1 Na nau, em i kamap we bihain long Abinadai autim ol dispela toktok, em taitim han bilong em na tok: Taim bai kam we olgeta manmeri bai lukim selvesen bilong Bikpela, we olgeta kantri, hauslain, tok ples, na pipol bai lukim ai bilong em wantaim ai bilong ol stret na tok aut stret long pes bilong God olsem ol jasmen bilong em i stret.

2 Na bihain long dispela, Bikpela bai rausim ol i go ausait ol lain nogut, na ol bai gat as long singaut long pen na krai, na sapim tit bilong ol long pen, na dispela bikos ol i no harim nek bilong Bikpela, olsem na Bikpela i no kisim bek ol.

3 Long wanem ol i bin bihainim laik bilong skin na kamap olsem tewel, na pawa bilong tewel bin winim ol, ye, tru tumas dispela lapun snek em i bin giamanim nambawan papa na mama bilong mipela, em i bin mekim ol pundaun, na bikos long dispela, ol manmeri bilong graun kamap long bihainim laik bilong skin, bihainim laik bilong ol yet, na kamap olsem tewel, long save nogut na gutpela, na long bihainim laik bilong tewel.

4 Olsem na olgeta manmeri i bin paul pinis, na lukim, ol bai paul oltaim sapos God i no kisim bek ol pipol bilong em long dispela laip bilong paul na pundaun.

5 Tasol tingim olsem man em i wok yet long bihainim yet long laik bilong skin, na bihainim ol pasin bilong sin na les long harim tok bilong God, em bai i stap yet long laip bilong pundaun na pawa bilong tewel winim em olgeta. Olsem na laip bilong dispela man bai kamap wankain olsem em i no bin wokim wok bilong kisim bek, na em i kamap birua bilong God, wankain olsem tewel i birua bilong God.

6 Na nau sapos Krais i no kam long graun, toktok long ol samting bai kam yet, i luk olsem ol i bin kam pinis kisim bek bai i no inap kamap.

7 Na sapos Krais i no kirap long idai, o i no brukim ol rop bilong idai, olsem matmat bai no inap win, na olsem idai bai i no inap givim pen, kirap gen bai i no inap kamap.

8 Tasol kirap gen em i stap, olsem na matmat i no inap win, na Krais i winim pen bilong idai.

9 Krais i lait na laip bilong graun, ye, wanpela lait i nogat arere, em bai i no inap kamap tudak, ye, na tu wanpela laip i nogat arere, we idai bai i no moa bai kamap.

10 Tru tumas dispela bodi bilong idai bai senis na kamap bodi i no inap idai, na dispela bodi save bagarap bai senis long kamap bodi i no inap bagarap, na bai sanap long pes bilong jasmen ples bilong God, long em long jasim olsem long pasin bilong ol, sapos i gutpela o i nogut—

11 Sapos pasin bilong ol i gutpela, long kirap gen bai kisim laip i nogat arere na amamas, na sapos pasin bilong ol i nogut, long kirap gen bai kisim bagarap i nogat arere na tewel em i bin winim ol bai kisim ol, na dispela em i hel paia—

12 Bikos ol i bin bihainim laik long skin bilong ol, na ol i no beten long Bikpela taim em i givim han bilong marimari bilong em long ol, long wanem, han bilong marimari em i bin givim long ol, tasol ol i no bilip long em, ol wokman bilong Bikpela i bin tok lukaut long pasin nogut bilong ol tasol ol i no lusim pasin nogut, na Bikpela i bin tokim ol long tanim bel tasol ol i no tanim bel.

13 Na nau, inap yupela mas guria na tanim bel long sin bilong yupela, na tingim olsem yupela ken kisim selvesen insait na long Krais tasol?

14 Long wanem, sapos yupela i lainim lo bilong Moses, lainim tu olsem em i wanpela mak long ol samting bai kam long bihain taim—

15 Lainim ol pipol olsem kisim bek bai kam insait long Krais Bikpela em i trutru Papa Oltaim Oltaim. Amen.