1 Nokwar, dɛm na Ewuradze se m’akowaa Joseph, susuampaara dɛ ebisa efi me nsamu dɛ epɛ dɛ ihu siantsir a Emi, Ewuradze mubuu mo nkowaa Abraham, Isaac, nye Jacob nye mo nkowaa Moses, David nye Solomon no bem dɛ mbrɛ nkyerɛkyerɛ ne fapem no kyerɛ wɔ hɔn yernom na nwewefo pii mfefaree no ho, na epɛ dɛ etse ase no—

2 Hwɛ, na hu dɛ Emi nye Ewuradze hom Nyankopɔn no, na mebɛma wo mbuae a ɔfa dɛm asɛm no ho.

3 Dɛm ntsi, siesie w’akoma fa gye, na dzi nkyerɛkyerɛ a medze rebɛma wo yi do osiandɛ hɔn a wɔada dɛm mbra yi edzi akyerɛ hɔn no otwar dɛ wodzi do.

4 Na hwɛ, mereda ahyɛmudzi fofor a ɔwɔ hɔ daapem bi edzi akyerɛ wo, na sɛ enndzi dɛm ahyɛmudzi no do a, nna wobobu hom fɔ, osiandɛ obiara nnyi hɔ a ɔbɔpow dɛm ahyɛmudzi yi na wɔbɛma no kwan ma ɔaahɛn m’enyimnyam mu.

5 Na hɔn a wobenya me nsamu nhyira no nyina bedzi mbra a dɛm nhyira no fam ho, nye dza ɔkekã ho nyina a wɔhyehyɛe ansaana wɔrotow wiadze fapem no do.

6 Na ɔfa ahyɛmudzi fofor a ɔwɔ hɔ daapem ho no, wɔhyehyɛe too hɔ maa m’enyimnyam ne mãhyɛ no, nyia obenya ne mãhyɛ no otwar dɛ na ɔwɔ dɛ odzi mbra no do, ɔnntse dɛm a wobobu no fɔ, Ewuradze Nyankopɔn na ɔse.

7 Na nokwar, mese hom dɛ, dɛm mbra ho nhyehyɛɛ nye iyinom: Ahyɛmudzi, nhyehyɛɛ, nkyekyeree, asɛdze, nsewdzi, bɔhyɛ, nyɛe, nsesemu, fɛkuwbɔ anaa enyidakwan nyina a wɔannyɛ na, wɔannam nyia wɔasera no ngo dze ama aber yi nye mbersantsen nyina mu no ammfa anohoba Sunsum Krɔnkrɔn no annsɔw ano ma wɔannhɛn mu no, na ɔyɛ krɔnkrɔn mu krɔnkrɔn, nyikyerɛ nye mbrasɛm no duaa me nyimpa a meyi no na wɔasera no ngo no do mmaa no, ɔno na meyi no wɔ asaase do dɛ onkura dɛm tum yi (na meyi m’akowaa Joseph dɛ onkura dɛm tum no wɔ nda a odzi ekyir no mu, na obiara nnyi hɔ gyedɛ nyimpa kortonoo na wɔdze dɛm tum yi nye dɛm asɔfodzi ne nsaafee yi ama no wɔ asaase do) owuekyir no biribi papa biara anaa tum biara anaa nhyɛ biara, osiandɛ sɛ nyimpa wu a, nhyehyɛɛ biara a wɔannyɛ no wɔ kwan yi do no ba ewiei.

8 Hwɛ, me fi yɛ fi a wɔyɛ no mu biribiara esiado esiado, na ɔnnyɛ fi a basabasa biara wɔ mu, Ewuradze Nyankopɔn na ɔse.

9 Ana mebɛgye afɔrbɔdze a wɔammbɔ no wɔ me dzin mu? Ewuradze na ɔse.

10 Anaadɛ mebɛgye biribi efi hom nsamu a nnyɛ emi na medze mae?

11 Ana mebɛma hom biribi a ɔmmfa mbra kwan do, Ewuradze na ɔse, dɛ mbrɛ emi nye m’Egya mpo hyehyɛe maa hom ansaana wɔrobɔ wiadze?

