1 Na nau king Mosaia i bin tokim olgeta pipol long bung wantaim.

2 Nau ol lain pikinini bilong Nifai i no bin planti, o namba long ol pipol bilong Jarahemla, ol tumbuna pikinini bilong Mulek, wantaim ol lain ol i bin kam wantaim long Jarahemla long ples we nogat man i stap ol i bin winim namba long ol tumbuna pikinini bilong Nifai.

3 Na namba long ol pipol bilong Nifai wantaim ol pipol bilong Jarahemla i no planti olsem ol namba long ol lain bilong Leman, ye, namba bilong ol i liklik tru.

4 Na nau olgeta pipol bilong Nifai ol i bin bung wantaim long wanpela hap, na tu olgeta pipol bilong Jarahemla ol i bin bung wantaim long narapela hap, na ol pipol ol i bin bung wantaim long tupela bodi.

5 Na em i kamap we Mosaia i bin ritim, na askim long ritim, ol rekot bilong Jenif long ol pipol bilong em, ye, em i bin ritim ol rekot long ol pipol bilong Jenif, long taim ol i bin lusim graun bilong Jarahemla i go inap long ol i bin kam bek gen.

6 Na tu em i bin ritim stori bilong Alma wantaim ol lain brata bilong em, na olgeta pen bilong ol, long taim ol i bin lusim graun bilong Jarahemla i go inap long taim ol i bin kam bek gen.

7 Na nau, taim Mosaia pinis long ritim ol rekot, ol pipol bilong em ol i bin i stap long graun bilong Jarahemla i kirap nogut tru.

8 Long wanem, ol i nogat tingting, bikos taim ol i lukim ol lain ol i bin rausim ol long kalabus, ol i amamas nogut tru.

9 Na gen, taim ol i tingim ol lain brata bilong ol em ol lain bilong Leman ol i bin kilim, ol sore nogut tru, na tru tumas ol i bin krai bikos oli bin sore.

10 Na gen, taim ol i tingim long gutpela pasin bilong God, na long pawa bilong em long sevim Alma wantaim ol lain brata bilong em long han long ol lain bilong Leman na long kalabus, ol apim nek bilong ol na givim tok-tenkyu long God.

11 Na gen, taim ol tingim ol lain bilong Leman, em ol lain brata bilong ol, na long doti laip na laip bilong sin bilong ol, ol i bin kisim pen nogut tru bikos long sindaun long sol bilong ol.

12 Na em i kamap we ol lain em ol pikinini bilong Amulon na ol lain brata bilong em, ol i maritim ol pikinini meri long ol lain bilong Leman, ol i no amamas long pasin long ol papa bilong ol, na les long yusim nem long ol papa bilong ol, olsem na ol i yusim nem bilong Nifai, olsem ol bai kamap ol tumbuna pikinini bilong Nifai na kaunim wantaim ol lain ol i kamap long ol lain bilong Nifai.

13 Na nau olgeta pipol bilong Jarahemla ol i bin kaunim wantaim ol lain bilong Nifai, na dispela bin kamap bikos ol pipol i bin givim kingdom long ol tumbuna pikinini bilong Nifai na i no long narapela man.

14 Na nau em i kamap we taim Mosaia i pinisim toktok na pinis long ritim long ol pipol, em laikim olsem Alma tu bai toktok long ol pipol.

15 Na Alma i bin toktok long ol, taim ol i bung wantaim long bikpela bikpela bodi, na em i bin go long wanpela lain i go long narapela, autim toktok bilong God long ol pipol long tanim bel na bilip long Bikpela.

16 Na em strongim gutpela toktok long ol pipol bilong Limhai wantaim ol lain brata bilong em, olgeta ol lain ol i bin raus long kalabus, em olsem ol i mas tingim olsem em Bikpela tasol em i bin seivim ol.

17 Na em i kamap we bihain long Alma i lainim ol pipol long planti samting na pinisim toktok long ol, king Limhai i bin laik kisim baptisim, na tu olgeta pipol bilong em ol i bin gat laik long kisim baptisim.

18 Olsem na, Alma i bin go long wara na baptaisim ol, ye, em i bin baptaisim ol wankain olsem em i bin wokim long ol lain brata bilong em long wara Momon, ye, na em i bin baptaisim planti lain ol i kamap memba long sios bilong God, na dispela bikos long bilip bilong ol long ol toktok bilong Alma.

19 Na em i kamap we king Mosaia i bin givim pawa long Alma olsem em bai kirapim sios long olgeta hap long graun bilong Jarahemla, na em i bin givim pawa long Alma long odenim ol pris na ol tisa long wanwan sios.

20 Nau dispela i bin kamap bikos ol pipol i planti tumas na wanpela tisa tasol bai i no inap lukautim olgeta, na tu olgeta pipol bai i no inap harim toktok bilong God insait long wanpela kivung;

21 Olsem na ol wanwan bodi o sios ol i bin holim kivung bilong ol yet, wanwan sios i bin gat ol pris na ol tisa bilong ol yet, na wan wan pris i bin autim toktok bilong God olsem Alma i bin givim long ol long maus bilong em.

22 Olsem na planti han sios ol i bin i stap tasol olgeta i wanpela sios, ye, tru tumas sios bilong God, long wanem, nogat wanpela samting i bin autim long olgeta sios, tasol em long tanim bel na bilip long God.

23 Na nau sevenpela sios ol i bin kirapim long graun bilong Jarahemla. Na em i kamap we manmeri ol i laikim long kisim nem bilong Krais o God antap long ol, ol i bin kamap memba long ol sios bilong God.

24 Na ol i bin kamap ol pipol bilong God. Na Bikpela i bin kapsaitim Spirit bilong em antap long ol, na Bikpela i bin blesim ol, na sindaun bilong ol i bin kamap gutpela long graun.