1. Nana, ko te kupu tenei a te Ariki ki taku pononga ki a Wiremu E. Makarerini, Ka koa koe no te mea kua huri mai koe i au mahi he, kua manako hoki ki aku mea pono, e ai ta te Ariki ta tou Kai-hoko, te Kaiwhakaora o te ao, ae ra, o te hunga katoa e whakapono ana ki tona ingoa.

2. He pono taku e mea atu nei ki a koe, ka koa koe mou i manako ki taku kawenata mau tonu, ae ra, ki te raneatanga o taku Rongo-pai, kua tukua atu na ki nga tamariki a te tangata, kia whiwhi ai ratou ki te ora, kia whai wahi ai ano hoki ki nga mea kororia e whakakitea a nga ra whakamutunga, rite tonu ki ta nga poropiti ratou ko nga apotoro i tuhituhi ai i nga ra o mua.

3. He pono taku e mea atu nei ki a koe e taku pononga e Wiremu, kei te ma koe; engari kahore te katoa; no reira me ripeneta koe mo nga mea kahore nei e pai ki taku titiro iho, e ai ta te Ariki, ma te Ariki ano hoki aua e whakaatu ki a koe.

4. A inaianei, he pono, ka whakaatu ahau te Ariki ki a koe i taku e pai ai kia meinga e koe, ara i taku whakaaro mou;

5. Nana, he pono taku e mea atu nei ki a koe ko taku hiahia kia kauwhautia e koe taku Rongo-pai i tetahi whenua puta noa atu ki tetahi whenua, i tetahi pa ki tetahi pa; ae ra, ki nga whenua e patata ana kahore nei ano kia kauwhautia te Rongo-pai ki reira.

6. Kaua e maha nga ra e noho ana i tenei kainga; kaua hoki e haere i tenei wa ki te whenua o Hiona; otira ki te whai kaha koe ki te tuku i tetahi mea ki reira, tukua; ki te kahore kaua e maharahara ki te whenua.

7. Haere ki nga whenua o te tai-rawhiti, me te kauwhau ano ki nga wahi katoa, ki nga iwi katoa, i roto i o ratou whare karakia, me te whiriwhiri ngatahi ano ine ratou.

8. Me haere taku pononga a Hamuera H. Mete hei hoa mou, kaua ano e whakarere i a ia, mau hoki ia e tohutohu; a ko te tangata e u ana ka hoatn he kaha ki a ia i nga wahi katoa, a ko ahau ko te Ariki, ka haere tahi me ia.

9. Whakatakotoria o korua ringaringa ki runga i nga turoro, a e ora ratou. Kaua e hoki mai ki te kainga, maku rawa ia, ma te Ariki korua e tono atu. Kia manawanui i roto i nga mate. Inoia a ka whiwhi korua. Patukia a ka uakina ki a korua.

10. Kaua e rapu i tetahi mea e raruraru ai korua. Waiho ake nga mea katoa kahore nei e tika. Kaua e puremu, he whakawainga hoki tena e whakararurarutia ana ou whakaaro.

11. Kia mahara ki enei kupu, he pono hoki enei mea, a ka whakanui koe i tou karangatanga, he maha ano hoki nga iwi e huihuia mai e koe ki Hiona; me nga waiata ano o te hari-mutunga-kore kei runga i o ratou matenga.

12. Kia u tonu to haere i roto i enei mea a taea noatia te mutunga, a e whiwhi koe ki te karauna o te oranga-tonutanga i te ringa matau o toku Matua, ki tonu i te aroha noa, i te pono.

13. He pono, ko te kupu tenei a te Ariki a tou Atua, a tou Kai-hoko, ara a Ihu Karaiti. Amine.