1. He whakakitenga na Ihu Karaiti ki tana pononga ki a Hohepa Mete, tamaiti, ki a ratou hoki ko nga kaumatau tokoono i a ratou e whakakotahitia ana o ratou ngakau me te karanga ake i o ratou reo ki runga.

2. Na, ko te kupu a te Ariki mo tana Hahi, e whakapumautia ana i nga ra o muri nei hei whakahokinga i tona iwi pera me tana kua oti te korero ma roto i nga mangai o ana poropiti mo te kohikohinga o ana Hunga Tapu kia tu ki runga ki te Maunga Hiona; ko ia nei ka meinga te pa a Hiruharama Hou.

3. Ka hanga nui hoki taua pa ki te wahi i wehea mo te temepara, i te wahi i tutohutia hoki ia e te matihao o te Ariki ki nga rohe hauauru o te takiwa o Mihuri; a, i whakatapua hoki e te ringa a Hohepa Mete, tamaiti, ratou ko etahi atu i ahuarekatia ai e te Ariki.

4. He pono ko te kupu tenei a te Ariki ma te whakahuihuitanga i nga Hunga Tapu, ka hanga te pa a Hiruharama Hou, timata ake ai ia i tenei wahi, ara te wahi o te temepara, kia hanga nei hoki ai te temepara i roto i tenei whakatupuranga;

5. He pono hoki, e kore tenei whakatupuranga e pahemo kia hanga ra ano tetahi whare ki te Ariki, ka tau iho hoki tetahi kapua ki runga, ko taua kapua, koia te kororia a te Ariki, mana e whakaki te whare.

6. Ko nga tama a Mohi, e rite ana ki te Tohungatanga Tapu i riro nei hoki i a ia i raro i te ringa o tona hungawai o Ietoro;

7. I riro i a Ietoro i raro i te ringa o Kerepe;

8. Ko Kerepe i raro i te ringa o Erehu;

9. Ko Erehu i raro i te ringa o Heremi;

10. Ko Heremi i raro i te ringa o Kara;

11. Ko Kara i raro i te ringa o Iraia;

12. Ko Iraia ia i raro i te ringa o te Atua.

13. I ora hoki a Iraia i nga ra o Aperahama, nana hoki ia i manaaki—

14. Ko taua Aperahama hoki i riro i a ia te Tohungatanga i a Merekihereke, ko ia i riro ai i roto i te kawai o ona matua tae noa ki a Noa.

15. A, i a Noa tae noa ki a Enoka ma roto i te kawai o o ratou matua;

16. A, i a Enoka tae noa ki a Apera (ko ia i kohurutia e tona tuakana) i whiwhi nei te Tohungatanga he mea ia na nga whakahaunga a te Atua, na te ringa hoki o tona matua o Arama, ko ia nei hoki te tangata tuatahi.

17. Kei te Hahi tonu o te Atua taua Tohungatanga i nga whakatupuranga katoa, a kahore he timatanga o nga ra, he mutunga ranei o nga tau.

18. I whakaukia hoki e te Ariki tetahi tohungatanga ki runga ki a Arona me ona uri i roto i o ratou whakatupuranga; ko ia hoki te tohungatanga e noho tahi tonu ana ki te Tohungatanga, ara te ritenga tapu rawa a te Atua.

19. Kei tenei Tohungatanga Nui te whakahaeretanga i te Rongo-pai, kei roto hoki nga kii o nga mea huna o te kingitanga, tae noa ki te kii o te matauranga o te Atua;

20. No reira i roto i ona tikanga e kite ana i te mana o te tika.

21. A, ki te kahore ona tikanga me te mana o te Tohungatanga e kore e kite i te mana o te tika i waenganui i nga tangata i roto i te kikokiko;

22. No te mea, ki te kahore tenei, e kore tetahi tangata e ahei te kite i te kanohi o te Atua, te Matua, a ora ano.

23. Na Mohi tenei i whakaako ki nga tamariki a Iharaira i te koraha; nana hoki ratou i tohutohu ki te whakatapu i tona iwi hei mea e ahei ai ratou te kite i te kanohi o te Atua.

24. Heoi kihai i taea te noho ki tona aroaro, na te whakapakeketanga hoki ia o o ratou ngakau; no reira te Ariki i runga i tona riri (kua tahu hoki tana riri ki a ratou) i oati ai, e kore ratou e tomo ki tona okiokinga i roto i te koraha, ko taua okiokitanga koia te raneatanga o tona kororia.

