1 Kedekedeo se ahpw kihpene soangoasoangen werentuhke koaros, soangen weren werentuhke koaros, oh pil soangen weren wahn tuhke koaros.

2 Kedekedeo ni ahnsou me ei pahpao mihmiher nan sapwtehno, e ndahieng kiht: Kilang, I ouramanda ouraman ehu; de, me wehwehki, I kilangada kaudiahl ehu.

3 Oh kilang, pwehki ei kilangehr soahng wet, mie kahrepen I en kapingahki Kauno pwehki Nihpai oh pil Sam; pwe mie kahrepen I en kamehlele me ira, oh pil tohto kadaudokera, pahn komourla.

4 Ahpw kilang, Leimen oh Lemuel, I pwunodada mehlel pwehki kumwa; pwe kilang, I leme me I kilangada nan ei ouramano, ehu sapwtehn me rotorot oh kansensuwed.

5 Kedekedeo ngehi eri kilangada ohl emen, oh e likawih likou pwetepwet oh reirei ehu; oh e kohdo oh kesihnenda mwohi.

6 Kedekedeo ih eri koasoaidohngie, oh peki rehi I en idawehn ih.

7 Kedekedeo ni ei wie ideidawehn ih I ahpw tehkada me I mihmi wasa kis me rotorot oh kansensuwed.

8 Oh mwurin ei seiseiloangki awa tohto nan rotoroto, I tepda kapakap ong Kauno pwe en ketin mahkohngie, nin duwen sapwellime kalahngan limpoakkan.

9 Kedekedeo mwurin ei kapakapohngehr Kauno I kilangada lapalahn mohs tehlap ehu.

10 Kedekedeo I ahpw kilangada tuhke pwoat, me wah ko mas iou oh kak kaperenda emen aramas.

11 Kedekedeo ngehi eri kohla oh tungoale wahn tuhkeo; oh I diarada me e inenen mem sang soahng koaros me I tungoaledahr. Mehlel, oh I kilang me wahn tuhkeo pwetepwet, oh pwetepwet sang douluhl soahng koaros me I kilangehr.

12 Oh ni ahnsou me I tungoale wahn tuhkeo palingeniet direkihla peren kouwahlap; eri, I ahpw mentehn ei peneinei en pil iang tungoale; pwe I ese me e inenen iou sang wahntuhke teikan koaros.

13 Oh ni ei kilengseli, ma I sou pahn kak pil kilangada ei peneinei, I kilangada pillap pwoat; oh e pwilipwildo, oh e karanih tuhke me I wie tungtungoale waho.

14 Oh I kilengla pwe I en kilang wasa me e pwilipwildohsangieo; oh I kilangada me utuhnpilo ekis doh; oh I kilangada ahmw nohno Saraia, oh Sam, oh Nihpai ni utuhn pihlo; oh irail kesikesihnen likamwete re sehse wasa me re pahn kohlaie.

15 Kedekedeo I ahpw oaleirail; oh I pil lukwerihrail ni ngihl laud pwe irail en kak kohdo rehi, oh tungoale wahn tuhkeo, me inenen iou sang wahn tuhke koaros.

16 Kedekede oh irail ahpw kohdo rehi oh pil iang tungoale wahn tuhkeo.

17 Kedekede oh I ahpw mentehn Leimen oh Lemuel en pil kohdo oh iang tungoale wahn tuhkeo; eri, I kilengla wasa me pillapo pwilipwilsangieo, ma I pahn kak kilangirahda.

18 Kedekede oh I ahpw kilangirahda, ahpw ira sohte men kohdo rehi oh iang tungoale wahn tuhkeo.

19 Oh I kilangada reil reirei pwoat, oh e peiante keilen pillapo, oh uhdohng ni tuhke me I kesikesihnenieo.

20 Oh I pil kilangada ahl inen oh tehtik pwoat, me peiandohte reil reireio lel ni tuhke me I keskesihnenieo; oh e pil peiando pillapo oh lel ni tuhkeo, kohlahng nan mohs lapala oh tehlap ehu, me duwehte sampah ehu.

