1. He pono, he pono taku e mea atu ki a koe e taku pononga, e Pererika G. Wiremu, whakarongo ki te reo ona e korero nei i te kupu a te Ariki, a tou Atua, whakaritea te karangatanga kua karangatia nei koe; ae ra hei Tohunga Nui i roto i taku Hahi, hei kaunihera ano hoki ki taku pononga, ki a Hohepa Mete, tamaiti.

2. Kua hoatu nei hoki e ahau ki a ia nga kii o te kingitanga, no te Tumuakitanga o te Tohungatanga Nui tonu aua mea:

3. No reira he whakaaro naku ki a ia, a ka manaakitia ia me koe hoki, ki te u koe ki nga whakahauhau i roto i te turanga kua oti nei koe te whakarite e ahau, kia inoi reo tonu ai i roto i tou ngakau, i mua i nga tangata, i te wahi ngaro ranei, i roto i te wa hoki i a koe e minita ana, e kauwhau ana i te Rongo-pai ki te whenua o te hunga ora, i waenganui hoki i o teina:

4. I runga i te whakaritenga i enei mea ka mahia e koe te tino mahi pai ki ou hoa tangata, ka whakanuia hoki te kororia ona, ko ia nei to Ariki;

5. No reira kia u, e tu i runga i te turanga kua whakaritea nei koe e ahau, whakakahangia te hunga ngoikore, whakaarahia ake nga ringaringa nghengehe, whakakahangia hoki nga turi ngoikore;

6. Na, ki te u koe tae noa ki te mutunga, ka whiwhi koe ki tetahi karauna pirau-kore, ki te oranga mutunga-kore hoki i runga i nga nohoanga kua oti nei e ahau te whakarite i roto i te whare o toku Matua.

7. Nana, ko enei nga kupu o Arepa me Omeka, ara a Ihu Karaiti. Amine.