25. No reira i tangohia ake a Mohi e ia i roto i a ratou me te Tohungatanga Tapu ano hoki.

26. Heoi i waiho te tohungatanga iti kei roto i taua tohungatanga te kii o te minitatanga a nga anahera me te Rongo-pai whakatakatu.

27. Ko tenei Rongo-pai, he Rongo-pai no te ripenetatanga, no te rumakanga o te murunga hara, no te ture o nga tikanga o te kikokiko, i mea ai te Ariki i runga i tana riri kia noho ki te whare o Arona kei waenganui i nga tamariki a Iharaira tae noa ki a Hoani, na te Atua ia i whakaara ake ai, i whakaki ano hoki ki te Wairua Tapu i te kopu o tona whaea;

28. I rumakina hoki a ia i a ia e tamariki ana, i whakaritea ano hoki ia e te anahera a te Atua, i te wa e waru ona ra ki tenei mana hei whakahoro i te kingitanga o nga Hurai, hei whakatika hoki i te huarahi o te Ariki i te aroaro o tona iwi, hei whakariterite hoki i a ratou mo te haerenga mai o te Ariki kua oti nei te homai nga mana katoa ki tona ringa.

29. Ko tenei ano e tika ana hoki kia rite nga karangatanga o te kaumatua, o te pihopa hoki i roto i te Tohungatanga Nui.

30. Ko tenei ano he tika hoki kia rite nga karangatanga o te kai-whakaako, o te rikona hoki i roto i te tohungatanga iti; ko te tohungatanga ia i whakaukia ki runga ki a Arona ratou ko ana tama.

31. No reira ka pera me taku i ki mo nga tama a Mohi—ma nga tama a Mohi me nga tama a Arona ano hoki e tapae atu i nga homaitanga e pai ai me nga tapaenga hoki i roto i te whare o te Ariki, kia hanga hoki taua whare ki te Ariki i roto i tenei whakatupuranga, ki te wahi tapu kua oti i a au te whiriwhiri;

32. A ka whakaki ki te kororia o te Ariki nga tama a Mohi me nga tama a Arona ki runga ki Maunga Hiona, ki te whare o te Ariki, he tama hoki koutou nana; me te tokomaha hoki kua karangatia nei e ahau, kua tonoa atu ano hoki ki te hanganga ake i taku Hahi;

33. Ko te tangata e u ana a ka whiwhi ki enei Tohungatanga e rua kua kiia ake nei e ahau, ki te whakarite i a ratou karangatanga, e whakatapua ana ratou e te Wairua ki te whakahoutanga ano hoki i o ratou tinana.

34. E meinga ana hoki ratou he tama na Mohi, na Arona, na te uri o Aperahama, na te Hahi, na te kingitanga, na te hunga whiriwhiri hoki a te Atua;

35. Ko nga tangata e whiwhi ana ki tenei Tohungatanga e manako ana ki a au, e ai ta te Ariki;

36. Ko ia e manako ana ki aku pononga e manako ana ki a au.

37. Ko ia e manako ana ki a au e manako ana ia ki toku Matua.

38. A, ko ia e manako ana ki toku Matua e whiwhi ia ki te kingitanga o toku Matua, no reira ko a toku Matua ka hoatu te katoa ki a ia;

39. E rite ana tenei ki te oati me te kawenata o te Tohungatanga.

40. No reira ko te katoa e whiwhi ana ki te Tohungatanga e tango ana i tenei oati me te kawenata o toku Matua, e kore nei e takahia e ia, e whakanekehia atu ranei;

41. Heoi, ko te tangata e whakataka ana i enei kawenata i muri i tana tangohanga, a ka tino tahuri ke atu i taua mea, e kore ia e whai murunga hara i roto i tenei ao, i te ao meake puta mai.

42. Me te katoa ano hoki kahore e whiwhi ki tenei Tohungatanga, ki te mea kua whiwhi nei koutou, ko ia te mea e whakaukia nei e ahau ki runga ki a koutou nga mea i konei i tenei ra na toku reo i puta mai nei i nga rangi, ano ko taku i hoatu ai ki te mano tini o te rangi me aku anahera hei tiaki nei i a koutou.

