1 Na em i kamap we Amulon i bin winim bel long king long ol lain bilong Leman, olsem na, king long ol lain bilong Leman ol i bin makim em wantaim ol lain brata bilong em long kamap tisa long ol pipol bilong em, ye, tru tumas long ol pipol ol i stap long graun bilong Semlon, na long graun bilong Sailom, na long graun bilong Amulon.

2 Long wanem, ol lain bilong Leman ol i bin kisim olgeta long dispela graun, olsem na, king long ol lain bilong Leman i bin makim ol king long wan wan graun.

3 Na nau nem bilong king long ol lain bilong Leman em i Leman, em i bin wan nem long papa bilong em, olsem na ol i bin kolim em king Leman. Na em i bin kamap king long ol pipol em ol i planti tumas.

4 Na em i bin makim ol lain brata bilong Amulon long kamap tisa long olgeta graun we ol pipol bilong em ol i stap, olsem na ol i bin lainim tok ples bilong Nifai namel long olgeta pipol long ol lain bilong Leman.

5 Na ol i bin kamap wanpela gutpela pipol na ol i poroman gut tru namel long ol yet, tasol ol i no bin save long God, bikos ol lain brata bilong Amulon ol i no lainim ol wanpela samting long Bikpela, God bilong ol, o long lo bilong Moses, o long ol toktok bilong Abinadai.

6 Tasol ol i bin lainim ol olsem ol i mas lukautim rekot bilong ol, na olsem ol mas raitim pas namel long ol yet.

7 Olsem na ol lain bilong Leman i stat long kamap ol man bilong planti dispela samting, na ol i stat long salim na baim samting namel long ol yet na kamap bikman, na ol i stat long kamap wanpela smatpela pipol ol i gat bikpela save, olsem long bikpela save bilong graun, ye, wanpela smatpela pipol tru, ol i amamas long olgeta kainkain pasin nogut na stil pasin, tasol ol i no bin wokim pasin nogut na stil pasin namel long ol lain brata bilong ol yet.

8 Na nau em i kamap we Amulon i stat long bosim Alma wantaim ol lain brata bilong em, na i stat long pesekiutim em, na mekim olsem ol pikinini bilong em mas pesekiutim ol pikinini bilong ol.

9 Long wanem, Amulon i bin save long Alma, olsem em wanpela long ol pris bilong king, na olsem em tasol i bin bilip long ol toktok bilong Abinadai na ol i bin ronim em i go aut long pes bilong king, olsem na Amulon i bin belhat long em, long wanem, Amulon i stap aninit long pawa bilong king Leman, tasol em i bin bosim Alma wantaim ol lain brata bilong em, na putim planti hevi samting antap long ol, na putim ol bosman long lukautim ol.

10 Na em i kamap we pen bilong ol i bin kamap nogut tru olsem na ol i stat long krai nogut tru long God.

11 Na Amulon i bin givim lo long ol olsem ol i mas pinis long krai bilong ol, na em putim ol wasman long lukaut long ol, olsem sapos husat manmeri ol i painim ol beten long God ol i mas idai.

12 Na Alma wantaim ol pipol bilong em i no apim nek bilong ol long Bikpela God bilong ol, tasol ol i bin beten long em insait long bel bilong ol, na Bikpela God bilong ol i bin save long ol tingting long bel bilong ol.

13 Na em i kamap we nek bilong Bikpela i bin kam long ol long taim long pen bilong ol, olsem: Apim het bilong yupela na amamas, long wanem, mi save long promis yupela i bin wokim wantaim mi, na mi bai wokim promis wantaim ol pipol bilong mi na rausim ol long kalabus.

14 Na tu mi bai slekim ol hevi ol i bin putim antap long solda bilong yupela, inap long yupela bai i no inap pilim ol hevi i stap long baksait bilong yupela, tru tumas long taim yupela i stap long kalabus, na mi bai wokim dispela olsem yupela bai sanap olsem witnes bilong mi bihain long dispela taim, na olsem yupela bai save tru tru olsem, mi, God Bikpela, save visitim ol pipol bilong mi long taim long pen bilong ol.

15 Na nau em i kamap we ol hevi ol i bin putim antap long Alma wantaim ol lain brata bilong em i bin kamap isi, ye, Bikpela i bin givim strong long ol inap long ol i karim hevi bilong ol isi tru, na ol bin givim ol yet wantaim amamas na ol i bin i stap strong long wokim olgeta laik bilong Bikpela.

16 Na em i kamap we bilip bilong ol long i stap strong i bin bikpela tru inap long nek bilong Bikpela i bin kam gen long ol, olsem: Amamas, long wanem, mi bai rausim yupela long kalabus tumora.

17 Na em i tokim Alma: Yu bai go pas long ol dispela pipol, na mi bai go wantaim yu na rausim ol dispela pipol long kalabus.

18 Nau em i kamap we Alma wantaim ol pipol bilong em ol i bin bungim wantaim ol sipsip na bulmakau bilong ol long nait, na tu ol raisnabaut bilong ol, ye, tru tumas, long nait taim tasol ol i bungim wantaim ol sipsip, na ol bulmakau na ol meme bilong ol.

19 Na Bikpela i bin mekim ol lain bilong Leman long silip idai long monin, ye, na olgeta bosman bilong ol i bin silip idai nogut tru.

20 Na Alma wantaim ol pipol bilong em ol i bin go long ples we nogat man i stap, na taim ol i wokabaut long wanpela de ol sanapim haus sel bilong ol long wanpela ples daun, na ol i kolim dispela ples daun Alma, bikos em i bin lidim ol go long ples we nogat man i stap.

21 Ye, na ol i bin givim tok-tenkyu long God long ples daun bilong Alma bikos em i bin marimari long ol, na mekim isi long ol hevi bilong ol, na rausim ol long kalabus, long wanem, ol i bin i stap long kalabus, na nogat wanpela man inap long rausim ol, tasol em Bikpela God bilong ol yet.

22 Na ol i bin givim tok-tenkyu long God, ye, olgeta man bilong ol na olgeta meri bilong ol na olgeta pikinini bilong ol husat ken toktok bin apim nek bilong ol long amamasim God bilong ol.

23 Na nau Bikpela i bin tokim Alma: Hariap na yu wantaim dispela pipol mas lusim dispela graun, bikos ol lain bilong Leman ol i kirap na bihainim yupela, olsem na yupela mas lusim dispela graun, na mi bai pasim ol lain bilong Leman long dispela ples daun inap long ol bai i no inap moa bihainim ol dispela pipol.

24 Na em i kamap we ol i lusim dispela ples daun, na wokabaut i go long ples we nogat man i stap.

25 Na bihain ol i wokabaut long ples we nogat man i stap long tupela ten tu de, ol i kam long graun bilong Jarahemla, na king Mosaia i bin amamas long kisim ol tu.