1. E tika ana me noho koutou mo tenei wa i roto i o koutou kainga, kia rite ki te ahua o to koutou oranga;

2. A i te mea he whenua o koutou, me hoatu mo nga teina e ahu mai i te taha rawhiti;

3. A i te mea kahore o koutou whenua, me tuku atu ratou kia hoko whenua mo tenei wa i nga rohe awhio noa kia rite ki ta ratou e pai ai, no te mea e tika ana mo ratou kia whai wahi hei nohoanga mo tenei wa.

4. Ko te tikanga tika, ma koutou e tohu nga moni katoa e taea e koutou, me riro mai i a koutou i to koutou kaha i roto i te tika, a taihoa koutou ka ahei te hoko whenua mo te whakanohonoho; ae ra, he pa nui.

5. Ko te wahi ia kaore ano i rite te whakaaturanga mai, engari a muri atu i te haerenga mai o o koutou teina i te rawhiti, ko reira whakaritea ai etahi tangata, a ki a ratou ka hoatu ai te mohiotanga ki te wahi, ara ka whakakitea ki a ratou.

6. A ko ratou e whakaritea hei kai-hoko i te whenua, me te mahi i te timatanga o te whakatakotoranga i te turanga o te pa; a ko reira koutou timata ai te huihui tahi me o koutou hapu, tena tangata, tena tangata, kia rite ki tana ake hapu, e rite ana ki tona oranga, e rite hoki ki nga tohu atu ki a ia e te tumuakitanga, me te pihopa o te Hahi, e rite ana ki nga ture, me nga whakahaunga kua whiwhi na koutou, me nga mea meake nei riro i a koutou. Koia ano tenei. Amine.