Buku la Moroni
Mutu 1
Moroni alemba kuti ziwapindulire wa Alamani—Anefi amene sadzakana Khristu aphedwa. Mdzaka dza pafupifupi Yesu atabadwa 401–421.
1 Tsopano ine, Moroni, nditamaliza kufupikitsa nkhani ya anthu a Yaredi, sindidayenere kuti ndilembe zambiri, koma sindidawonongekebe; ndipo sindikuzidziwitsa ndekha kwa Alamani kuwopa kuti angandiwononge.
2 Pakuti taonani, nkhondo zawo ndi zowopsa kwambiri pakati pawo; ndipo chifukwa cha udani wawo iwo adapha Mnefi aliyense amene sadakane Khristu.
3 Ndipo ine, Moroni, sindikana Khristu; kotero, ndikumayendayenda kulikonse komwe ndingathe chifukwa cha chitetezo cha moyo wanga.
4 Kotero, ndikulemba zinthu zinanso zingapo, zosiyana ndi zomwe ndimaganiza; pakuti sindidayenere kulembanso; koma ndilemba zinthu zinanso zingapo, kuti mwina zingathe kukhala zofunikira kwa abale anga, Alamani, m’tsiku lina lamtsogolo, molingana ndi chifuniro cha Ambuye.