakadeingki arail wiewia kan, iei, wiewia kan me [irail] wiahda ni arail momour ni sampah nan arail ahnsou nan erein mour wet.

33 Eri, ma irail pahn mehla nan arail suwed akan irail pahn pil iang lekidekla, pwehki soahng kan me sang palingehn, me pid duwen [mour de wiewia] pwung; eri, irail pahn udahn uh mwohn silangin Koht, pwe irail en pakadeingki arail wiewia kan; oh ma arail wiewia kan samin re uhdahn pil pahn samin; oh ma irail pahn samin re sohte pahn kak kousoan nan wein Koht; pwe ma soh, a wein Koht pil pahn samin.

34 Ahpw kilang, I ndaiong kumwail, wein Koht sohte samin, oh sohte mehkot samin kak pidelong nan wein Koht; eri e pahn mie wasa samin me kaunopdahngehr me samin kan.

35 Oh mie wasa me kaunopdahr, iei, nan ehl kamasepwehko me I koasoaiahiero, oh tepilo me kaunopadahr wasao; eri wasa me mour en aramas men pahn lel iei nan wehin Koht, de lekidekla pwehki pwuhng me I koasoaiahier.

36 Eri, me suwed kan pahn posoikla sang rehn me mwahu kan, oh sang ni tuhkehn komouro, me wah kan inenen kaselel oh mwahu sang wahn tuhke koaros, iei, oh ih me keieu mwahu nanpwungen sapwellimen Koht kisakis kan. Oh ih met me I ndaiong riei pwutak kan. Ahmen.