1 Na nau, em i kamap we Jenif i bin givim kingdom long Noa, wanpela long ol pikinini man bilong em, olsem na Noa i stat long rul long ples bilong em, na em i no bihainim pasin bilong papa bilong em.

2 Long wanem, lukim, em i no bihainim ol lo bilong God, tasol em i bin bihainim laik bilong bel bilong em. Na em i bin maritim planti meri na ol narapela lain meri. Na em i bin lidim ol pipol bilong em long wokim sin, na long wokim ol samting i les nogut tru long ai bilong Bikpela. Ye, na ol i bin wokim pasin pamuk na wokim olgeta kain kain pasin nogut.

3 Na em i bin kisim takis long 20 pesen long olgeta samting ol pipol i bin gat, 20 pesen long gol na long silva bilong ol, na 20 pesen long jif na long kopa bilong ol, na bras bilong ol na ain bilong ol, na 20 pesen long ol yangpela patpela enimol bilong ol, na tu 20 pesen long olgeta rais nabaut bilong ol.

4 Na em i bin kisim olgeta samting long lukautim em yet wantaim ol meri na ol narapela lain meri bilong em, na tu ol pris bilong em wantaim ol meri na ol narapela lain meri bilong ol, olsem na em i bin sanisim olgeta wok bilong sindaun insait long kingdom bilong em.

5 Long wanem, em i bin rausim olgeta pris papa bilong em i bin makim, na makim ol niupela niupela long ples bilong ol, ol i bin apim bel bilong ol long hambak.

6 Ye, olsem na takis bilong ol pipol i bin lukautim ol long pasin les bilong ol, na long lotuim god-giaman bilong ol, na long pasin pamuk bilong ol, olsem na, ol pipol i bin wok hat nogut tru long lukautim pasin nogut bilong ol.

7 Ye, na tu ol pipol bilong king Noa i bin kamap ol lain bilong lotuim god-giaman, bikos king wantaim ol pris bilong em i bin paulim ol wantaim ol ai gris tok tok nating, long wanem, ol i bin autim long ol ai gris samting long ol.

8 Na em i kamap we king Noa i bin wokim planti naispela haus gat planti rum, na em i bin bilasim ol wantaim naispela tru hanmak long diwai, na long olgeta kainkain ol samting i dia tumas, long gol, na long silva, na long ain, na long bras, na long jif, na long kopa,

9 Na tu em i bin wokim long em yet wanpela haus bilong king gat planti rum, na wanpela sia bilong king namel long em, olgeta long ol i bin wokim wantaim naispela diwai tru na bilasim wantaim gol na silva na wantaim ol samting i dia tumas.

10 Na tu em i bin tokim ol wokman bilong em long wokim olgeta kain kain naispela wok insait long ol banis bilong tempel wantaim naispela diwai, na kopa na bras.

11 Na ol sia bilong ol hai pris i bin sanapim antap tru long olgeta narapela sia, em i bin bilasim wantaim trutru gol, na em i bin wokim wanpela broswok na em i wokim bipo long ol sia bilong hai pris, olsem ol hai pris bai putim bodi na han bilong ol antap long ol taim ol i autim ol giaman toktok nating long ol pipol bilong em.

12 Na em i kamap we em i bin wokim wanpela taua klostu long tempel, ye, wanpela longpela taua, tru tumas dispela taua i longpela tumas inap long king Noa ken sanap antap long em na lukim graun bilong Sailom, na tu graun bilong Semlon em ol lain bilong Leman i bin kisim, na inap em ken lukim olgeta graun raun nabaut long graun bilong Sailom na graun bilong Semlon.

13 Na em i kamap we em i bin tokim ol pipol long wokim planti haus long graun bilong Sailom, na em i bin tokim ol pipol long wokim wanpela traipela taua tru long liklik maunten long hap bilong not long graun bilong Sailom, na dispela taua i bin kamap wanpela ples hait bilong ol lain pikinini bilong Nifai long taim ol i bin ronawe long graun, olsem na, king Noa i bin wokim wanem samting em laikim wantaim ol moni samting em i bin kisim wantaim takis long ol pipol bilong em.

14 Na em i kamap we em i bin putim bel bilong em long ol moni samting bilong em, na em i bin yusim taim bilong em long bihainim laip bilong sin wantaim ol meri na ol narapela men, bilong em, na ol pris bilong em ol i bin wokim wankain long yusim taim bilong ol wantaim ol pamuk meri.

