11. ສະຖານທີ່ພຣະວິຫານຟາແວັດ
ການຕັ້ງຖິ່ນຖານໃນເມືອງຟາແວັດ, ລັດມີເຊີຣີ, ໄດ້ກາຍເປັນບ້ານເຮືອນຂອງໄພ່ພົນຂອງພຣະເຈົ້າ ຈຳນວນ 3,000 ເຖິງ 5,000 ຄົນ ຜູ້ໄດ້ຊອກຫາບ່ອນຫລົບໄພ ຈາກການຂົ່ມເຫັງ ໃນເຂດແຈ໊ກສັນ ແລະ ໃນເຂດຄະເລ. ໃນປີ 1838 ພຣະຜູ້ເປັນເຈົ້າ ໄດ້ບັນຊາໄພ່ພົນຂອງພຣະເຈົ້າໃຫ້ສ້າງພຣະວິຫານໜຶ່ງຂຶ້ນຢູ່ບ່ອນນີ້ (ເບິ່ງ ຄພ 115:7–8). ການຂົ່ມເຫັງຂອງກຸ່ມອັນຕະພານ ໄດ້ກີດກັນເຂົາເຈົ້າຈາກການສ້າງ. ໃນວັນທີ 31 ເດືອນຕຸລາຂອງປີນັ້ນ, ສາດສະດາໂຈເຊັບ ສະມິດ ແລະ ຜູ້ນຳຄົນອື່ນໆຂອງສາດສະໜາຈັກ ໄດ້ຖືກຈັບ, ແລະ ຫລັງຈາກໄດ້ໄປຂຶ້ນສານຢູ່ເມືອງຣິຈ໌ມອນ, ພວກເພິ່ນໄດ້ຖືກສົ່ງໄປເຂົ້າຄຸກລີເບີຕີ. ໃນລະຫວ່າງລະດູໜາວຂອງປີ 1838–1839, ໄພ່ພົນຍຸກສຸດທ້າຍ ໄດ້ຖືກຂັບໄລ່ອອກຈາກເມືອງຟາແວັດ ແລະ ຈາກສະຖານທີ່ແຫ່ງອື່ນໆ ໃນລັດມີເຊີຣີ ແລະ ໄດ້ໄປອາໄສຢູ່ລັດອິລິນອຍ.
ເຫດການທີ່ສຳຄັນ: ສະຖານທີ່ສຳລັບພຣະວິຫານໄດ້ຖືກອຸທິດ ແລະ ຫີນເສົາເອກໄດ້ຖືກປັກລົງ. ໄດ້ຮັບການເປີດເຜີຍເຈັດຢ່າງ ທີ່ຖືກຈັດພິມໃນພຣະຄຳພີຄຳສອນ ແລະ ພັນທະສັນຍາ ທີ່ມີຢູ່ໃນ (ພາກ 113–115; 117–120). ໂຈເຊັບ ແອັຟ ສະມິດ, ປະທານຄົນທີຫົກຂອງສາດສະໜາຈັກ, ໄດ້ເກີດເມື່ອວັນທີ 3 ເດືອນພະຈິກ, 1838, ໃນເມືອງຟາແວັດ. ເມືອງຟາແວັດໄດ້ຮັບໃຊ້ເປັນສູນກາງໃຫຍ່ຂອງສາດສະໜາຈັກ ຊົ່ວໄລຍະໜຶ່ງ ພາຍໃຕ້ການຊີ້ນຳຂອງສາດສະດາໂຈເຊັບ ສະມິດ.