12 Emi nye Ewuradze hom Nyankopɔn; na mema hom mbrasɛm yi—dɛ obiara mmba Egya no hɔ gyedɛ ɔnam mo do anaa ɔnam m’asɛm a ɔyɛ me mbra no do, Ewuradze na ɔse;

13 Na biribiara a ɔwɔ wiadze mu, sɛ wɔnam nyimpa do, anaa ahengua do, anaa mpanyindzi, anaa etum, anaa ndzɛmba a wɔwɔ dzin, biribiara a wɔyɛe no, sɛ nnyɛ emi na meyɛe, anaa wɔammfa m’asɛm do yɛe a, wɔbɔtow akyen, Ewuradze na ɔse, na nyimpa no wu ekyir no ɔnnkɛka hɔ, nna ɔnnkɛka hɔ so wɔ owusoɛr ekyir, Ewuradze hom Nyankopɔn no na ɔse.

14 Na ndzɛmba biara a ɔbɛka hɔ no fi emi; na biribiara a ommfi emi no wɔbɔwosow no na wɔasɛɛ no.

15 Dɛm ntsi, sɛ ɔbarimba war yer wɔ wiadze mu, na sɛ nnyɛ mo do anaa m’asɛm do na oduae waree a, ahyɛmu a ɔnye no dzii no dzi mu mber dodow biara a ɔnye no wɔ hɔ, na sɛ wowu na wofi wiadze mu a, hɔn awar nye ahyɛmudzi no nnyi tum biara bio; dɛm ntsi, mbra biara nnkyekyer hɔn bio ber a woefi wiadze mu no.

16 Dɛm ntsi, ber a woefi wiadze mu no wɔnnwar anaa wɔmmfa anaa mma awar so; mbom wɔyɛ hɔn abɔfo wɔ sor; dɛm abɔfo no yɛ nkowaa asomfo wɔbɔsom hɔn a woedzi mu na wɔafata onnyiewiei enyimnyam a ɔsõ tra do pii no.

17 Osiandɛ dɛm abɔfo yinom enndzi me mbra do; dɛm ntsi, wonnkotum adɔr, mbom wɔbɛtsena hɔ ankorankor a wonnkenya nkwagye ntowdo, wɔ hɔn nkwagye tsenabew mu, akɔ mbersantsen mu; na ofi dɛm ber dze kɔ no wɔnnyɛ enyame, mbom wɔyɛ Nyame n’abɔfoe afebɔɔ kesi afebɔɔ.

18 Na bio, nokwar, mese hom dɛ, sɛ ɔbarimba war yer, na ɔnye no dzi ahyɛmu wɔ aber yi na mbersantsen nyina mu, na sɛ woenndua mo do anaa m’asɛm a ɔyɛ me mbra do enndzi dɛm ahyɛmu no, na nyia mafɔw no ngo na meyi no esi hɔ ama dɛm tum no enndua anohoba Sunsum Krɔnkrɔn do annsɔw ano a, sɛ wofi wiadze yi mu a ɔnam dɛ nnyɛ emi na mekãa hɔn bɔɔ mu na woenndua m’asɛm do so yɛe ntsi, Ewuradze na ɔse; sɛ wofi wiadze yi mu a onnyi tum biara wɔ hɔ, osiandɛ wɔama abɔfo na enyame dwumadzi wɔ hɔ, ntsi wonnkotum apa hɔn ho akɔ, dɛm ntsi, wonnkotum enya m’enyimnyam no; osiandɛ wɔahyehyɛ biribiara esiado esiado wɔ me fi, Ewuradze hom Nyankopɔn no na ɔse.

