1. Ko te whakaarahanga ake o te Hahi o te Karaiti i enei ra whakamutunga, i te kotahi mano o waru rau e toru tekau o nga tau mai o te haerenga mai o to tatou Ariki, o te Kai-whakaora, o Ihu Karaiti i roto i te kikokiko, i ata whakaritea, i whakaturia hoki i runga i te ritenga o nga ture o to tatou whenua, i runga hoki i nga whakaaro me nga whakahaunga a te Atua, i te marama tuawha, i te ono o nga ra o te marama e kiia nei ko Aperira.

2. I hoatu nei hoki aua whakahaunga ki a Hohepa Mete, tamaiti, i karangatia nei e te Atua, a i whakapangia hoki ia hei Apotoro ma Ihu Karaiti, ko ia hoki te kaumatua tuatahi o tenei Hahi,

3. I hoatu hoki ki a Oriwa Kautere, i karangatia nei hoki e te Atua, hei Apotoro ma Ihu Karaiti, ko ia nei hoki te kaumatua tuarua o tenei Hahi, he mea whakapa i raro i ona ringa; (o Hohepa).

4. A e rite ana tenei ki te aroha noa o to tatou Ariki, o te Kai-whakaora, o Ihu Karaiti, mona hoki te kororia aianei, a ake tonu atu. Amine.

5. I muri i te tino whakaaturanga ki tenei kaumautua tuatahi mo ona hara kua murua atu ka rorerore ano ia i roto i nga tekanga noatanga o te ao;

6. Heoi i muri i tana ripenetatanga me tana whakaitinga i a ia ano i runga i te ngakau u, i na runga i te whakapono, ka minita te Atua ki a ia he mea na tetahi anahera tapu, te rite o tona kanohi ki te uira, a ko te ma o ona kakahu kei runga ake i o era atu mea ma katoa;

7. A hoatu whakahaunga ana ki a ia he mea i whiwhi matauranga ai ia;

8. Me te hoatu ano hoki ki a ia he mana no runga, hei whakamaori i te Pukapuka a Moromona, he meatanga na nga mea i whakaritea ai i mua, (te Urimi me te Tumime).

9. Kei roto nei hoki i taua pukapuka he tuhituhinga no tetahi iwi kua taka, kei roto hoki te raneatanga o te Rongo-pai o Thu Karaiti ki nga Tauiwi, ki nga Hurai ano hoki,

10. I hoatu nei i runga i te akiakinga a te wairua, a e whakapumautia ana ki etahi atu he meatanga na te mahi a nga anahera, a e whakapuakina ana e ratou ki te ao,

11. Hei whakamohio i te ao e tika ana nga Karaipiture Tapu, a e whakamohio ana te Atua i nga tangata, e karanga ana hoki i a ratou ki roto ki tana mahi tapu i roto i tenei wa me tenei whakatupuranga, e pera ana me nga whakatupuranga onamata,

12. Na tenei ano te whakaaturanga, tuturu tonu te Atua inanahi, aianei, a ake, ake, ake. Amine.

13. No reira, i te mea he nui rawa nga kai whakaatu, ka whakawakia te ao e ratou, ae ra, nga tangata katoa e whiwhi ai ki te matauranga o tenei mahi a muri ake nei;

14. A ko te hunga e whiwhi ai ki tenei matauranga i runga i te whakapono, a ka mahi i te tika, ka riro i a ratou te karauna o te oranga-tonutanga;

15. Ko te hunga ia e whakapakeke ana i o ratou ngakau i roto i te whapakonokore, a ka whakaparahako ki tenei matauranga, ka riro ia hei whakahenga mo ratou,

16. No te mea, na te Ariki, na te Atua tenei i korero; a ko maua ko nga kaumatua o te Hahi kua rongo a ka whakaatu nei mo nga kupu a te Runga rawa kororia i runga rawa, mona nei hoki te kororia, ake, ake, ake. Amine.

