1. He pono, penei te kupu a te Ariki ki a korua, e aku hoa, e Hirini, e Hohepa, kei te pai a korua whanau, kei roto ratou i oku ringaringa a ka meatia e ahau te mea e pai ana ma ratou, no te mea kei roto i a au te kaha katoa;

2. No reira aru mai i a au, a me whakarongo ki te tohutohu era nei e hoatu e ahau ki a korua.

3. Nana, na titiro, he nui oku tangata kei tenei whenua i nga takiwa taiawhio noa, a, me te tatau kati e tutaki ana era e tuhera i nga takiwa taiawhio noa i te whenua whaka-te-rawhiti.

4. No reira, ahau, te Ariki i tukua ai i a korua kia haere mai ki tenei whenua, no te mea penei, he pai ki a au mo te oranga o nga wairua;

5. No reira, he pono taku ka mea atu nei ki a korua, kia kaha o korua reo ki tenei iwi, ka korero atu i nga whakaaro era nei e hoatu e ahau ki roto i o korua ngakau, a e kore korua e taea te whakapohehe i te aroaro o nga tangata.

6. No te mea era e hoatu ki a korua i taua haora ano, ae ra, i taua wa pu ano e korero ai korua.

7. Otira, he whakahaunga taku ka hoatu nei ki a korua, ara me whakapuaki e korua, ahakoa he aha te mea e whakapuaki ai korua i runga i toku ingoa i roto i te ngakau rangimarie, i roto i te wairua whakaiti i roto i nga mea katoa.

8. A, ka hoatu e ahau ki a korua tenei whakaari, a, ki te kaha korua ki te mea i tenei, ma te Wairua Tapu e tohutohu mai i te korerotanga mo nga mea katoa ahakoa he aha ta korua e ki ai.

9. A, he mea pai ki a au ko koe, e taku pononga e Hirini, hei mangai korero ki tenei iwi, ae ra, he pono, ka whakaritea koe e ahau mo tenei karangatanga, a hei mangai ano hoki koe mo taku pononga mo Hohepa;

10. A, ka hoatu e ahau he kaha ki a ia kia nui ai te kaha mo te whakaaturanga;

11. A, ka hoatu e au ki a koe he kaha kia kaha ai ki te whakamarama i nga karaipiture, kia waiho ai koe hei mangai korero ki a ia, a ko ia hei kai whakakite ki a koe, a kia matau ai koe ki te pumautanga o nga mea katoa mo nga mea o toku kingitanga i runga i te whenua.

12. No reira, kia maro to haere, a kia whiwhi o korua ngakau ki te hari; no te mea nana, ko ahau tena hei hoa mo korua tae noa ki te mutunga.

13. Inaianei ka hoatu e ahau ki a korua te kupu he mea mo Hiona. Era a Hiona e hokona mai ano, ahakoa ra kua riro atu ia mo tetahi wa poto.

14. Ko o korua teina, ko aku pononga, ko Orihana Haiti raua ko Hoani Koura, kei roto raua i oku ringaringa, a ki te pumau raua ki te pupuri i aku ture ka whiwhi raua ki te ora.

15. No reira, kia hari o korua ngakau no te mea ko nga mea katoa e mahi tahi ana i te pai mo nga mea e tika ana te haere, a e tika ana hoki ki te whakaaro a te Hahi;

16. No te mea era e whakaarahia ake e au he iwi pai ki a au, ko ratou nei e mahi ki a au i runga i te tika;

17. A, ko ratou katoa e karanga ana i te ingoa o te Ariki, a e pupuri ana i ana ture e whakaorangia. Koia ano tenei. Amine.