19 Na bio, nokwar, mese hom dɛ, sɛ ɔbarimba nam m’asɛm a ɔyɛ me mbra no do war yer, na odua ahyɛmudzi fofor a ɔwɔ hɔ daapem no do yɛ, na nyia wɔasera no ngo, na woeyi no esi hɔ ama no dɛm tum no nye asɔfodzi nsaafee no dua anohoba Sunsum Krɔnkrɔn no do sɔw ano ma hɔn na ɔse hɔn dɛ—Hom bɔsoɛr wɔ owusoɛr a odzi kan no mu; na sɛ ɔba dɛ owusoɛr a odzi kan no ekyir a owusoɛr a odzi do no; na wobenya ahengua, ahenman, mpanyindzi, na tumdzi, ahendzi, mbea a ɔkrɔn na bun mu nyina edzi—nkyii wɔbɛkyerɛw no wɔ Eguambaa no Nkwa Nwoma no mu dɛ, onnkedzi ewu dɛ ɔbɛkã ɔtseneneenyi no bɔgyaa egu, na sɛ wɔtsena m’ahyɛmu no mu, na oenndzi ewu dɛ ɔbɛkã ɔtseneneenyi no bɔgyaa egu a, biribiara a m’akowaa dze egu hɔn do no bɛba mu wɔ aber yi mu nye mbersantsen nyinara mu; na sɛ wofi wiadze yi mu so a, ɔbɛyɛ hɔ dɛmara ama hɔn na wɔbɛpa abɔfo, na enyame a wɔdze hɔn esisi hɔ no ho akɔ hɔn nkwagye ntowdo na enyimnyam mu wɔ ndzɛmba nyina mu, dɛ mbrɛ wɔsɔɔw ano dze guu hɔn etsir do no, dɛm enyimnyam no bɛhyɛ mã na hɔn asefo wɔakɔ do afebɔɔ ekesi afebɔɔ.

20 Nkyii wɔbɛyɛ enyame, osiandɛ wonnyi ewiei; dɛmara na wɔbɛyɛ fi daapɛm kesi daapɛm, osiandɛ mbrɛ wɔtse no ara na wɔtse, afei wɔbɔbɔ adze nyina do, osiandɛ ndzɛmba nyinara hyɛ hɔn ase. Nkyii wɔbɛyɛ enyame, osiandɛ wɔwɔ tum nyinara, na abɔfo hyɛ hɔn ase.

21 Nokwar, nokwar, mese hom dɛ, gyedɛ hom dzi me mbra do, annyɛ dɛm a, hom nnkotum enya enyimnyam yi.

22 Osiandɛ abow no yɛ tsẽabaa na nkekãnkekã, na kwan no yɛ ketseabaa dze kɔ nkwagye ntowdo na nkwa ntoado no na kumaabi na wohu, na ɔnam dɛ hom anngye me wɔ wiadze mu no ntsi na hom nnyim me.

23 Mbom sɛ hom gye me wɔ wiadze mu a, nkyii hom bohu me, na hom benya hom nkwagye ntowdo; na bea a mowɔ no hom so aaba hɔ.

24 Iyi nye onnyiewiei nkwa no—dɛ hom bohu Nyame nyansafo, nokwafo nkotoo no, nye Jesus Christ a ɔsomaa no no. Emi nye ɔno. Dɛm ntsi hom ngye me mbra.

25 Abobow a ɔyɛ tɛtɛr na kwan a ɔyɛ tɛtɛɛtɛr; nye dza wɔdze kɔ owu mu na piinara na wɔfa mu, osiandɛ wɔnngye me, nna wonndzi me mbra do.

26 Nokwar, nokwar, mese hom dɛ, sɛ ɔbarimba war yer dɛ mbrɛ m’asɛm se na wɔdze anohoba Sunsum Krɔnkrɔn no sɔw awar no ano tse dɛ mbrɛ m’ahyehyɛ ato hɔ, na ɔbarimba no anaa ɔbaa no yɛ bɔn anaa ɔtõ ahyɛmudzi fofor a ɔwɔ hɔ daapem ne mbra no mu biara, na wɔkã nsɛm bɔn tsia Nyankopɔn, na woenndzi ewu biara a no mu no wɔkãa ɔtseneneenyi no bɔgyaa gui a, wɔbɔsoɛr wɔ owusoɛr a odzi kan no mu, na wɔahɛn hɔn nkwagye ntowdo mu; mbom wɔbɛsɛɛ hɔn honam, na woeyi hɔn ama Satan n’ekutukubɔ ekesi ɔpon da no, Ewuradze Nyankopɔn na ɔse.