17. Na enei mea i mohio ai tatou he Atua ano kei te rangi, he mea kaha rawa e ora tonu ana, kaore ona timatanga, kaore hoki ona mutunga, ko taua Atua tuturu ano, te kai-hanga o te rangi me te whenua me nga mea katoa ano hoki i roto;

18. A nana hoki i hanga te tangata, te tane me te wahine, kia rite ki tona ake ahua, a kei roto i tona ahua te ahua i hanga ai raua e ia,

19. A hoatu whakahaunga ana ki a raua, kia aroha, kia mahi hoki raua ki a ia, ko ia anake te Atua ora tonu, te Atua pono, ko ia anake hoki ta raua e koropiko atu ai,

20. Heoi na te takahanga o enei ture tapu ka riro te tangata he hunga ngakau maori, he ahua rewera hoki tona, he hunga taka.

21. Mo konei ra i homai ai e te Atua kaha rawa tana Tama Kotahi, ko te mea hoki ia i tuhituhia i roto i nga Karaipiture kua homai nei e ia.

22. I mamae ia i nga whakamatautauranga, otira kihai ia i ngohengohe ki aua mea,

23. I ripekatia ia, i mate, a i ara ake ano i te toru o nga ra;

24. A kake ake ana ki te rangi, kia noho ki te ringa matau o te Matua, kia whakahaere tikanga hoki i runga i te mana kaha rawa, kia rite ki ta te Matua e hiahia ai.

25. Kia whakaorangia ai nga tangata katoa e whakapono ana, a ka rumakina i roto i tona ingoa tapu, a ka u i runga i te whakapono tae noa ki te mutunga:

26. E hara i te mea ko nga tangata anake i whakapono i muri i tona haerenga mai i roto i te kikokiko, i te wa i puta mai ai ia, erangi ko nga tangata katoa mai o te timatanga, ae ra, ko te hunga katoa i puta mai i mua i a ia, i whakapono nei ki nga kupu a nga poropiti tapu i korero nei ratou i runga i ta te Wairua Tapu i whakamahara ai, he pono hoki na ratou i whakaatu mona i roto i nga mea katoa, ko te hunga era e whiwhi ki te oranga-tonutanga,

27. Ka pera ano me te hunga e puta mai ai i muri, a ka whakapono ratou ki nga homaitanga me nga karangatanga a te Atua he meatanga na te Wairua Tapu, ko ia nei te kai-whakaatu mo te Matua raua ko te Tama;

28. Ko taua Matua nei raua ko te Tama me te Wairua Tapu he Atua kotahi, kaha rawa, ora tonu, kaore he mutunga mai. Amine.

29. A e mohio ana maua me ripeneta nga tangata katoa, me whakapono hoki ki te ingoa o Ihu Karaiti, a me koropiko atu ki te Matua i runga i tona ingoa me u hoki i roto i te whakapono ki tona ingoa tae noa ki te mutunga, ki te kore e kore ratou e whakaorangia ki roto ki te kingitanga o te Atua.

30. E mohio ana hoki maua, e tika ana, e pono ana te murunga hara i roto i te aroha noa o to tatou Ariki, o te Kai-whakaora, o Ihu Karaiti;

31. A e mohio ana ano hoki maua, e tika ana, e pono ana te whakatapunga i roto i te aroha noa o to tatou Ariki, o te Kai-whakaora, o Thu Karaiti, ki te hunga katoa e aroha ana, e mahi ana ki te Atua i runga i o ratou marohirohitanga katoa, me o ratou hinengaro katoa, me o ratou kaha katoa.

32. Otira, e taea ana ano e te tangata te taka i te aroha noa, me te kotiti atu i te Atua ora;

33. No reira, kia tupato te Hahi, kia hono tonu te inoi, kei taka ratou ki roto ki te whakamatautauranga;

34. Ae ra, kia tupato koa te hunga kua oti nei te whakatapu.

35. E mohio ana hoki maua, he pono enei mea, a e rite ana ki nga whakakitenga o Hoani, kahore e tapiritia ana ki te poropititanga, e tangohia ana ranei i te poropititanga o tona pukapuka, i nga Karaipiture Tapu, i nga whakakitenga ranei a te Atua e puta mai ai a muri ake, he mea na te homaitanga me te mana o te Wairua Tapu, na te reo pu ranei a te Atua, na te mahi minita ranei o nga anahera.

