1 Futsi kwenteka kutsi Jarede nemnakabo, nemindeni yabo, kanjalo nebangani baJarede nemnakabo kanye nemindeni yabo, bahamba behlela esigodzini lesasingasenyakatfo, (ligama laleso sigodzi bekuyiNimrodi, sicanjwe ngemtingeli lomkhulu) nemihlambi yabo lebebayibutsele ndzawonye, lendvuna nalensikati, yalo lonkhe luhlobo

2 Baphindze babeka bosochaka babamba tinyoni telizulu; balungisa sitja, labatfwala ngaso tinhlanti temanti.

3 Baphindze betfwala idezurethi, lekutsi, nayihunyushwa ibitwa ngekutsi luju lwetinyosi, ngako-ke bebatfwele nelibulo letinyosi, kanye nato tonkhe tinhlobo taloko lokwakukhona eveni, tinhlanyelo talo lonkhe luhlobo.

4 Futsi kwenteka kutsi ngesikhatsi sebehlele entasi esigodzini saNimrodi iNkhosi yehla kutawukhuluma nemnakaboJarede; yayisefini, futsi umnakaboJarede akayibonanga.

5 Futsi kwenteka kutsi iNkhosi yabayaleta kutsi bahambe baye ehlane, yebo, kuleyoncenye lapho bekungakate kube khona umuntfu kuyo. Futsi kwenteka kutsi iNkhosi yahamba phambi kwabo, yakhuluma nabo ngesikhatsi ime efini, yabayaleta kutsi baye ngakuphi.

6 Futsi kwenteka kutsi bahamba ehlane, bakha tikebhe, labawela ngato emanti lamaningi, bayaletwa njalo sandla seNkhosi.

7 Futsi iNkhosi ayibavumelanga kutsi beme ngesheya kwelwandle ehlane, kodvwa yayifuna kutsi bahambe bate befike ngisho eveni lesetsembiso, lelalikhetsekile ngetulu kwawo onkhe lamanye emave, iNkhosi Nkulunkulu leyayililondvolotele bantfu labalungile.

8 Futsi yayifungile entfukutselweni yayo kumnakaboJarede, kutsi loyo lobekatawutfola lelive lesetsembiso, kusukela ngaleso sikhatsi kuya phambili futsi ingunaphakadze, kumele amkhonte, Nkulunkulu weliciniso nalokuphela kwakhe, noma basuswe baphele ngesikhatsi intfukutselo yayo lephelele ita kubo.

9 Manje, siyayibona imiyalo yaNkulunkulu mayelana nalelive, kutsi live lesetsembiso, futsi noma ngusiphi sive lesiyawulitfola siyawukhonta Nkulunkulu, noma siyawususwa siphele ngesikhatsi intfukutselo yayo lephelele ita kubo. Intfukutselo yayo lephelele ita kubo uma sebacocodzele ebubini.

10 Ngoba buka, leli live lelikhetsekile ngetulu kwawo onkhe lamanye emave, ngaloko-ke loyo lolitfolako uyawukhonta Nkulunkulu noma esuswe; ngoba lona ngumyalo waNkulunkulu waphakadze. Futsi loku angeke kwenteke kute kube khona bubi lobuphelele emkhatsini webantfwana balelive, kutsi basuswe.

11 Futsi loku kuta kini, Awu nine beTive, kute niyati imiyalo yaNkulunkulu—kute niphendvuke, ningabe nisachubeka ebubini benu bute bubi lobuphelele bufike, kute ningalwehliseli lulaka loluphelele lwaNkulunkulu etikwenu njengoba bantfu balelive bente njalo ngaphambilini.

12 Buka, leli live lelikhetsekile, futsi leso sive lesiyawulitfola siyawukhululeka ebugcilini, nasekutfunjweni, nakuto tonkhe tive letingephansi kwelizulu, uma nje bangamkhonta Nkulunkulu walelive, longuJesu Khristu, lobonakalisiwe ngaloko lesikubhalile.

13 Manje sengiyachubeka nembhalo wami, ngoba buka, kwenteka kutsi iNkhosi yamletsa Jarede nabomnakabo nakulolo lwandle lolukhulu lolwehlukanisa emave. Futsi ngesikhatsi befika elwandle bemisa emathende abo; bayibita lendzawo ngeligama lelitsi yiMoriyankhuma; bahlala emathendeni, bahlala emathendeni elugwini lwelwandle sikhatsi lesingangeminyaka lemine.