27 Kasa a hom kã dze tsia Sunsum Krɔnkrɔn no, wɔnnkɛfa akyɛ hom wɔ wiadze yi mu, nna sɛ hom fi wiadze yi mu so a wɔnnkɛfa akyɛ hom, ɔno nye dɛ, hom dzi ewu na hom kã ɔtseneneenyi no bɔgyaa gu, na wɔpen do dɛ woku me, wɔ ber a hom nsa akã m’ahyɛmudzi fofor a ɔwɔ hɔ daapem no, Ewuradze Nyankopɔn na ɔse; na nyia oenndzi dɛm mbra yi do no nnkotum ahɛn m’enyimnyam no mu, mbom wobobu no fɔ, Ewuradze na ɔse.

28 Emi nye Ewuradze hom Nyankopɔn, na medze m’Asɔfodzi Krɔnkrɔn ne mbra no a emi na m’Egya hyehyɛe too hɔ ansaana wɔrobɔ wiadze no, bɛma hom.

29 Abraham ne nsa kãa ndzɛmba nyina, biribiara a ne nsa kãe no ye, nyikyerɛ na mbrasɛm a wɔnam m’asɛm do dze mae, Ewuradze na ɔse, na ɔahɛn ne nkwagye ntowdo mu na ɔtsena n’ahengua do.

30 Abraham ne nsa kãa anohoba a ɔfa n’asefo, nye eduaba a wofi n’asen mu ho—na n’asen mu na hom fi, nyia ne dzin dze Joseph a ɔyɛ m’akowaa no—hɔn a wɔbɔkɔ do mber tsentsen biara a wɔbɛtsena wiadze yi mu; na dɛ ɔfa no Abraham na n’asefo ho no dze, sɛ wofi wiadze yi mu so mpo a, wɔbɔkɔ do dɛmara; wɔwɔ wiadze yi mu o, wofi wiadze yi mu o, wɔbɔkɔ do adɔr pii dɛ nworaba; anaa, sɛ wɔse hom dɛ hom nkan anhwea a ogu mpoano a hom nnkotum akã no dodow no.

31 Dɛm anohoba yi yɛ hom so homdze, osiandɛ hom yɛ Abraham dze, na anohoba no wɔbɔe maa Abraham; na dɛm mbra yi yɛ m’Egya no ndwuma no nsɔwdo, no mu na ɔhyɛ noho enyimnyam.

32 Dɛm ntsi, hom nkɔ, na hom nkɛyɛ Abraham no ndwuma; hom mbɛhyɛ me mbra yi ase na wɔbɛgye hom nkwa.

33 Mbom sɛ hom ammbɛhyɛ me mbra yi ase a, hom nsa nnkɛkã m’Egya n’anohoba no a ɔdze bɔɔ Abraham no.

34 Nyankopɔn hyɛɛ Abraham mbra, na Sarah dze Hagar maa Abraham ma ɔwaar no. Na ebɛnadze ntsi na ɔyɛɛ dɛm? Osiandɛ mbra no nye no; na ɔnam Hagar mu na nkorɔfo pii fi bae. Dɛm ntsi, iyi kã ndzɛmba binom so ho na ɔhyɛ anohoba no mã.

35 Dɛm ntsi ana Abraham kɛhyɛɛ afɔbu ase? Nokwar, mese hom dɛ, Oho; osiandɛ Emi, Ewuradze na mehyɛɛ no.

36 Wɔhyɛɛ Abraham dɛ ɔmfa ne babanyin Isaac mbɔ afɔr; eso, wɔakyerɛw dɛ: Mma nndzi ewu. Naaso Abraham ammpopo ne tsir, na dɛm ntsi, wɔdze tseneneeyɛ bɔɔ n’abaw do.

37 Abraham nyaa nwewefo, na wɔwoo mba pii maa no; iyi ho ntsi, wɔdze tseneneeyɛ bɔɔ n’abaw do, osiandɛ wɔdze hɔn maa no, na ɔtsenaa me mbra mu; na Isaac na Jacob so annyɛ ndzɛmba biara annkã dza wɔhyɛɛ hɔn no ho; na ɔnam dɛ wɔannyɛ ndzɛmba biara annkã dza wɔhyɛɛ hɔn no ho ntsi, wɔahɛn hɔn nkwagye ntowdo mu, dɛ mbrɛ anohoba no tse, na wɔtsena ahengua do, na wɔnnyɛ abɔfo, mbom wɔyɛ enyame.

