1 Nau em i kamap we planti niupela jeneresen ol i no save gut long ol toktok bilong king Benjamin, bikos ol i bin i stap liklik ol pikinini taim em i bin toktok long ol pipol bilong em, olsem na ol i no bilip long pasin bilong ol tumbuna papa bilong ol.

2 Ol i no bilip long wanem em i bin toktok long kirap gen bilong idai manmeri, na tu ol i no bilip olsem Krais bai kam.

3 Na nau bikos ol i no bilip olsem na ol i no save long toktok bilong God, na i bel bilong ol i bin kamap strong tru.

4 Na ol les long kisim baptisim, na tu ol les long kamap memba long sios. Na ol i bin kamap narapela kain pipol olsem long bilip bilong ol, na ol i bin i stap olsem yet, tru tumas long bihainim laik bilong skin na i stap long laip bilong sin, long wanem, ol i bin les long beten long Bikpela God bilong ol.

5 Na nau ol i no planti tumas olsem long ol pipol bilong God taim Mosaia i rul, tasol bikos ol memba bilong sios ol i bin tok pait na bruknabaut namel long ol yet olsem na ol kamap planti tru.

6 Long wanem, em i kamap we ol i bin giamanim planti memba bilong sios na sutim bel bilong ol, na mekim ol long sin nogut tru, olsem na i gat as long sios long strongim gutpela toktok long ol memba bilong sios ol i sin.

7 Na em i kamap we ol tisa ol i bin kisim ol i kam long ol pris, na ol pris ol i bin kisim ol kam long Alma, em i hai pris.

8 Nau king Mosaia i bin givim atoroti bilong sios long Alma.

9 Na em i kamap we Alma i no bin save long pasin sin bilong ol, tasol planti witnes ol i bin kamap long pasin sin bilong ol, ye, planti pipol ol i bin sanap na tokaut long sin bilong ol.

10 Nau nogat wanpela samting kain olsem i bin kamap long sios bipo, olsem na Alma i bin trabel insait long spirit bilong em, na em i tokim ol pris long kisim ol lain i go long king.

11 Na em i tokim king: Lukim, mipela i kisim kam long yu planti lain em ol brata bilong ol bin kotim ol, na ol i bin kisim ol long taim ol i bin wokim planti pasin nogut. Na ol i no tanim bel long pasin nogut bilong ol, olsem na mipela i kisim ol i kam long yu, olsem yu bai jasim ol long rong bilong ol.

12 Tasol king Mosaia i bin tokim Alma: Lukim, mi no inap jasim ol, olsem na, mi givim ol long han bilong yupela long jasim ol.

13 Na nau spirit bilong Alma i trabel gen, na em i bin go na askim Bikpela wanem em mas wokim long dispela samting, long wanem, em poret olsem em bai wokim rong long ai bilong God.

14 Na em i kamap we bihain em kapsaitim olgeta sol bilong em long God, nek bilong Bikpela i bin kam long em, olsem:

15 Mi blesim yu, Alma, na mi blesim ol lain ol i bin baptais long wara Momon. Mi blesim yu bikos long strongpela bilip tru bilong yu long ol toktok bilong wokman bilong mi Abinadai.

16 Na mi blesim ol lain bikos long strongpela bilip tru bilong ol long ol toktok yu bin autim long ol.

17 Na mi blesim yu bikos yu bin kirapim wanpela sios namel long dispela pipol, na ol bai kamap strong, na ol bai kamap ol pipol bilong mi.

18 Ye, mi blesim dispela pipol husat ol i gat laik long kisim nem bilong mi, long wanem, ol bai singaut long nem bilong mi, na ol lain em ol pipol bilong mi.

19 Na bikos yu bin askim mi long save long wanem yu bai wokim long man em i brukim lo, mi bai blesim yu.

20 Yu em wokman bilong mi, na mi wokim promis long yu olsem yu bai kisim laip oltaim oltaim, na yu bai wok long mi na go het long nem bilong mi, na bai bungim wantaim ol sipsip bilong mi.

