1 Nau ol pikinini meri long ol lain bilong Leman ol i save bung ol yet long wanpela ples insait long Semlon long singsing, na long danis, na long amamasim ol yet.

2 Na em i kamap we wanpela liklik namba long ol i bin bung long wanpela de long singsing na long danis.

3 Na nau ol pris bilong king Noa, bikos ol i sem long go bek long siti bilong Nifai, ye, na tu ol i bin poret olsem ol pipol bai kilim ol, olsem na ol i no go bek long ol meri na ol pikinini bilong ol.

4 Na bikos ol i bin i stap long ples we nogat man i stap, na lukim ol pikinini meri bilong ol lain bilong Leman, olsem na ol i bin wet na was long ol,

5 Na taim liklik namba long ol i bin bung long danis, ol i kamaut long ples hait na kisim ol na karim ol i go long ples we nogat man i stap, ye, ol bin karim tupela ten foa pikinini meri bilong ol lain bilong Leman i go long ples we nogat man i stap.

6 Na em i kamap we taim ol lain bilong Leman painim olsem ol pikinini meri bilong ol i lus ol i belhat wantaim ol pipol bilong Limhai, long wanem, ol i ting olsem ol pipol bilong Limhai i bin wokim.

7 Olsem na ol i bin salim ami bilong ol long go, ye, tru tumas king em yet i bin lidim ol pipol bilong em, na ol i go long graun bilong Nifai long bagarapim ol pipol bilong Limhai.

8 Na nau Limhai i bin lukim ol long taua, tru tumas em bin save long olgeta i redi long kirapim bikpela pait, olsem na em i bin bungim wantaim ol pipol bilong em, na wetim ol long ol gaden na bus.

9 Na em i kamap we taim ol lain bilong Leman i kam, ol pipol bilong Limhai i stat long kamap long ol ples hait bilong ol, na i stat long kilim ol.

10 Na em i kamap we pait i bin kamap nogut tru, long wanem, ol pipol bilong Limhai i bin pait olsem ol laien ol i save pait long kisim ol enimol long kaikai.

11 Na em i kamap we ol pipol bilong Limhai i stat long ronim ol lain bilong Leman i go bek, tasol ol pipol bilong Limhai ol i no planti tru olsem wanpela hap long ol lain bilong Leman. Tasol ol i bin pait long laip bilong ol, na long meri bilong ol na long pikinini bilong ol, olsem na ol i bin pait nogut tru olsem ol masalai.

12 Na em i kamap we ol i bin painim king long ol lain bilong Leman namel long namba bilong ol idai man bilong ol, tasol em i no idai, tasol em bin kisim bikpela sua na ol i bin lusim em bihain, bikos ol pipol bilong em i bin ronawe hariap tru.

13 Na ol pipol bilong Limhai i kisim em na ol i pasim ol sua bilong em, na kisim em kam long Limhai, na tok: Lukim, mipela i kisim kam, king long ol lain bilong Leman em bin kisim sua na pundaun namel long ol idai man bilong ol, na ol pipol bilong em bin lusim em bihain, na lukim, mipela i kisim em i kam long yu, na nau yumi kilim em.

14 Tasol Limhai tokim ol: Yupela bai i no inap kilim em, tasol kisim em kam olsem mi bai lukim em. Na ol kisim em i kam. Na Limhai bin askim em: As tru long yupela kamap long pait wantaim ol pipol bilong mi em bilong wanem? Lukim, ol pipol bilong mi ol i no brukim tok tru antap mi bin mekim long yu, olsem na, yupela i brukim tok tru antap yupela i bin mekim wantaim ol pipol bilong mi na long wanem as tru?

15 Na nau king i tok: Mi bin brukim tok tru antap bikos ol pipol bilong yu ol i bin karim i go awe ol pikinini meri bilong ol pipol bilong mi, olsem na mi bin belhat na lidim ol pipol bilong mi long kamaut pait wantaim ol pipol bilong yu.

16 Na nau Limhai i no bin harim long ol dispela samting, olsem na em tok: Mi bai painim ol pipol bilong mi na husat man tru wokim dispela samting bai idai. Olsem na em i bin askim long painim gut namel long ol pipol bilong em.

17 Nau taim Gidion harim ol dispela samting, na bikos em kepten bilong king, olsem na em i bin go na tokim king: Mi askim yu olsem noken wokim wanpela samting long ol pipol na noken ting olsem ol pipol bilong yu bin wokim ol dispela samting.

18 Long wanem, yu tingim ol pris bilong papa bilong yu, ol dispela pipol i bin traim long bagarapim? Na ol i no i stap long ples we nogat man i stap? Na em i no ol lain ol i bin stilim ol pikinini meri long ol lain bilong Leman?

19 Na nau, lukim, na tokim king long ol lain bilong Leman long ol dispela samting, olsem em bai tokim ol pipol bilong em inap long ol bai mekim belkol bilong ol long mipela, long wanem, lukim ol i redi pinis long pait wantaim mipela, na tu lukim mipela i no planti lain.

20 Na lukim, ol i kam wantaim planti lain tru bilong ol, na mipela bai idai olgeta sapos king i no mekim bel kol bilong ol long mipela.

21 Long wanem, ol toktok Abinadai i bin profesai long mipela i no kamap tru—na olgeta long dispela samting i kamap bikos mipela i no harim ol toktok bilong Bikpela, na tanim bel long pasin nogut bilong mipela?

22 Na nau mipela mas mekim bel kol bilong king, na mipela mas kamapim tok tru tru antap yumi bin mekim wantaim em, long wanem, em i moa beta long yumi long i stap long kalabus na long yumi long idai, olsem na, mipela mas pasim planti blut long kapsait.

23 Na nau Limhai i bin tokim king olgeta samting long papa bilong em, na ol pris ol i bin ronawe i go long ples we nogat man i stap, na tokim king olsem em i ol pris ol i bin karim ol pikinini meri bilong ol i go.

24 Na em i kamap we bel bilong king i kol long ol pipol bilong Limhai, na em i tokim ol: Yumi go het long bungim ol pipol bilong mi, han nating, na mi promis long yu wantaim tok tru antap olsem ol pipol bilong mi bai ol i no inap kilim ol pipol bilong yu.

25 Na em i kamap we ol pipol bilong Limhai i bin bihainim king, na go het han nating long bungim ol lain bilong Leman. Na em i kamap we ol bungim ol lain bilong Leman, na king long ol lain bilong Leman i bin nil daun em yet long pes bilong ol, na mekim gutpela toktok long nem bilong ol pipol bilong Limhai.

26 Na taim ol lain bilong Leman ol i bin lukim olsem ol pipol bilong Limhai i no karim ol samting bilong pait, ol i bin sore long ol na bel kol i bin kamap long ol, olsem na ol i bin go bek wantaim king bilong ol long graun bilong ol yet wantaim bel isi.