38 David so nyaa yernom na nwewefo pii na mo nkowaa Solomon na Moses so dɛmara, nye mo nkowaa binom so dɛmara, fi abɔdze ahyɛse dze besi dɛm mber yi mu; na wɔannyɛ bɔn wɔ biribiara mu gyedɛ wɔ ndzɛmba a woennya emmfi mo hɔ no nko.

39 Emi na medze David ne yernom na nwewefo no duaa m’akowaa Nathan do dze maa no, nye nkɔnhyɛfo binom so a nna wɔwɔ dɛm tum yi ne nsaafee no, na dɛm ndzɛmba yinom nyina mu no ɔannyɛ bɔn enntsia me gyedɛ Uriah nye ne yer hɔn asɛm no ho nko; na dɛm ntsi oefi no nkwagye ntowdo ho ahwe ase, na oenya ne kyɛfa; na ofi wiadze yi mu a ne nsa nnkɛkã hɔn bio, osiandɛ medze ama obi so, Ewuradze na ɔse.

40 Emi nye Ewuradze hom Nyankopɔn no, na mama ɔwo, m’akowaa Joseph, dzibew bi, na medze ndzɛmba nyina asan aba. Bisa dza epɛ, na wɔdze bɛma wo dɛ mbrɛ m’asɛm se.

41 Na dɛ ebisa adze a ɔfa awartõ ho no, nokwar, nokwar, mese wo dɛ, sɛ ɔbarimba nya yer wɔ ahyɛmudzi fofor a ɔwɔ hɔ daapem no mu, na sɛ ɔbaa no nye ɔbarimba bi so wɔ hɔ, na nnyɛ emi na menam ngosera krɔnkrɔn do dze maa no a, nna ɔatõ awar na wɔbɛsɛɛ no.

42 Sɛ onnyi ahyɛmudzi fofor a ɔwɔ hɔ daapem no mu, na ɔnye ɔbarimba bi so wɔ hɔ a, nna ɔatõ awar.

43 Na sɛ no kun nye ɔbaa bi so wɔ hɔ, na sɛ kun no hyɛ bɔhyɛ ase a, nna ɔatõ no bɔhyɛ no, na ɔatõ awar.

44 Na sɛ ɔbaa no nntõo awar, na odzi bem, na ɔnntõo no bɔhyɛ no, na onyim, a meda no edzi kyerɛ wo, m’akowaa Joseph a, nkyii na ɔnam m’Asɔfodzi Krɔnkrɔn no tum do no ibenya tum afa ɔbaa no dze no ama nyia ɔnntõo awar na oedzi nokwar; na wɔbɛyɛ no ɔhwɛfo wɔ dodowara do.

45 Na medze asɔfodzi ne nsaafee na tum no ama wo, no mu na medze ndzɛmba nyina asan aba, na mema ihu ndzɛmba nyina wɔ ne mber mu.

46 Na nokwar, nokwar, mese wo dɛ, biribiara a ebɔsɔw ano wɔ asaase do no wɔbɔsɔw ano wɔ sor; na biribiara a ebɛkyekyer wɔ asaase do wɔ me dzin mu na m’asɛm do no, wɔbɛkyekyer wɔ sor afebɔɔ, Ewuradze na ɔse; na obiara a edze no bɔn bɛkyɛ no wɔ asaase do no, wɔdze bɛkyɛ no wɔ sor afebɔɔ; na obiara a ammfa no bɔn annkyɛ no wɔ asaase do no wɔnnkɛfa akyɛ no wɔ sor.

47 Na bio, nokwar, mese, obiara a ibehyira no no mibehyira no, na obiara a edze ndom bɛkã no no mobɔdom no, Ewuradze na ɔse; osiandɛ Emi, Ewuradze nye wo Nyankopɔn.

48 Na bio, nokwar mese ɔwo, m’akowaa Joseph dɛ, biribiara a edze bɛma wɔ asaase do, na obiara a enam m’asɛm do dɛ mbrɛ me mbra se no do dze bɛma no no, nhyira na mo tum na ɔbɛba do na nnyɛ ndom bi, Ewuradze na ɔse, na wonnkobu no fɔ wɔ asaase do nye sor.