21 Na man em i harim nek bilong mi bai kamap sipsip bilong mi, na yu bai kisim em long kamap memba bilong sios, na mi tu bai kisim em.

22 Long wanem, lukim, dispela em i sios bilong mi, husat man em i baptais bai baptais long tanim bel. Na husat man yu kisim em bai bilip long nem bilong mi, na mi bai pogivim em olgeta.

23 Long wanem, em mi yet bai kisim antap long mi ol sin bilong graun, long wanem em mi yet i bin wokim olgeta pipol long graun, na em mi yet givim long man husat bilip i go yet long arere wanpela ples long rait han bilong mi.

24 Long wanem, lukim, ol i bin singaut long nem bilong mi, na sapos ol i save long mi ol bai kamaut, na kisim wanpela ples oltaim oltaim long rait han bilong mi.

25 Na em bai kamap we taim ensel winim biugel long namba tu taim, ol lain ol i no save long mi bipo bai kamaut na sanap long pes bilong mi.

26 Na bihain long dispela, ol bai save olsem mi em Bikpela God bilong ol, olsem mi em Ridima bilong ol, tasol ol i les long mi long kisim bek ol.

27 Na bihain long dispela, mi bai konpes long ol olsem mi no save long ol, na ol bai go long paia oltaim oltaim i bin redim long tewel wantaim ol ensel bilong em.

28 Olsem na mi tokim yu, olsem yu bai i no inap kaunim man em i no harim nek bilong mi long kamap memba long sios bilong mi, bikos mi bai i no inap kaunim em long las de.

29 Olsem na mi tokim yu, Go, na jasim man em i brukim lo bilong mi long sin em i bin wokim, na sapos dispela man i konpesim sin bilong em long yu na long mi, na tanim bel wantaim olgeta bel bilong em, yu bai pogivim em na mi tu bai pogivim em.

30 Ye, na sapos ol pipol bilong mi tanim bel olgeta taim, mi bai pogivim ol long pasin brukim lo bilong mi.

31 Na tu yupela bai pogivim ol rong bilong yupela namel long yupela yet, long wanem, tru tumas mi tokim yu, man em i no pogivim rong long poroman bilong em taim em i tok sore, long em, dispela man bai i gat kot.

32 Nau mi tokim yu, Go, na man em i no tanim bel long sin bilong em bai i no inap kaunim wantaim ol pipol bilong mi, na sios bilong mi bai wokim dispela long dispela taim i go het.

33 Na em i kamap we taim Alma harim ol dispela toktok, em i raitim olsem em bai yusim ol, na olsem em bai jasim ol pipol bilong sios Olsem long ol lo bilong God.

34 Na em i kamap we Alma i bin go na jasim ol pipol ol i bin kisim long taim ol i bin sin olsem Bikpela i bin tok.

35 Na Alma i bin kaunim ol wantaim ol pipol bilong sios ol man ol i bin tanim bel na konpesim sin bilong ol.

36 Na ol lain ol i no konpesim sin bilong ol na tanim bel long pasin nogut bilong ol, ol i no bin kaunim ol wantaim ol pipol bilong sios, tasol nem bilong ol ol i bin rausim.

37 Na em i kamap we Alma i bin ronim olgeta wok bilong sios, na ol i stat gen long kirapim bel isi na wok bilong sios i kamap gutpela tru, na ol i bin wokabaut wantaim ona long ai bilong God, na winim planti lain na baptaisim planti lain.

38 Na nau Alma wantaim ol wanwok bilong em ol i lukautim sios ol i bin wokim olgeta dispela samting, ol i bin strong long wokabaut, long lainim toktok bilong God long olgeta samting, ol i bin kisim olgeta kainkain pen, na ol i bin pesim pesekiusen long ol lain ol i no memba long sios bilong God.

39 Na ol i bin strongim gutpela toktok long ol lain brata bilong ol, na long ol memba bilong sios, wanwan manmeri long toktok bilong God, olsem long sin bilong ol, o long sin ol i bin wokim, olsem long toktok bilong God long beten olgeta taim, na givim tok-tenkyu long em olgeta samting.