36. A na te Ariki, na te Atua tenei i korero, kia hoatu he honore, he mana, he kororia ki tona ingoa tapu, aianei, a, ake, ake, ake. Amine.

37. “A tenei ano i runga i te kupu whakahaunga ki te Hahi mo te ritenga o te Rumakanga.”—Ko te hunga katoa e whakaiti ana i a ratou ano ki te aroaro o te Atua, me te hiahia ano kia rumakina, a ka haere mai i runga i te ngakau maru me te wairua iro, a ka whakaatu ki te aroaro o te Hahi kua tino ripeneta ki o ratou hara katoa, a e pai ana ratou ki te tango ki runga ki a ratou te ingoa o Ihu Karaiti, me te mau o ratou whakaaro kia mahi tonu ki a ia tae noa ki te mutunga, me te tino whakaatu hoki i runga i a ratou mahi kua whiwhi ratou ki te Wairua o te Karaiti hei muru i o ratou hara, ko te hunga enei e tika ana kia rumakina ki roto ki te Hahi.

38. “Ko te mahi a nga kaumatua, a nga piriti, a nga kai-whakaako, a nga rikona, me nga mema hoki o te Hahi o te Karaiti.”—He kaumatua te apotoro, a ko tona karangatanga, hei rumaki.

39. Hei whakapa hoki i nga tangata hei kaumatua, hei piriti, hei kai-whakaako, hei rikona.

40. Hei whakatapu i te taro me te waina, nga ritenga o te kikokiko me nga toto o te Karaiti—

41. Hei whakau hoki i te hunga kua oti te rumaki ki roto ki te Hahi, i runga i te whakapakanga o nga ringaringa mo te rumakanga o te kapura me te Wairua Tapu, e rite ana ki nga karaipiture:

42. Hei whakaako, hei kauwhau, hei whakahauhau, hei rumaki, hei tiaki hoki i te Hahi;

43. Me te whakau hoki i te Hahi i runga i te whakapakanga o nga ringaringa, me te hoatutanga o te Wairua Tapu,

44. A ko ia hoki te kai-whakahaere o nga karakia katoa.

45. Ma nga kaumatua e whakahaere nga huihuirga i runga i te akiakinga a te Wairua Tapu ki a ratou, kia rite ki nga whakahaunga me nga whakakitenga o te Atua.

46. Ko te mahi a te piriti, ko te kauwhau, ko te whakaako, ko te whakamarama, ko te whakahauhau, ko te rumaki, me te whakatapu i te hakaremata

47. Me te torotoro hoki i te kainga o ia mema, o ia mema, me te whakahauhau ano i a ratou kia inoi-a-mangai, i roto hoki i nga wahi ngaro, kia whakaritea hoki nga mahi katoa e pa ana ki tona ake whanau;

48. E whai mana ana hoki ia ki te whakapa i nga tangata hei piriti, hei kai-whakaako, hei rikona.

49. Mana hoki nga huihuinga e whakahaere, i te mea kahore he kaumatua i reira.

50. Otira i te mea kei reira he kaumatua, heoi ano tana mahi he kauwhau, he whakaako, he whakamarama, he whakahauhau, he rumaki.

51. Me te torotoro hoki i te kainga o ia mema, o ia mema, e whakahauhau ana i a ratou kia inoi-a-mangai, i roto hoki i nga wahi ngaro, me te whakarite ano i nga mahi katoa e pa ana ki tana ake whanau.

52. I roto i enei mahi katoa me awhina te piriti i te kaumatua, me na ka hiahiatia.

53. Ko te mahi a te kai-whakaako, he tirotiro tonu i te Hahi, he noho hoki i a ratou, hei whakakaha i a ratou i nga wa katoa.

54. Me te tupato ano kia kaua he mahi kino i roto i te Hahi—kia kaua hoki he mauahara, tetahi ki tetahi—he korero teka, he ngau-tuara, he korero kino ranei.

55. A ko tana hoki, hei mea i te Hahi kia hui putuputu ratou, hei mea hoki i nga mema katoa kia whakarite i a ratou mahi ake.