49 Na Emi nye Ewuradze wo Nyankopɔn, na menye wo bɔwɔ hɔ ekesi wiadze n’ewiei mpo, nye mbersantsen mu; na nokwar, masɔw wo nkwagye ntowdo ano ama wo, na mesiesie ahengua ama wo wɔ m’Egya n’ahenman no mu, nye w’egya Abraham ho.

50 Hwɛ, mehu w’afɔrbɔdze nyina, na medze wo bɔn nyina bɛkyɛ wo; mehu w’afɔrbɔdze wɔ setsie a ayɛ ama dza mesee wo nyina. Dɛm ntsi, kɔ na mesiesie kwan ama wo a ebɛfa do efi nsa, dɛ mbrɛ megyee Abraham n’afɔrbɔdze a ɔyɛ ne babanyin Isaac no.

51 Nokwar, mese wo dɛ: Medze mbrasɛm yi ma m’abaawa, wo yer Emma Smith, nyia medze no maa wo no, dɛ ɔntwe noho na mma ɔnnfa noho nhyɛ dza mehyɛɛ wo dɛ fa bɔ afɔr ma no no, osiandɛ meyɛɛ dɛm, Ewuradze na ɔse, dze sɔɔ hom nyina hwɛe, dɛ mbrɛ medze yɛɛ Abraham no, na ama meetum edua ahyɛmudzi na afɔrbɔ do ebisa afɔrbɔ efi hom nsamu.

52 Na ma m’abaawa Emma Smith, ngye hɔn a wɔdze hɔn ama m’akowaa Joseph nyina a hɔnho san na hɔn ho tsew wɔ m’enyim no; na hɔn a hɔn ho nntsew, na wɔakã dɛ hɔn ho tsew no, wɔbɛsɛɛ hɔn, Ewuradze Nyankopɔn na ɔse.

53 Na emi nye hom Ewuradze wo Nyankopɔn, na hom ntsie me ndze; na mama kwan dɛ wɔnyɛ m’akowaa Joseph ɔhwɛfo wɔ ndzɛmba pii do; osiandɛ oedzi nokwar wɔ ndzɛmba kumaabi ho, ntsi ofi aber yi dze kɔ no mebɛhyɛ no dzen.

54 Na mehyɛ m’akowaa Emma Smith dɛ, ɔntsena m’akowaa Joseph ho na ɔntakyer no nko a obiara nnkã ho. Mbom sɛ oenndzi dɛm mbrasɛm yi do a wɔbɛsɛɛ no; Ewuradze na ɔse, na Emi nye Ewuradze wo Nyankopɔn, sɛ oenndzi me mbrasɛm yi do a, mebɛsɛɛ no.

55 Mbom sɛ oenndzi mbrasɛm yi do a, afei m’akowaa Joseph nyɛ ndzɛmba nyina mma no, dɛ mbrɛ ɔakã no, na mibehyira no na mama ɔadɔr, egyanom na nanom, nuambanyin na nkyerɛbaa, adan na nsaase, yernom na mba, ɔha na no mbɔho, nye onnyiewiei nkwa ahenkyɛw wɔ wiadze a onnyiewiei mu.

56 Na bio, nokwar, mese, hom mma m’abaawa mfa m’akowaa Joseph no mfom nkyɛ no; na nkyii wɔdze no so no mfom bɛkyɛ no, dza ɔayɛ etsia me no; na Emi, Ewuradze wo Nyankopɔn no mibehyira no, na mama ɔadɔr, na mama n’akoma edzi dɛw.

57 Na bio, mese, mma m’akowaa Joseph nnyi ne nsa mmfi n’egyapadze ho, amma ɔtamfo aammba ammbɛsɛɛ no, osiandɛ Satan rohwehwɛ asɛɛ no, na Emi nye Ewuradze wo Nyankopɔn, na ɔno yɛ m’akowaa; na hwɛ, mekã no ho, dɛ mbrɛ mekãa Abraham, w’egya ho kɔr no nkwagye ntowdo na enyimnyam mu no mpo.