15 Na em i kamap we em i bin planim planti gaden bilong ropwain raun nabaut long graun, na em i bin wokim planti masin bilong mekim wain, na em i bin mekim planti wain, olsem na em i bin kamap wanpela man bilong spak, na ol pipol bilong em bin kamap wankain.

16 Na em i kamap we ol lain bilong Leman i stat long kirapim pait wantaim pipol bilong em, na ol i bin kam long liklik namba long kilim ol long gaden bilong ol, long taim ol i bin lukautim ol sipsip bilong ol.

17 Na king Noa i bin salim ol wasman raun nabaut long graun long pasim ol long kam, tasol em i no salim planti wasman, olsem na ol lain bilong Leman i bin kamap long ol na kilim ol, na ronim planti sipsip bilong ol i go aut long graun, olsem na, ol lain bilong Leman i stat long bagarapim ol, na koros long ol.

18 Na em i kamap we king Noa i bin salim ol ami bilong em long pait wantaim ol, na ol i bin ronim ol bek, o ol bin ronim ol bek long liklik taim, olsem na, ol i bin amamas long go bek wantaim ol samting ol i bin kisim.

19 Na nau, bikos ol ami bilong king Noa i bin winim dispela pait, ol i bin apim ol yet, na ol bin apim strong bilong ol yet, na tok olsem faipela ten man bilong ol ken winim ol tausen man long ol lain bilong Leman, na ol i bin apim ol yet olsem, na amamas long blut, na kapsaitim blut bilong ol lain brata bilong ol, na dispela bikos long pasin nogut bilong king bilong ol wantaim ol pris.

20 Na em i kamap we wanpela man namel long ol, nem bilong em Abinadai, i bin go het namel long ol, na i stat long profesai, olsem: Lukim, olsem Bikpela i tok, na olsem em i bin tokim mi, olsem, go het, na tokim dispela pipol, olsem Bikpela tok—Wo bai kamap long dispela pipol, long wanem, mi bin lukim ol pasin les nogut tru bilong ol, na pasin nogut bilong ol, na pasin pamuk bilong ol, na sapos ol i no tanim bel, mi bai visitim ol long belhat bilong mi.

21 Na sapos ol no tanim bel na tanim long Bikpela God bilong ol, mi bai givim ol i go long han bilong birua bilong ol, ye, na ol bai kisim ol go long kalabus, na ol bai kisim pen long han bilong ol birua bilong ol.

22 Na em bai kamap we ol bai save olsem mi em Bikpela God bilong ol, na mi em God bilong belhat, na visitim pasin nogut bilong ol pipol bilong mi.

23 Na em bai kamap we sapos ol dispela pipol i no tanim bel na tanim long Bikpela God bilong ol, ol bai go long kalabus, na nogat wanpela man ken seivim ol, tasol Bikpela God gat Olgeta Pawa bai seivim ol.

24 Ye, na em bai kamap we taim ol krai long mi, mi bai i no inap harim long krai bilong ol hariap tru, ye, na mi bai larim birua bilong ol long paitim ol.

25 Na sapos ol lain i no tanim bel long pasim kros bilong sore na putim sit bilong paia bilong sore, na beten nogut tru long Bikpela, God bilong ol, mi bai i no inap harim ol beten bilong ol, na tu mi bai i no inap seivim ol long pen bilong ol, olsem Bikpela i tok, na olsem em i bin tokim mi.

26 Nau em i kamap we taim Abinadai autim ol dispela toktok long ol, ol i bin belhat long em, na ol i bin laikim long kilim em, tasol Bikpela i bin seivim em long han bilong ol.

27 Nau taim king Noa harim ol toktok Abinadai i bin autim long ol pipol, em tu i bin belhat, na tok: Husat i Abinadai, olsem em bai jasim mi wantaim ol pipol bilong mi, o husat i Bikpela, olsem em bai bringim bikpela pen long ol pipol bilong mi?

28 Mi tokim yupela long bringim Abinadai long mi, olsem mi bai kilim em, long wanem, em bin autim ol dispela samting olsem em bai tanim bel bilong ol pipol bilong mi long belhat namel long ol yet, na kirapim tok pait namel long ol pipol bilong mi, olsem na mi bai kilim em.

29 Nau ai bilong ol pipol i bin pas, olsem na, ol i bin kamapim belhat bilong ol long ol toktok bilong Abinadai, na ol i bin traim long kisim em long dispela taim i go het. Na king Noa i bin kamapim belhat bilong em long toktok bilong Bikpela, na em i no tanim bel long ol pasin nogut bilong em.