14 Futsi kwenteka kutsi ekupheleni kweminyaka lemine iNkhosi yaphindze yeta kumnakaboJarede, yema efini yakhuluma naye. INkhosi yakhuluma nemnakaboJarede sikhatsi lesingaba mahora lamatsatfu, yamtfobisa ngoba akakhumbulanga kubita libito leNkhosi.

15 Futsi umnakaboJarede waphendvuka kulobo bubi bekabentile, walibita libito leNkhosi entela bomnakabo labebanaye. INkhosi yatsi kuye: Ngitawukucolela wena kanye nabomnakenu etonweni tabo; kodvwa ningabe nisona nanini, ngoba niyawukhumbula kutsi Moya wami angeke uhlale kumuntfu njalo; ngaloko-ke, uma nitawukona nite nicocodzele ngalokuphelele nitawususwa phambi kweNkhosi. Futsi lena yimicabango yami ngelive lengiyawuninika lona kutsi libe lifa lenu; ngoba liyawuba live lelikhetsekile ngetulu kwawo onkhe lamanye emave.

16 Futsi iNkhosi yatsi: Hamba uyawusebenta wakhe tikebhe ngendlela lebewutakhe ngayo. Futsi kwenteka kutsi umnakaboJarede wahamba wayawusebenta, kanjalo nabomnakabo, bakha tikebhe ngendlela lebebatakhe ngayo, ngekwemiyalo yeNkhosi. Betitincane, futsi tilula etikwemanti, njengekubalula kwenyoni etikwemanti

17 Futsi betakhiwe ngendlela yekutsi beticine kakhulu, kangangoba betingabamba emanti njengesitja; ngaphansi kwato beticine njengesitja; emaceleni ato bekucine njengesitja; ticongo tato tatiphakeme; lingetulu lato belicine njengesitja; budze bato bebungangebudze besihlahla; umnyango wato, uma uvaliwe, wawucine njengesitja.

18 Futsi kwenteka kutsi umnakaboJarede wakhala eNkhosini, watsi: Awu Nkhosi, sengiwentile umsebenti longiyalete kutsi ngiwente, sengitentile tikebhe njengoba ungiyalile.

19 Futsi buka, Awu Nkhosi, kuto kute kukhanya; sitawugwedla siye ngakuphi? Ngetulu kwaloko sitawukufa, ngoba kuto angeke sikwati kuphefumula, ngaphandle kwalomoya lokuto; ngako-ke sitawukufa.

20 INkhosi yatsi kumnakaboJarede: Buka, yakha imbobo ngetulu, kanjalo nangephansi; futsi uma nidzinga umoya utawuvula lembobo bese nitfola umoya. Nangabe ningenelwa manti, buka, utawuyivala lembobo, kute ningafi etikhukhuleni.

21 Futsi kwenteka kutsi umnakaboJarede wenta njalo, njengoba iNkhosi beyimyaletile.

22 Waphindze wakhala eNkhosini watsi: Awu Nkhosi, buka sengente njengoba ungiyaletile; sengibalungiselele bantfu bami tikebhe, buka kute kukhanya kuto. Buka, Awu Nkhosi, utawusivumela kutsi siwele lamanti lamakhulu ebumnyameni na?

23 INkhosi yatsi kumnakaboJarede: Ufuna kutsi ngenteni kute nibe nekukhanya etikebheni tenu na? Ngoba buka, angeke nikwati kuba nemafasitelo, ngoba atawuphihlika abe ticucu; futsi angeke nihambe nemlilo, ngoba angeke nihambe ngekukhanya kwemlilo.

24 Ngoba buka, niyawuba njengemkhoma ekhatsi nelwandle; ngoba tintsaba temagagasi titawunishaya. Noko, ngitawuphindze nginikhiphe ekujuleni kwelwandle; ngoba imimoya ngiyitfumele, kanjalo ngitfumele netimvula kanye netikhukhula.

25 Futsi buka, ngiyanilungiselela kute nimelane naletintfo; ngoba angeke nikwati kuwela lamanti lamakhulu ngaphandle kwekutsi nginilungiselele kute nimelane nemagagasi elwandle, naleyo mimoya lengiyitfumele, kanye naleto tikhukhula letitawuta. Ngako-ke ufuna kutsi nginilungiseleleni kute nibe nekukhanya ngesikhatsi nigwinywa ekujuleni kwelwandle na?