1. Whakarongo ki taku kupu e aku pononga, e Hirini me Pare me Remana, no te mea, nana, ko taku tenei ki a koutou, ka hoatu e ahau ki a koutou he whakahaunga kia haere koutou ki te kauwhau i taku Rongo-pai, kua whiwhi na koutou, ki nga Heika.

2. Nana ko taku kupu e mea nei ki a koutou, e hiahia ana ratou kia mohio ki tetahi wahi o te pono, heoi kahore te katoa, kahore ratou i te tika ki toku aroaro a ko te tikanga kia ripeneta ratou;

3. No reira ka tonoa korua e ahau, e aku pononga, e Hirini me Pare, ki te kauwhau i te Rongo-pai ki a ratou;

4. A kia whakaritea taku pononga a Remana mo tenei mahi, kia korerorero ai ia ki a ratou, kauaka hei rite ki nga mea kua whiwhi na ia i a ratou, erangi kia rite ki nga mea e whakaakona ai ia e korua e aku pononga, a ma te penei ka manaakitia ai ia e ahau, ki te kore e kore ia e whai painga.

5. Ko te kupu tenei a te Ariki, no te mea ko ahau te Atua, a kua tonoa e ahau taku Tama Kotahi ki te ao hei hoko i te ao, a kua puta taku kupu tera ka whakaorangia te tangata e manako ana ki a ia, ko ia e kore e manako ki a ia ka kanga.

6. A kua mea ratou ki te Tama a te tangata i ta ratou i pai ai; a kua tango ia i tana mana i runga i te ringa matau o tona kororia, a kua kingi ia i te rangi, a ka kingi tonu ia taea noatia te wa e heke iho ai ia ki te whenua, ki te takahi i ona hoa riri katoa ki raro i ona waewae, kua tata hoki taua wa.

7. Naku, na te Ariki, na te Atua, i whakapuaki tenei mea, ko te haora me te ra ia kahore e mohiotia e wai tangata.

8. No reira ko taku e pai ai, kia ripeneta katoa nga tangata, no te mea kei roto katoa i te hara, haunga nga mea kua pupuri ahau ki a au ano, nga tangata tapu kahore e mohiotia na e koutou;

9. No reira ko taku kupu tenei ki a koutou, kua tukua e ahau ki a koutou taku kawenata mau tonu; ae ra, ko taua kawenata i mau tonu i te timatanga ra ano.

10. A ko te mea kua whakaaria ai e ahau kua whakatutukitia e ahau, a ka tuohu nga iwi o te whenua ki taua mea, a ki te kahore i a ratou ano, ka hinga ratou, a ko te mea kua whakateiteitia e ia ano ka whakaititia tona mana;

11. No reira ka hoatu e ahau ki a koutou he whakahaunga kia haere koutou ki waenganui o tenei iwi a ka mea atu ki a ratou kia rite ki ta taku apotoro o mua, ko Pita tona ingoa;

12. Whakaponohia te ingoa o te Ariki, o Ihu, i runga nei ia i te whenua i mua, a ka hoki mai ano, ko te timatanga me te mutunga,

13. Ripeneta kia rumakina i runga i te ingoa o Ihu Karaiti kia rite ki te whakahaunga tapu, hei murunga hara;

14. A ko ia e mea ana i tenei mea ka whiwhi ia ki te homaitanga o te Wairua Tapu, he mea na te whakapakanga o nga ringaringa o nga kaumatua o tenei Hahi.

15. A me tenei ano, taku e mea nei ki a koutou, ko ia e whakakahore ana i te marenatanga, e hara i te mea whakaritea e te Atua, no te mea kua whakaritea e te Atua te marenatanga mo te tangata.

16. No reira e tika ana i te ture kia kotahi tana wahine, a ko raua tokorua he kikokiko kotahi, a ko tenei katoa he mea e rite ai i te whenua te take i hangaa ai ia.

17. A kia ki ano hoki ia i te mehua tangata kia rite ki tona hanganga i mua i te hanganga o te ao.

18. A ko ia e mea ana kia kaua e pa ki nga miti, ara kia kaua te tangata e kai i taua mea, e hara i te mea whakarite na te Atua.

19. No te mea, nana, kua whakaritea e te Atua ma te tangata nga kararehe o te parae, me nga manu o te rangi, me nga mea e puta ake ana i te whenua hei kai, hei kakahu ano hoki kia ranea ai ona oranga:

20. Otira kahore i homai kia nui ake nga oranga o tetahi i o tetahi atu; no reira kei roto te ao i te hara.

21. A, aue te mate mo te tangata whakaheke toto, e moumou kikokiko ranei i te mea kahore he tikanga o tana patu.

22. A me tenei ano, he pono taku e mea nei ki a koutou, e kore te Tama a te tangata e haere mai i runga i te ahua wahine, i runga ranei i te ahua o tetahi tangata e haere ana i te whenua.

23. No reira kei tinihangatia, erangi kia u tonu, e mataara ana ki nga rangi kia whakangaueuetia me te whenua kia wiri, me te tuoioi ano he tangata haurangi, a kia whakateiteitia nga raorao, a kia whakapapakutia nga wahi taratara, a ko enei mea katoa ina whakatangi te anahera i tana tetere.

24. Otira i mua i te taenga mai o te ra nui o te Ariki, ka tupu kaha a Hakopa i roto i te koraha, a ko nga Ramana ka puawai ano he putiputi.

25. A ka tupu kaha a Hiona i runga i nga pukepuke, ka whakamanamana hoki i runga i nga maunga, a ka huihui ki te wahi kua whakaritea e ahau.

26. Nana ka mea atu nei ahau ki a koutou, haere kia rite ki taku i whakahau ai ki a koutou—ripeneta ki o koutou hara katoa, inoia a ka whiwhi koutou, patukia a ka uakina ki a koutou.

27. Nana ka haere ahau ki mua ki muri i a koutou; ko waenganui hoki ahau i a koutou, a e kore koutou e whakapoauautia.

28. Nana ko Ihu Karaiti ahau, a hohoro tonu toku haerenga mai. Koia ano tenei. Amine.