58 Afei ɔfa asɔfodzi no ho mbra no, ndzɛmba pii wɔ ho.

59 Nokwar, sɛ m’Egya nam mankasa me ndze do frɛ nyimpa bi, dɛ mbrɛ ɔdze yɛɛ Aaron a, na wɔnam nyia ɔsomaa me ne ndze do, na medze asɔfodzi yi no tum nsaafee akyɛ no, sɛ ɔyɛ biribiara wɔ me dzin mu, dɛ mbrɛ me mbra na m’asɛm se a, ɔnnkɛyɛ bɔn, na mubobu no bem.

60 Dɛm ntsi, mma obiara nnhaw m’akowaa Joseph, osiandɛ mubobu no bem; na ɔbɛyɛ afɔrbɔdze no a morohwehwɛ efi ne nsamu wɔ ne mbrato ho no, Ewuradze hom Nyankopɔn na ɔse.

61 Na bio, ɔfa no asɔfodzi na ne mbra ho no—sɛ ɔbarimba biara kɛgye ɔbaabun awar, na ɔpɛ dɛ ɔkɛgye ɔbaabun bi so awar kã ho, na sɛ nyia odzi kan no pen do, na sɛ ɔkɛgye dza otsĩa ebien no awar, na hɔn nyina yɛ mbaabun na wɔmmbɔɔ banyin fofor biara anohoba a, nna odzi bem; na ɔnnkɔto awar osiandɛ wɔdze hɔn ama no; na ɔnnkɛma ɔato awar osiandɛ wɔyɛ nedze na wɔnnyɛ obiara dze.

62 Na sɛ wɔnam mbra yi do ma no mbaabun du a, ɔnnkɛma ɔato awar, osiandɛ wɔyɛ nedze na wɔdze hɔn ama no; dɛm ntsi odzi bem.

63 Mbom, sɛ mbaabun no mu kor anaa du no mu bi, ɔaagye no awar ekyir no, kɔ banyin fofor bi so hɔ a, nna ɔato awar na wɔbɛsɛɛ no; osiandɛ wɔdze hɔn ama no dɛ wɔndɔr na wɔnhyɛ asaase do mã, dɛ mbrɛ me mbrasɛm no se, na wɔnhyɛ anohoba a m’Egya dze mae ansaana wɔrotow wiadze ne fapem no mã, dze ama hɔn nkwagye ntowdo wɔ wiadze a onnyiewiei no mu, ama woeetum ekura nyimpa hɔn akra; na iyi mu na ɔma m’Egya n’edwuma kɔ do, ama wɔaahyɛ no enyimnyam.

64 Na bio, nokwar, nokwar, mese wo dɛ, sɛ ɔbarimba biara a okura dɛm tum yi ne nsaafee, wɔ yer, na ɔkyerɛkyerɛ no m’asɔfodzi no ho mbra a ɔfa dɛm ndzɛmba yinom ho a, afei ɔbɛgye edzi na ɔagye no ato mu, annyɛ dɛm a wɔbɛsɛɛ no, Ewuradze hom Nyankopɔn no na ɔse; na mebɛsɛɛ no; na mobɔkrɔn me dzin wɔ hɔn a wɔgye me mbra na wodzi do nyina do.

65 Dɛm ntsi, sɛ ɔbaa no anngye mbra yi a, ɔbɛyɛ me mbra, dɛ ɔbarimba no gye ndzɛmba nyina a Emi, Ewuradze ne Nyankopɔn, dze bɛma no no, osiandɛ ɔbaa no anngye enndzi na ɔanngye no annto mu dɛ mbrɛ m’asɛm se ntsi, afei ɔbɛyɛ mbratonyi; na wobeyi ɔbarimba no efi Sarah ne mbra no mu, ɔno ɔgyee Abraham too mu dɛ mbrɛ mbra no se, ber a mehyɛɛ Abraham dɛ ɔmfa Hagar nyɛ ne yer no.

66 Na afei, ɔfa no mbra yi ho, nokwar, nokwar, mese wo dɛ, mebɛda pii edzi akyerɛ wo ekyir yi, dɛm ntsi, ma iyi ndɔɔ sõ mma wo mber yi mu. Hwɛ, Emi nye Alpha na Omega. Amen.