56. Mana hoki e whakahaere nga huihuinga i te mea e ngaro ana te kaumatua me te piriti.

57. a ma te rikona ia e awhina i roto i ana mahi katoa, i nga wa katoa e hiahiatia ai ia.

58. Heoi kaore o te kai-whakaako, o te rikona ranei mana ki te rumaki, ki te whakatapu i te hakaremeta, ki te whakapa ringaringa ranei.

59. Engari ma ratou e whakaohiti, e whakamarama, e whakahauhau, e whakaako, e powhiri atu ki te katoa kia haere mai ki a te Karaiti.

60. Na ko te tikanga kia whakapangia ia kaumatua, ia piriti, ia kai-whakaako, ia rikona, ki te ritenga o nga homaitanga me nga karangatanga o te Atua ki a ia; kia whakapangia hoki ia i runga i te mana o te Wairua Tapu e mau nei i roto i te kai-whakapa.

61. Me tu nga hui o nga kaumatua o tenei Hahi o te Karaiti ia toru marama, ia toru marama, ara, i tena wa, kia rite ki ta enei huihuinga e whakarite ai;

62. Ma aua huihuinga hoki e whakariterite nga mahi katoa o te Hahi e tika ana kia meatia.

63. Me tango e nga kaumatua o ratou raihana i etahi atu kaumatua, i runga i te pooti o te Hahi ranei (ara, o te peka) e noho nei ratou, me tango ranei i nga huihuinga.

64. Ia piriti, ia kai-whakaako, me ia rikona, e whakapangia nei e tetahi piriti, me tango e ia he tiwhikete i a ia i taua wa ano, a ko taua tiwhikete nei, ina hoatu ki tetahi kaumatua, ka whiwhi ia ki tetahi raihana, hei whakamana i a ia ki te whakarite i nga mahi a tona karangatanga, ka whiwhi ranei ia ki taua raihana i tetahi huihuinga.

65. Kaua tetahi tangata e whakapangia ki tetahi turanga i roto i tenei Hahi, i te wahi kua oti nei he peka o te Hahi te whakatu ki reira, engari i runga i te pooti o taua Hahi;

66. Engari ko nga kaumatua whakahaere tikanga, ratou ko nga pihopa e haereere ana, ko nga Kairunanga Nui, ko nga Tohunga Nui, me nga kaumatua, e whakaaengia ana kia whakapa, ki nga wahi kaore nei he peka o te Hahi kia karangatia ai he pooti.

67. Ma tetahi Runanga Nui, ma tetahi huihuinga nui ranei, e whakahaere i te whakapakanga o ia Tumuaki o te Tohungatanga Nui, (ara, nga kaumatua whakahaere tikanga), nga pihopa, nga Kai-runanga Nui, me nga Tohunga Nui.

68. “Ko te mahi a nga mema i muri i ta ratou urunga ma roto i te rumakanga.”—Me whai taima nga kaumatua, nga piriti ranei ki te whakamarama i nga tikanga katoa mo te Hahi o te Karaiti ki o ratou hinengaro, i mua o ta ratou kainga i te hakaremeta, me to ratou whakaunga e te whakapakanga o nga ringaringa o nga kaumatua, kia tino tika ai nga meatanga o nga mea katoa.

69. A ma nga mema e whakaatu ki te aroaro o te Hahi, ki te aroaro hoki o nga kaumatua, i runga i te haere me te korero no ta te Atua nei te ahua, e tika ana ratou mo te kai i te hakaremeta, kia ai he mahi, he whakapono e rite ana ki ta nga karaipiture Tapu, kia haere hoki i runga i te tapu i te aroaro o te Atua.

70. Ko nga mema katoa o te Hahi a te Karaiti he tamariki nei a ratou, me mau mai ratou ki te kaumatua ki te aroaro o te Hahi, a ma ratou e whakapa o ratou ringaringa ki runga ki a ratou (nga tamariki) i runga i te ingoa o Ihu Karaiti, a ka manaaki i a ratou i runga i tona ingoa.

71. E kore tetahi e whakaaengia kia uru ki roto ki te Hahi o te Karaiti, haunga ratou kua tae nei ki nga tau e matau ai ratou ki te pai, ki te kino i te aroaro o te Atua, a e ahei ana hoki ratou te ripeneta.