21 Oh I kilangada aramas ngedehrie, me tohto irail wie nannantihlahte mwowe, pwe irail en kak lella nan ahl me uhla ni tuhke me I wie kesikesihnenieo.

22 Kedekedeo irail eri kohdo, oh tepda keid nan ahl me uhla ni tuhkeo.

23 Kedekedeo pwoaik rotorot ehu ahpw kohda; iei, pwoaik rotorot ehu me inenen mosul mehlel, kahrehda irail akan me tepida keid nan ahlo ahpw salongala, irail keidila ekis wasa tohrohr oh salongala.

24 Kedekedeo ngehi eri pil kilangada ekei me nannantihla mwohrail, oh irail kohdo oh koledi imwin reil reireio; oh irail nantihla mwohrail nan pwoaik rotoroto, kolokol reil reireio, lao irail lelodo ni tuhkeo oh tungoale wahn tuhkeo.

25 Oh mwurin arail tungoalehier wahn tuhkeo irail kilengseli mwomwen me irail namenekda.

26 Oh I pil kilengseli, oh kilangada, me palio pillapo, mie ihmw kalaimwon oh lapala ehu; oh duwehte e mihmi nan wehwe, ilehdahsang pohn sampah.

27 Oh e diren aramas mihmi loale, me mah oh pwulopwul, ohl oh lih, oh mwomwen arail likou ko me inenen kaselel; oh irail kin wie kepikepitikioh idihdihki sendinpehrail kan irail akan me kohdohr oh tungetungoale wahn tuhkeo.

28 Oh mwurin arail songehr wahn tuhkeo irail ahpw namenekda, pwehki irail akan me kepikepitkinirail; oh irail eri pwupwidilahng nan ahl keinepwi kan oh salongala.

29 Oh met ngehi, Nihpai, sohte koasoaiahda mehkoaros me ei pahpao ndahngie.

30 Ahpw, ni nting mwotomwot, kilang, e kilangada pokon en aramas ekei arail nannantihla mwohrail; oh irail kohdo oh koledi imwin reil reireio; oh irail eri nantihla mwowe, wie kolokol teng reil reireio, lao irail kohdo oh poaridi oh tungoale wahn tuhkeo.

31 Oh e pil kilangada ekei pokon en aramas me dedehmseli alarail kohkohlahng ni ihmw kalaimwun oh lapalao.

32 Kedekedeo tohto me duhla nan wasa loal en pihlo; oh tohto irail me solahr sansal mwohn meseo, sansalongseli nan ahl ehusoahng kei.

33 Oh lapalahn pokon me pidelong nanihmw ehusoahngo. Oh mwurin arail pidelong nan ihmwo irail ahpw ididohng ie oh kepitkinie oh irail akan me iang tungtungoale wahn tuhkeo; ahpw se sohte rong irail.

34 Mepwukat me ei pahpao koasoaia: Pwe koaros me kin rong irail, kin pwupwudi.

35 Oh ei pahpao koasoaia me Leimen oh Lemuel sohte tungoale wahn tuhkeo.

36 Kedekedeo mwurin ei pahpao eh koasoaiadahr soahng koaros me pid ah ouramano de kaudiahlo, me uhdahn audapan, e ndahieng kiht, me e inenen salohki Leimen oh Lemuel pwehki soahng kan me e kilangada nan kaudiahlo; ei, e periki ira de lekideksang mwohn silangin Kauno.

37 Oh e ahpw kangoangehkin ira pepehm koaros en pahpa men me limpoak, me ira en rong ah kaweid kan, pwe Kauno en kak ketin mahkohng ira, oh sohte ketin lakidirahla; iei, ei pahpao padahkohng ira.

38 Oh mwurin eh padahk ong ira, oh pil kohpada soahng tohto ong ira, e peki ira en kolokol kosonned akan en Kauno; oh e ahpw kairala ah koasoaieng ira.