INcwadzi ya-Etheri
Umbhalo wemaJarede, lotsetfwe kubongcwengcwe labangemashumi lamabili nakune labatfolwa bantfu baLimhayi etinsukwini teNkhosi Mosiya.
Sehluko 1
Moroni ufinyeta imibhalo ya-Etheri—Umlandvo wetitukulwane ta-Etheri ubekwa sobala—Lulwimi lwemaJarede aluphambatiswa eMbhoshongweni waseBhabheli—INkhosi yetsembisa kubaholela eveni lelikhetsekile iphindze ibente sive lesikhulu.
1 Manje mine, Moroni, sengiyachubeka nekubhala umlandvo walabo bantfu basendvulo lababhujiswa ngesandla seNkhosi eveni lelisenyakatfo.
2 Futsi umlandvo wami ngiwutsatsa kubongcwengcwe labangemashumi lamabili nakune labatfolwa bantfu baLimhayi, lababitwa ngekutsi yincwadzi ya-Etheri.
3 Njengoba ngicabanga kutsi incenye yekucala yalombhalo, lekhuluma ngekudalwa kwemhlaba, kanjalo nekwa-Adamu, nangemlandvo kusukela ngaleso sikhatsi kute kufike embhoshongweni lomkhulu, futsi nanganoma ngutiphi tintfo letenteka emkhatsini webantfwana bebantfu kute kube ngulesi sikhatsi, tikumaJuda—
4 Ngako-ke angitibhali leto tintfo letenteka kusukela etinsukwini ta-Adamu kute kube ngulesikhatsi; kodvwa tikhona kulabongcwengwe; loyo lotitfolako, uyawuba nemandla ekutsi atfole umlandvo logcwele.
5 Kodvwa buka, angibhali umlandvo logcwele, kodvwa ngibhala incenye yemlandvo, kusukela embhoshongweni bate babhujiswe.
6 Futsi ngiwubhala ngalendlela lomlandvo. Loyo lowabhala bekungu Etheri, futsi bekawentalelwane yaKhoriyanthori.
7 Khoriyanthori bekayindvodzana yaMoron.
8 Moron bekayindvodzana ya-Ethemi.
9 Ethemi bekayindvodzana ya-Aha.
10 Aha bekayindvodzana ya-Sethi.
11 Sethi bekayindvodzana yaShibiloni.
12 Shibiloni bekayindvodzana yaKhomu.
13 Khomu bekayindvodzana yaKhoriyanthumu.
14 Khoriyanthumu bekayindvodzana ya-Amnigada.
15 Amnigada bekayindvodzana ya-Aroni.
16 Aroni bekawentalelwane yaHethi, lobekayindvodzana yaHeyathumu.
17 Heyathumu bekayindvodzana yaLibi.
18 Libi bekayindvodzana yaKhishi.
19 Khishi bekayindvodzana yaKhoromu.
20 Khoromu bekayindvodzana yaLevi.
21 Levi bekayindvodzana yaKhimu.
22 Khimu bekayindvodzana yaMoriyanthoni.
23 Moriyanthoni bekawentalelwane yaRiplakhishi.
24 Riplakhishi bekayindvodzana yaShezi.
25 Shezi bekayindvodzana yaHethi.
26 Hethi bekayindvodzana yaKhomu.
27 Khomu bekayindvodzana yaKhoriyanthumu.
28 Khoriyanthumu bekayindvodzana ya-Emeri.
29 Emeri bekayindvodzana ya-Omeri.
30 Omeri bekayindvodzana yaShule.
31 Shule bekayindvodzana yaKhibi.
32 Khibi bekayindvodzana ya-Oriha, lobekayindvodzana yaJarede;
33 Loyo Jarede lowaphuma nemnakabo kanye nemindeni yabo, kanye nalabanye nemindeni yabo, embhoshongweni lomkhulu, ngesikhatsi iNkhosi iphambanisa lulwimi lwebantfu, futsi yafunga isentfukutselweni yayo kutsi bayawuhlakatwa emhlabeni wonkhe; futsi ngekwelivi leNkhosi labantfu bahlakatwa.
34 Umnakabo Jarede bekayindvodza lenkhulu nalenemandla, futsi bekayindvodza lebeyitsandvwa kakhulu yiNkhosi, Jarede, umnakabo, watsi kuye: Khala eNkhosini, kute ingasiphambanisi kutsi singawacondzi emavi etfu.
35 Futsi kwenteka kutsi umnakabo Jarede wakhala eNkhosini, iNkhosi yamhawukela Jarede; ngako-ke ayitange iluphambanise lulwimi lwaJarede; naJarede kanye nemnakabo abatange baphambaniswe.
36 Ngaleso sikhatsi Jarede watsi kumnakabo: Khala futsi eNkhosini, kute isuse intfukutselo yayo kulabo lababangani betfu, kute ingaluphambanisi lulwimi lwabo.
37 Futsi kwenteka kutsi umnakabo Jarede wakhala eNkhosini, iNkhosi yabahawukela labangani babo kanjalo nemindeni yabo, kangangoba nabo abaphambaniswanga.
38 Futsi kwenteka kutsi Jarede waphindza wakhuluma kumnakabo, watsi: Hamba uyawubuta eNkhosini kutsi ingabe itawusikhipha yini kulelive, uma itawusikhipha kulelive, khala kuyo kutsi siyawuya kuphi. Ngubani lowatiko kutsi kungenteka iNkhosi isitfwale isiyise eveni lelikhetsekile ngetulu kwawo onkhe emhlabeni na? Futsi uma kunjalo, asetsembeke eNkhosini, kute silitfole libe lifa letfu.
39 Futsi kwenteka kutsi umnakabo Jarede wakhala eNkhosini ngaloko lobekukhulunywe ngemlomo waJarede.
40 Futsi kwenteka kutsi iNkhosi yamuva umnakabo Jarede, yaba nesihawu, yatsi kuye:
41 Hamba ubutsele ndzawonye imihlambi yakho, lendvuna nalensikati, yalo lonkhe luhlobo; kanjalo nenhlanyelo yemhlaba yalo lonkhe luhlobo; nemindeni yenu, Jarede umnakenu kanye nemndeni wakhe; kanjalo nebangani bakho nemindeni yabo, kanye nebangani baJarede nemindeni yabo.
42 Uma sewukwentile loku uyawubahola wehle uye esigodzini lesingasenyakatfo. Ngitawuhlangana nawe lapho, ngitawuhamba phambi kwakho kuya eveni lelikhetsekile ngetulu kwawo onkhe emave emhlaba.
43 Lapho ngitawukubusisa kanye nentalelwane yakho, futsi ngitikhulisele intalelwaneni yakho, nentalelwaneni yemnakenu, kanye nalabo labayawuhamba nawe, sive lesikhulu. Akuyukuba khona nasinye lesiyawukuba sikhulu kunaleso sive lengiyawutikhulisela sona entalelwaneni yakho, emhlabeni wonkhe. Futsi ngitawukwenta kanjalo kuwe ngoba ukhalile kimi sonkhe lesikhatsi lesidze.