43. Na, ka hoatu e ahau he whakahaunga ki a koutou, kia tupato ki a koutou ano, kia whai-whakaaro tonu hoki ki nga kupu o te oranga-tonutanga:

44. Ma nga kupu katoa e puaki ana i te mangai o te Atua, ka ora ai koutou.

45. Ko te kupu a te Ariki, he pono, ko te pono he maramatanga, ko te mea e marama ana he wairua, ara te Wairua o Ihu Karaiti;

46. A, e whakamaramatia ana e te Wairua nga tangata katoa e puta mai ana ki te ao; a ko nga tangata katoa i te ao e whakarongo ana ki te reo o te Wairua, e whakamaramatia ana ia e te Wairua;

47. Ko nga tangata katoa e whakarongo ana ki te reo o te Wairua ka haere ia ki te Atua ki te Matua;

48. A e whakaakona ana ia e te Matua ki te kawenata kna oti nei e ia te whakahou me te whakau i runga i a koutou hei whakaaro hoki ia ki a koutou ano, otira e hara ia i te mea mo koutou anake, engari mo te ao katoa:

49. E takoto hara ana te ao katoa, e aue ana i raro i te pouritanga me te herenga o te hara;

50. Ma tenei ka mohio ai koutou kei raro ratou i te herenga o te hara i te mea kahore ratou e haere mai ana ki a au.

51. Ko te tangata e kore nei e haere mai ki a au, kei raro ia i te herenga o te hara;

52. Ko ia e kore e rongo nei ki toku reo e kore e mohio ki toku reo, a e hara ia i a au.

53. A ma tenei ka mohio koutou ki te hunga tika i te hunga hara, ki te ao katoa ano hoki e aue ana ia i raro i te hara me te pouritanga inaianei ano.

54. A, i whakapouritia o koutou hinengaro i mua he mea na te whakapono kore, na ta koutou whakaaro noa iho hoki ki nga mea kua whiwhi nei koutou,

55. Nana hoki, na te horihori me te whakapono-kore i tau iho te whakahe ki te Hahi katoa.

56. Ko tenei whakaheanga e tau iho ana ki nga tamariki o Hiona, ae ra, ki te katoa;

57. Ka pera ta ratou noho i raro i tenei whakaheanga, kia ripeneta ra ano ratou me te mahara ki te kawenata hou, ara te Pukapuka a Moromona me o mua whakahaunga kua hoatu nei e ahau ki a ratou, e hara i te korero noa, engari kia mahi, kia rite ki taku i tuhituhi ai,

58. Kia whakaputaina mai e ratou nga hua e rite ana mo te kingitanga o to ratou Matua, ki te kahore he pera ka waiho he whiu, he whakawa hei ringihanga ki runga i nga tamariki o Hiona;

59. Ka waiho ranei ma nga tamariki o te kingitanga e whakapoke i taku whenua tapu ? He pono, ko taku e mea atu nei ki a koutou, kahore.

60. He pono, he pono taku e mea atu nei ki a koutou e rongo ana ki aku kupu, ko toku reo hoki ia, ka koa ano hoki koutou ki te inanako koutou ki enei mea;

61. Maku koutou o koutou hara e muru ki tenei whakahaunga kia puman tonu i roto i o koutou hinengaro i runga i te whakaaro tika me te wairua inoi, i runga i te whakaatu i te whakaaturanga ki te ao katoa mo aua mea e whakakitea ana ki a koutou.

62. No reira haere koutou ki te ao katoa, a, ko nga wahi e kore e taea e koutou me tono e koutou tetahi ki reira kia puta atu i a koutou tenei whakaaturanga ki te ao katoa, ki nga tangata katoa.

63. Ko taku i ki atu ki aku apotoro ka ki ano ki a koutou, no te mea he apotoro koutou naku; ae ra, ko a te Atua Tohunga Nui; ko koutou era kua homai e toku Matua ki a au, he hoa ano hoki koutou noku;

64. No reira ko taku i ki atu ai ki aku apotoro, ka ki ano ki a koutou; ko nga tangata katoa e whakapono ana ki a koutou kupu, me te rumaki ano ki te wai hei murunga hara ka whiwhi ki te Wairua Tapu.

