1 Nau em i kamap we bihain ol pikinini man bilong Mosaia wokim olgeta long dispela samting, ol kisim liklik namba long ol man wantaim ol na go bek long papa bilong ol, em i king, na laikim olsem em bai tok orait long ol olsem ol wantaim ol lain em ol i bin makim, bai ol i go antap long graun bilong Nifai olsem ol bai autim ol samting ol i bin harim, na olsem ol bai autim toktok bilong God long ol lain brata bilong ol, em ol lain bilong Leman—

2 Olsem inap ol bai bringim ol i kam long save long Bikpela God bilong ol, na winim bel bilong ol long bilip bilong ol long pasin nogut bilong ol tumbuna papa bilong ol, na olsem inap ol bai lusim belhat bilong ol long ol lain bilong Nifai, olsem ol tu bai kisim ol i kam long amamas long Bikpela God bilong ol, olsem ol lain bilong Nifai wantaim ol lain bilong Leman bai poroman namel long ol yet, na olsem i no gat moa pait bai kamap long olgeta hap graun em Bikpela God bilong ol i bin givim long ol.

3 Nau ol i bin laikim olsem ol wokman bilong God mas autim toktok long selvesen bilong olgeta manmeri, long wanem, ol i no laikim olsem wanpela sol bilong man bai idai, ye, tru tumas ol i bin guria na seksek taim ol i tingim olsem wanpela sol em bai i stap long laip bilong pen i nogat arere.

4 Olsem na, Spirit bilong Bikpela i bin wok long ol, long wanem, ol i bin ol lain long wokim pasin nogut stret. Na Bikpela i bin ting orait long marimari i nogat arere bilong em long larim ol i stap, tasol ol i bin kisim bikpela pen tru long sol bilong ol, bikos long pasin nogut bilong ol, na ol i bin kisim bikpela pen tru na poret olsem ol bai rausim ol i go ausait oltaim oltaim.

5 Na em i kamap we ol i bin strongim gutpela toktok long papa bilong ol long planti de olsem ol bai go antap long graun bilong Nifai.

6 Na king Mosaia i bin go na askim Bikpela olsem em bai larim ol pikinini man bilong em long go namel long ol lain bilong Leman long autim toktok.

7 Na Bikpela i bin tokim Mosaia olsem: Larim ol i go antap, bikos planti long ol lain bilong Leman ol bai bilip long toktok bilong ol, na ol bai kisim laip oltaim oltaim, na mi bai seivim ol pikinini man bilong yu long han bilong ol lain bilong Leman.

8 Na em i kamap we Mosaia i bin tok orait olsem ol bai go na wokim laik bilong ol.

9 Na ol i bin wokabaut long ples we nogat man i stap i go long autim toktok namel long ol lain bilong Leman, na mi bai raitim stori long wok bilong ol long bihain taim.

10 Nau king Mosaia i nogat wanpela pikinini man long givim kingdom bilong em, long wanem, nogat wanpela long ol pikinini man bilong em ol i laikim long kisim kingdom.

11 Olsem na em i kisim ol rekot ol i bin katim na raitim long ol bras plet, na tu ol plet bilong Nifai, wantaim olgeta samting em i bin kipim na lukautim i stap long bihainim ol lo bilong God, bihain long em bin tanim tok na em i bin raitim ol rekot i stap long ol gol plet ol pipol bilong Limhai i bin painim, Limhai em yet i bin givim long em.

12 Na em i bin tanim tok long ol rekot i stap long gol plet em ol pipol bilong Limhai i bin painim, bikos ol pipol bilong em i bin sikarap nogut tru na laikim tumas long save long ol dispela lain ol i bin kisim bagarap olgeta.

13 Na nau em i bin tanim tok long ol gol plet wantaim ol tupela ston em i bin pasim long ol tupela sait long banara.

14 Nau Bikpela i bin redim ol dispela samting long i stat tru, na givim i go daun long wanpela jeneresen i go long narapela jeneresen, as tingting bilong em, em long tanim tok bilong ol tok ples.

15 Na Bikpela i bin kipim na lukautim i stap wantaim han bilong em, olsem em bai soim long olgeta manmeri em ol i bin kisim dispela graun long ol pasin nogut na ol pasin les nogut tru long ol pipol bilong em.

16 Na husat man em i kisim ol dispela tupela ston em ol i kolim em glasman, wankain olsem ol pipol long taim bipo.

17 Nau bihain long Mosaia pinis long tanim tok long ol dispela rekot, lukim, em i bin givim stori long ol pipol ol i bin bagarap long taim bipo, taim ol i wokim bikpela longpela taua i go long heven, na Bikpela i bin paulim tok ples bilong ol pipol long dispela taim na rausim ol i go nabaut long olgeta hap long graun, ye, em i bin givim stori long dispela taim i go bek long taim Bikpela i bin krietim Adam.

18 Nau dispela stori i bin mekim ol pipol bilong Mosaia long sore nogut tru, ye, ol i bin sore, tasol em i bin givim ol bikpela save we ol i bin amamas.

19 Na dispela stori em bai mi raitim bihain liklik long dispela stori, long wanem, lukim, em i bikpela samting olsem olgeta pipol bai ol i save long ol samting ol i bin raitim insait long dispela stori.

20 Na nau, olsem mi bin tokim yupela, bihain long king Mosaia i wokim ol dispela samting, em i kisim ol bras plet wantaim olgeta samting em i bin lukautim, na givim long Alma, em i pikinini man bilong Alma, ye, olgeta rekot wantaim ol samting bilong tanim tok, em i bin givim long Alma, na tokim em olsem em i mas kipim na lukautim i stap, na tu raitim ol rekot bilong pipol, na givim i go daun long wanpela jeneresen i go long narapela jeneresen, wankain olsem ol i bin wokim long taim Lihai i bin lusim Jerusalem.