72. Ko te ritenga tenei e minititia ai te rumakanga ki te hunga katoa e ripeneta ana:—

73. Ko te tangata kua karangatia e te Atua, a he mana hoki tona no Ihu Karaiti ki te rumaki, ka haere iho ki roto ki te wai raua tahi ko te tangata kua hiahia nei kia rumakina, a ka mea, e karanga ana i a ia ki tona ingoa—Kua whakamanaia ahau e Ihu Karaiti ka rumakina koe e ahau i runga i te ingoa o te Matua, o te Tama, o te Wairua Tapu. Amine.

74. Katahi ia ka rumaki i a ia ki roto i te wai a ka puta mai ano ki waho i te wai.

75. Na ko te tikanga tika kia huihui putuputu te Hahi ki te kai i te taro me te waina, hei whakamaharatanga ki te Ariki ki a Ihu;

76. A ma te kaumatua, ma te piriti ranei e whakatapu te hakaremeta, me tuturi ia me te Hahi ka karanga ki te Matua i roto i te inoi mahaki, ka mea—

77. E te Atua, e te Matua ora tonu, e inoi ake ana matou ki a koe i runga i te ingoa o tau Tama o Ihu Karaiti, kia whakapaingia, kia whakatapua tenei taro mo nga wairua o te hunga katoa e kai ana, kia kainga e ratou hei whakamaharatanga ki te tinana o tau Tama, me te whakaatu atu ki a koe, e te Atua, e te Matua ora tonu, e whakaae ana ratou kia mau ki runga ki a ratou te ingoa o tau Tama a ka mahara tonu ki a ia, ka pupuri i ana ture i homai nei e ia ki a ratou, kia noho tonu ai tona Wairua i a ratou. Amine.

78. Ko te ahua e whakatapua ai te waina. Na, ka tango hoki ia i te kapa a ka mea—

79. E te Atua, e te Matua ora tonu, e inoi ake ana matou ki a koe i runga i te ingoa o tau Tama, o Ihu Karaiti, kia whakapaingia, kia whakatapua tenei waina mo nga wairua o te hunga katoa e inu ana, kia meatia e ratou hei whakamaharatanga ki nga toto o tau Tama i whakahekea nei mo ratou; kia whakaatu atu ai ratou ki a koe e te Atua, e te Matua ora tonu, ka mahara tonu ratou ki a ia, kia noho ai tona Wairua i a ratou. Amine.

80. Me he mea ka hara tetahi mema o te Hahi o te Karaiti, ki te mau ranei i roto i tetahi he, ka whakawakia ia kia rite ki ta nga karaipiture.

81. Ko te mahi tenei ma ia peka, ma ia peka, o te Hahi o te Karaiti, me tono atu e ratou tetahi o a ratou kai-whakaako, tokomaha atu ranei kia haere ratou ki nga huihuinga katoa o nga kaumatua o te Hahi;

82. Kia kawea atu hoki e ratou nga ingoa o nga mema katoa kua uru nei ki te Hahi mai o te huihuinga whakamutunga, ma tetahi piriti ranei e kawe atu, kia tiakina ai nga ingoa o te Hahi katoa i roto i tetahi pukapuka e tetahi o nga kaumatua, ara, e tera e whakaritea ai e era atu kaumatua i tenei wa, i tenei wa;

83. Waihoki kia murua ai ano hoki i te pukapuka nui o nga ingoa o te Hahi; me he mea kua tapahia atu etahi i te Hahi.

84. Ko nga mema katoa e haere atu ana i te peka o te Hahi e noho nei ratou, ki tetahi peka kahore ratou e mohiotia ana, me tango he reta, e whakaatu ana he mema tuturu ratou, a he pai to ratou tunga, ma tetahi kaumatua, ma tetahi piriti ranei e haina taua reta, me he mea e mohio ana te mema e whiwhi nei te reta, ki taua kaumatua, piriti ranei; me haina ranei taua reta e nga kai-whakaako, e nga rikona ranei o te Hahi. Amine.