65. A ka whai tahi enei tohu i te hunga whakapono.

66. Ma toku ingoa ka mahi ratou i nga mahi maha whakamiharo;

67. Ma toku ingoa ka pei rewera ai;

68. Ma toku ingoa ka whakaora i nga turoro;

69. Ma toku ingoa ka meinga nga kanohi o nga matapo kia kite, me nga taringa turi kia rongo;

70. A, ka korero ake te arero o te reo-kore;

71. A, ki te hoatu te paitini e tetahi tangata ki a ratou, e kore e ahatia ratou.

72. E kore e ahatia ratou e te paitini o te nakahi.

73. Heoi ka hoatu e ahau he whakahaunga ki a ratou kia kore ai ratou e whakamanamana ki enei mea, kei korerotia ranei ki te ao, no te mea e hoatu ana enei mea ki a koutou hei painga mo koutou ake, hei whakaoranga ano hoki.

74. He pono, he pono taku e mea atu nei ki a koutou, ko te tangata e kore nei e whakapono ki a koutou kupu, e kore hoki e rumakina ki te wai i runga i toku ingoa hei muru i o ratou hara kia whiwhi ki te Wairua Tapn, ka tau te he ki a ratou, e kore hoki ratou e tomo ki roto ki ta toku Matua kingitanga, ki te wahi hoki e noho ai maua ko toku Matua.

75. Na, ko tenei whakakitenga i a koutou me te whakahaunga ano hoki e whai tikanga ana i tenei haora i runga i te ao katoa; a ko te Rongo-pai he mea ma te katoa kahore ano kia whiwhi.

76. Heoi, he pono takn e mea atu nei ki nga tangata kua hoatu nei te kingitanga ki a ratou, ma koutou e kauwhau ki a ratou kia ripeneta ai ratou i o ratou hara o mua, no te mea ka riria ratou mo o ratou ngakau kino o te whakapono-kore; me a koutou teina ano hoki i Hiona mo ta ratou whananga ki a koutou i te wa i tono ai ahau i a koutou;

77. A tenei ano taku e mea ai ki a koutou e aku hoa, (no te mea ka karangatia koutou e ahau he hoa noku) he mea tika ia te hoatu i tenei whakahaunga ki a koutou; kia rite koutou ki aku hoa i nga ra i haereere tahi ai ahau me ratou ki te kauwhau i te Rongo-pai i runga i taku mana,

78. Kihai ano hoki ahau i tuku i a ratou kia whai putea, pukapuka moni ranei, kia takirua nga koti ranei;

79. Na, e tonoa atu ana koutou e ahau ki te whakamatau i te ao, a e ea ana i te kai mahi tana utu.

80. A ko te tangata e haere ana ki te kauwhau i tenei Rongo-pai o te kingitanga, a e kore hoki ia e ngakau kore ki nga mea katoa, e kore te hinengaro e ngenge, e pouri ranei i te tinana, te rara, te pona ranei: kahore hoki e makere tetahi makawe o tona matenga ki te whenua kahore e maharatia. E kore hoki ratou e haere mate-kai, mate-wai ranei.

81. No reira kaua e manukanuka ki nga mea mo apopo, ki nga mea ranei e kai ai koutou, ki ta koutou e inu ai ranei, ki te kakahu ranei e kakahu ai koutou;

82. Maharatia nga ringaringa o te whenua te tupu, e kore nei e mahi, e kore nei ano e miro, a ko nga kingitanga o te ao me a ratou kororia e kore nei e rite ki tetahi o enei te whai kakahu;

83. E matau ano hoki to koutou Matua i te rangi, e matea ana e koutou enei mea katoa.

84. No reira me waiho mo apopo o apopo mea.

85. Kaua hoki koutou e manukanuka i mua atu ki ta koutou e mea nei, engari me puranga tonu ake ki roto ki o koutou hinengaro nga kupu o te oranga, ka hoatu ano hoki ki a koutou i te haora pu ano te wahi e tika ai hei hoatutanga ki nga tangata katoa.

86. No reira kia kore tetahi tangata i waenganui i a koutou (ma te katoa ano hoki e u ana tenei whakahaunga, mo ratou hoki e karangatia e te Atua i roto i te Hahi ki te mahi minita) i tenei haora ano e mau putea, pukapuka moni ranei, e haere nei ki te whakapuaki i tenei Rongo-pai o te kingitanga.

