Wahanga 12
He whakakitenga i hoatu ki a Hohepa Naiti matua, ma roto i a Hohepa Mete, te Matakite, i Hamoni, Takiwa o Penihawenia, i a Mei, 1829.
1. Kua tata tetahi mahi nui whakamiharo te puta atu ki waenganui i nga tamariki a te tangata.
2. Nana, ko te Atua ahau, kia whai-whakaaro hoki ki taku kupu e tere nei, a kaha nei, koi atu i te hoari matarua, a wehea noatia nga ponapona me te hinu wheua, no reira whakarangona taku kupu.
3. Titiro, kua ma te maara kua rite mo te kotinga, no reira, ko ia e hiahia ana ki te kokoti, tukua ia kia aki iho i tana toronaihi i runga i tona kaha kokoti ai, i te roanga o te ra, kia purangatia ai mo tona wairua he oranga mutunga-kore i roto i te kingitanga o te Atua;
4. Ae ra, ko ia e aki iho ai i tana toronaihi kokoti ai, kua karangatia nga pera e te Atua;
5. No reira, e, ka inoi mai koe ki a au, ka whiwhi koe; e, ka patuki koe, ka uakina ki a koe.
6. Na, i te mea kua inoi mai koe, nana, ko taku tenei ki a koe, puritia aku whakahaunga, a me tohe ki te whakaputa mai, ki te whakapumau hoki i nga mahi mo Hiona.
7. Nana, ka korero atu ahau ki a koe, ki te hunga katoa ano hoki e hiahia ana ki te whakaputa mai, me te whakapumau hoki i tenei mahi,
8. A kaore e ahei ana i tetahi te awhina i roto i tenei mahi, ki te kore ia e ngakau papaku, e ki hoki i te aroha, e whai whakapono ana, e whai tumanako ana e atamai ana, e mokeke ana i roto i nga mea katoa, ahakoa he aha ranei e tukua hei tiakanga mana.
9. Nana, ko ahau te ora me te maramatanga o te ao e korero nei i enei kupu, no reira kia tupato i runga i tou marohirohi, katahi ka karangatia koe. Amine.