5. ແມ່ນ້ຳຊັສຄູຮັນນາ
ຮູບພາບນີ້ສະແດງໃຫ້ເຫັນແມ່ນ້ຳຊັສຄູຮັນນາ ໃນເມືອງຮາມໂມນີ, ລັດເພັນໂຊເວເນຍ.
ເຫດການທີ່ສຳຄັນ: ໂຈເຊັບ ສະມິດ ຜູ້ລູກ ໄດ້ມາເມືອງຮາມໂມນີ ເປັນເທື່ອທຳອິດ ໃນປີ 1825 ເພື່ອຊອກຫາງານທຳ. ເພິ່ນກັບພໍ່ຂອງເພິ່ນ ໄດ້ອາໄສຢູ່ໃກ້ແມ່ນ້ຳນີ້ ຢູ່ເຮືອນຂອງໄອຊິກ ເຮວ, ບ່ອນທີ່ໂຈເຊັບ ໄດ້ພົບກັບນາງເອມມາ ເຮວ, ພັນລະຍາໃນອະນາຄົດຂອງເພິ່ນ, ເປັນເທື່ອທຳອິດ (ຈສ—ປ 1:56–57). ໂຈເຊັບ ແລະ ເອມມາ ໄດ້ແຕ່ງງານກັນ ໃນວັນທີ 18 ເດືອນມັງກອນ, 1827. ສາດສະດາໄດ້ຮັບແຜ່ນຈາລຶກຄຳ ໃນວັນທີ 22 ເດືອນກັນຍາ, 1827, ທີ່ເມືອງແມນເຈດສະເຕີ, ລັດນິວຢອກ, ແລະ ບໍ່ດົນຫລັງຈາກນັ້ນ ໄດ້ຍ້າຍໄປກັບນາງເອມມາ ໄປຢູ່ເມືອງຮາມໂມນີ, ບ່ອນທີ່ເພິ່ນໄດ້ເລີ່ມຕົ້ນແປແຜ່ນຈາລຶກ. ໃນລະຫວ່າງການແປພຣະຄຳພີມໍມອນ, ໂຈເຊັບ ແລະ ອໍລີເວີ ຢາກຮູ້ຕື່ມອີກກ່ຽວກັບການບັບຕິສະມາ ແລະ ໄດ້ຍ່າງໄປຫາບ່ອນໜຶ່ງຢູ່ໃນປ່າໃກ້ແມ່ນ້ຳນີ້ ເພື່ອອະທິຖານຫາພຣະຜູ້ເປັນເຈົ້າ ກ່ຽວກັບເລື່ອງນີ້. ໃນການຕອບຕໍ່ຄຳອະທິຖານນີ້, ໂຢຮັນບັບຕິສະໂຕ ໄດ້ມາປະກົດຕົວ ໃນວັນທີ 15 ເດືອນພຶດສະພາ, 1829 (ຈສ—ປ 1:66–74; ຄພ 13). ເພິ່ນໄດ້ມອບຖານະປະໂລຫິດແຫ່ງອາໂຣນໃຫ້ແກ່ໂຈເຊັບ ແລະ ອໍລີເວີ. ແລ້ວ ພວກເພິ່ນໄດ້ລົງໄປໃນແມ່ນຳ ແລະ ໄດ້ໃຫ້ບັບຕິສະມາແກ່ກັນ ເພື່ອການປົດບາບ. ແລ້ວໂດຍທີ່ໄດ້ຮັບການຊີ້ນຳຈາກໂຢຮັນບັບຕິສະໂຕ, ໂຈເຊັບ ແລະ ອໍລີເວີ ໄດ້ແຕ່ງຕັ້ງກັນແລະກັນສູ່ຕຳແໜ່ງຖານະປະໂລຫິດແຫ່ງອາໂຣນ. ບໍ່ດົນຫລັງຈາກນັ້ນ, ເປໂຕ, ຢາໂກໂບ, ແລະ ໂຢຮັນ ໄດ້ມາປະກົດ ລະຫວ່າງເມືອງຮາມໂມນີ ແລະ ເມືອງໂຄນສະວຽວ ແລະ ໄດ້ມອບຖານະປະໂລຫິດແຫ່ງເມນຄີເສເດັກ ໃຫ້ແກ່ໂຈເຊັບ ແລະ ອໍລີເວີ (ຄພ 27:12–13; 128:20).