87. Nana, ka unga atu koutou e ahau ki te whakatika i te ao mo a ratou mahi kino katoa, kia whakaakona ai ratou ki tetahi whakawakanga e puta mai ai.

88. A ko ia e manako ana ki a koutou, kei reira ano hoki ahau, no ka haere ahau ki mua i to koutou aroaro; ka tu ahau ki to koutou ringa matau, maui hoki, ka noho hoki toku Wairua ki o koutou ngakau, me aku anahera ka karapotitia koutou hei whakakaha ake i a koutou.

89. Ko ia e manako ana ki a koutou, e manako ana ki a au, a ka whangainga koutou e ia, ka whakakakahuria hoki koutou me te hoatu ano he moni ki a koutou.

90. Ko ia e whangai ana i a koutou, e kakahu ana ranei i a koutou, e hoatu moni ana ranei ki a koutou, e kore ia e hapa i tona utu.

91. A ko ia e kore nei e mahi enei mea, e hara ia i te akonga naku, ma tenei ka matau ai koutou ki aku akonga.

92. Ko ia ka kore nei e manako ki a koutou me haere atu i reira, ko koutou anake, me horoi hoki o koutou waewae ki te wai purata, ahakoa ra e wera ana, makariri ranei, me whakaatu atu ia ki to koutou Matua i te rangi kia kaua e hoki ano ki taua tangata.

93. A ko nga kainga, nga pa ranei e tomo ai koutou kia peratia ano.

94. Otira, rapua marietia, kaua e ruarua, aue te mate mo taua whare, taua kainga, taua pa ranei e whakakahore ana ki a koutou, ki a koutou kupu, ki ta koutou whakaaturanga ranei moku.

95. E ki ana ahau aue te mate mo taua whare, taua kainga, taua pa ranei e whakakahore nei i a koutou kupu, i a koutou whakaaturanga moku;

96. Na, ko ahau ko te Kaha Rawa kua oti ahau te whakapa i oku ringaringa ki nga iwi hei whakawhiu i a ratou mo a ratou mahi tutu;

97. A ka horapa atu nga whiu, a e kore aua mea e tangohia ake i te whenua kia whakaoti ra ano taku mahi e poroa i runga i te tika.

98. Kia matau mai ra ano ki a au te katoa e noho ana, ae ra i te iti ki te rahi, ka whakakiia ki te matauranga o te Ariki, ka kite hoki he kanohi, he kanohi, a ka whakanuia o ratou reo me te waiata tahi te reo ki tenei waiata hou, e mea ana—

99. Kua whakahoki te Ariki i Hiona

Kua hokona e te Ariki tona iwi a Iharaira,

He whiriwhiringa ia na te aroha noa,

I whakaputaina mai ai ia, he mea

Na te whakapono me te kawenata o o ratou matua.

100. Kua hokona e te Ariki tona iwi,

Kua herea hoki a Hatana, kua memeha hoki te taima;

Kua huihuia e te Ariki nga mea katoa ki te kotahitanga;

Kua whakaputa mai te Ariki i Hiona i runga.

Kua whakaputa ake te Ariki i Hiona i raro.

101. Kua aue te whenua, kua whakaputaina mai tona kaha:

A whakapumautia ana te pono ki roto ki ona whekau;

Kua emiemi mai ano te maramatanga o nga rangi ki runga ki a ia:

Kua oti nei hoki ia te whakakakahu ki te kororia o tona Atua;

Kei te tu ano ia ki waenganui i tona iwi.

102. Waiho atu ki to tatou Atua te kororia, te honore,

Te mana me te kaha; e kii ana hoki ia i te mahi tohu,

Te tika, te aroha, te pono me te rangimarie,

Mo ake, ake tonu atu, Amine.

103. Tenei ano he pono, he pono taku e mea atu nei ki a koutou, he tika ia ma nga tangata katoa e haere nei ki te whakapuaki i taku Rongo-pai mau tonu, ki te mea he hapu a ratou, a ka whiwhi ki nga moni e homai noa mai ana, me tuku atu e ratou ki a ratou, e whakamahi ranei hei painga mo a ratou hapu, kia pera me ta te Ariki e tohutohu ai ki a ratou he pai hoki tenei ki a au.

104. A ko ratou kahore a ratou hapu i whiwhi ki nga moni me tuku atu ki te Pihopa i Hiona, ki te pihopa ranei i Ohaio kia whakatapu ai ia hei whakaputanga mai i nga whakakitenga me te perehitanga hoki i taua mea, mo te whakapumautanga i Hiona.

