1 Na em i kamap we mipela i stat gen long kirapim kingdom na mipela i stat gen long kisim graun wantaim bel isi. Na mi bin tokim ol pipol bilong mi long wokim ol samting bilong pait, inap long mi bai gat ol samting bilong pait long ol pipol bilong mi taim ol lain bilong Leman ol i kam gen long pait wantaim ol pipol bilong mi.

2 Na mi bin putim ol wasman raun long graun, olsem ol lain bilong Leman bai i no inap kirapim pait wantaim mipela gen na bagarapim mipela taim mipela i no redi, olsem na, mi bin sambai long ol pipol bilong mi wantaim ol sipsip bilong ol olsem ol bai i no inap pundaun long han bilong birua bilong mipela.

3 Na em i kamap we mipela i bin kisim graun bilong ol tumbuna papa bilong mipela long mipela yet long planti krismas, ye, long tupela ten tu krismas.

4 Na mi bin tokim ol man mas dikim graun, na planim olgeta kainkain rais nabaut na olgeta kainkain prut.

5 Na mi bin tokim ol meri long wokim klos, na wok, na wokim olgeta kainkain naispela klos, ye, na olgeta kain kain klos, inap long mipela bai pasim as nating bilong mipela, olsem na sindaun bilong mipela i bin kamap gutpela long graun inap long mipela i bin i stap wantaim bel isi olgeta taim long tupela ten tu krismas.

6 Na em i kamap we king Leman idai, na pikinini man bilong em i stat long rul long ples bilong em. Na em i stat long tanim bel long ol pipol bilong em long sakim tok long ol pipol bilong mi, olsem na ol i stat long redi long kirapim bikpela pait, na kam long pait wantaim ol pipol bilong mi.

7 Tasol mi bin salim ol man bilong lukluk stil bilong mi long go raun long graun bilong Semlon, olsem mi bai save long ol lain bilong Leman redi long pait, olsem mi bai sambai long ol inap long ol i no ken kirapim pait wantaim ol pipol bilong mi na bagarapim ol.

8 Na em i kamap we ol i bin kam long hap bilong not long graun bilong Sailom, na ol lain i planti tru, wantaim banara na spia bilong banara, na naip bilong pait, na huknaip, na ston, na sling, na ol i bin sapim het bilong ol inap long kamap kela stret, na ol i bin pasim as tanget wantaim skin bilong enimol.

9 Na em i kamap we mi bin tokim ol meri na ol pikinini bilong ol pipol bilong mi long hait long ples we nogat man i stap, na tu mi bin tokim olsem olgeta lapun man bilong mi em ol ken pait, na tu olgeta yangpela man bilong mi ol i ken pait long bung ol yet long go long pait wantaim ol lain bilong Leman, na mi putim ol long krismas bilong ol, wan wan man long krismas bilong em yet.

10 Na em i kamap we mipela i bin go long pait wantaim ol lain bilong Leman, na mi, tru tumas, mi bin kamap lapun pinis tasol mi go antap long pait wantaim ol lain bilong Leman. Na em i kamap we mipela i bin go antap long strong bilong Bikpela long pait.

11 Nau, ol lain bilong Leman i no save long Bikpela, o strong bilong Bikpela, olsem na ol i bin sanap long strong bilong ol yet. Tasol ol i wanpela strongpela pipol, olsem long strong bilong ol man.

12 Ol lain i wanpela wail pipol, nogut tru na wanpela pipol em ol i nek drai long blut, na bilip long pasin bilong ol tumbuna papa bilong ol, ol i olsem—Ol i bilip olsem ol i bin rausim ol long graun bilong Jerusalem bikos long pasin nogut bilong ol tumbuna papa bilong ol, na olsem ol brata bilong ol i bin rongim ol long ples we nogat man i stap, na tu ol i bin rongim ol taim ol i brukim sol wara long kam long graun Bikpela i bin promisim ol.

13 Na tu, ol i bin rongim ol taim ol i stap long nambawan graun bilong ol bihain long ol i bin brukim solwara i kam, na olgeta long dispela samting bin kamap bikos Nifai i strong yet long bilip long bihainim ol lo bilong Bikpela—Olsem na Bikpela i bin blesim em, long wanem, Bikpela i bin harim beten bilong em na bekim ol, na Nifai i bin lidim wokabaut bilong ol long ples we nogat man i stap.

14 Na ol brata bilong em i bin belhat long em bikos ol i no bin save long pasin bilong Bikpela, ol tu i bin belhat long em namel long solwara bikos ol i bin kamapim belhat bilong ol long Bikpela.

15 Na gen, ol i bin belhat long em taim ol i kam long graun bilong promis, bikos ol i tok Nifai i bin kisim rait bilong ol long bosim ol pipol long han bilong ol, na ol i bin traim long kilim em.

16 Na gen, ol i bin belhat long em bikos em i bin go long ples we nogat man istap olsem Bikpela i bin tokim em, na kisim ol rekot ol i bin katim na raitim long ol plet bras, long wanem, ol i tok olsem Nifai i bin stilim ol plet bras long ol.

17 Olsem na, ol lain bilong Leman i bin lainim ol pikinini bilong ol olsem ol i mas koros long ol lain pikinini bilong Nifai, na olsem ol i mas kilim ol, na olsem ol i mas stil na wokim pasin strong long stil long ol, na painim olgeta kain kain rot long bagarapim ol, olsem na, ol lain pikinini bilong Leman ol i bin gat belhat oltaim oltaim wantaim ol lain pikinini bilong Nifai.

18 Bikos long dispela as king Leman i bin smat long yusim giaman pasin na mekim giaman promis long paulim mi, olsem na mi bin bringim ol pipol bilong mi kam antap long dispela graun, inap long ol bai bagarapim ol pipol bilong mi, ye, na mipela bin i stap wantaim pen long planti krismas long dispela graun.

19 Na nau mi, Jenif, bihain long mi autim olgeta samting long ol pipol bilong mi long ol lain bilong Leman, mi sutim bel bilong ol long go long pait wantaim olgeta strong bilong ol na putim bilip bilong ol long Bikpela, olsem na, mipela i bin go het long pait wantaim ol.

20 Na em i kamap we mipela i bin ronim ol go aut gen long graun bilong mipela, na mipela i bin kilim ol nogut tru, tru tumas planti tru na mipela i no bin kaunim ol.

21 Na em i kamap we mipela i bin go bek gen long graun bilong mipela yet, na ol pipol bilong mi i stat gen long lukautim sipsip bilong ol, na long dikim graun bilong ol.

22 Na nau, bikos mi kamap lapun pinis, mi bin givim kingdom long wanpela long ol pikinini man bilong mi, olsem na, mi no toktok moa. Na inap Bikpela blesim ol pipol bilong mi. Amen.