105. A ki te homai e tetahi tangata ki tetahi o koutou he koti, he kakahu ranei me tango i te mea tawhito, hoatu ia ki te hunga rawa-kore, me haere atu i runga i te hari.

106. A ki te mea kei waenganui i a koutou tetahi tangata e toa ana i runga i te Wairua, mana e tango i te tangata ngoikore hei hoa mana kia whai pai ai ia i runga i te mahaki, kia meinga ai ia he mea toa ano hoki.

107. No reira me tango e koutou nga tangata kua oti nei te whakarite ki te tohungatanga iti, kia tono atu ratou ki mua i a koutou hei whakarite, hei whakapai hoki i nga tikanga me te huarahi ano hoki ma ratou hoki e whakarite i nga mahi e toe nei i a koutou e kore nei e ahei i a koutou te whakatutuki.

108. Na, ko tenei te mahi a aku apotoro i nga ra onamata hei hanga ake i taku Hahi ki a au.

109. No reira, kia tu nga tangata katoa ki runga i tana ake turanga mahi me te mahi ano hoki ki tana karangatanga; kia kaua hoki te matenga e mea ki nga waewae, kahore ana mahi ma nga waewae, no te mea ki te kahore nga waewae, me pewhea e tu ai te tinana ?

110. E whai tikanga ano te tinana ki nga wahi katoa kia whakapaia ngatahitia te katoa hei mea e tino rite ai te tinana katoa.

111. Ko te tikanga ia kia haereere nga Tohunga Nui me nga kaumatua ano hoki, tae noa ki nga tohunga iti ano hoki; engari ia me whiriwhiri nga rikona ratou ko nga kai-whakaako hei tiaki i te Hahi, me te tu tonu ano hei minita i roto i te Hahi.

112. A ko te pihopa ko Nuera K. Witini kia haereere ano hoki ki waenganui i nga peka ki te rapu i te hunga rawa-kore, hei minita ano hoki ki a ratou mo a ratou mea e hapa ana, he mea na te whakaititanga i te hunga taonga, i te hunga whakapehapeha ano hoki;

113. Ko te tikanga ano mana e whiriwhiri tetahi tangata hei whakarite i ana mahi ake kia rite ki tana e tohutohu ai:

114. Otira tukua te pihopa kia haere atu ki tei pa ki Niu Iaka, ki te pa ki Arapani ano hoki, ki te pa ki Pahitana ano hoki hei whakaatu ki nga tangata o aua pa ki te tangi o te Rongo-pai, ki te reo nui e whakaatu atu ana te whakamatenga me te whakakahoretanga e tatari ana mo ratou e whakakahore ana ki enei mea;

115. Me he mea e whakaparahakotia ana enei mea e ratou kua tata te haora o te whakawakanga mo ratou, a ka waiho to ratou whare kia takoto kau ano ki a ratou.

116. Kia whakawhirinaki a ia ki a au, a e kore ia e whakapoauautia, a e kore ano hoki tetahi o ona makawe e taka ki te whenua e kore e maharatia.

117. He pono taku e mea atu nei ki a koutou ki te toenga o aku pononga, me haere atu koutou kia rite ki te mea e ahei ana koutou i runga i a koutou karangatanga o tetahi, o tetahi ki nga pa whakaharahara, ki nga pa ririki hoki, me te whakahe i te ao i runga i te tika mo a ratou mahi tika-kore, whakarihariha hoki, e whakaatu atu ana i runga i te tino maramatanga te takoto kautanga o nga whakarihariha i nga ra whakamutunga;

118. Ko tenei, ma koutou, e ai ta te Ariki Kaha Rawa, maku e mea kia whawhati o ratou rangatiratanga, ahakoa ra ka whakangaueuetia te whemia e ahau, me nga rangi whetu kia tuoioi;

119. No te mea ko ahau te Ariki kua totoro atu toku ringa hei whakamahi i nga kaha o te rangi: e kore koutou e kite ia inaianei; engari e poto te wa ka kite koutou, a ka mohio ai ko ahau ano, a ka haere mai ahau ka kingi tahi me toku iwi.

120. Ko ahau te Arepa me te Omeka, te timatanga me te whakamutunga. Amine.