1. Nana, ko taku kupu tenei ki a koe, no te mea i tuku atu koe i nga tuhituhinga i hoatu ai ki a koe he mana hei whakamaori, ma roto i te Urimi me te Tumime, a taka atu ana ki nga ringaringa o tetahi tangata kino, kua ngaro i a koe.

2. Me te ngaro ano hoki i a koe te homaitanga (mana) i taua wa ano, a pouri ana tou hinengaro;

3. He ahakoa ra, kua whakahokia atu ano ki a koe inaianei; no reira kia whakaaro iho koe kia u ki te pono, a kia hono tonu tau mahi a taea noatia te mutunga o te toenga o te mahi whakamaoritanga, kia pera me tau i timata ai:

4. Kaua e tere atu tou oma, e nui atu ranei tau mahi, i te kaha o tou tinana, me nga huarahi i hoatu ki a koe e ahei ai koe te whakamaori; otira kia u taea noatia te mutunga.

5. Kia hono tonu te inoi, kia riro i a koe te wikitoria; ae ra, kia hinga ai i a koe a Hatana, a kia puta atu ai koe i roto i nga ringaringa o nga pononga o Hatana, e tautoko nei i ana mahi.

6. Titiro, kua whai ratou kia whakamatea koe; ae ra, taua tangata ano i whakaaro pono nei koe ki a ia, kua whai kia whakamate i a koe.

7. A, no konei ano i ki ai ahau, he tangata kino ia, no te mea kua whakaaro ia kia tangohia atu nga mea i tukua nei ki a koe; a kua whai ano hoki ia kia whakakorea atu tou homaitanga.

8. A, no te mea i tukua atu e koe nga tuhituhinga ki roto ki ona ringaringa, titiro, kua kapohia atu aua mea i a koe e nga tangata kino:

9. No reira, kua taka atu aua mea i a koe, ki roto i te kino, ae ra, aua mea tapu.

10. A, nana, kua whakaurua e Hatana ki roto ki o ratou ngakau, kia whakarereke i nga kupu i meinga nei e koe kia tuhituhia, ara i whakamaoritia nei e koe, a, kua taka atu nei i roto i ou ringaringa.

11. Nana, ko taku kupu tenei ki a koe, i te mea kua whakarereketia e ratou nga kupu, kua rereke hoki te korerotanga i tau i whakamaori ai, i mea ai kia tuhituhia;

12. A, i runga i tenei aronga, kua whai te rewera kia whakatakoto i tetahi tikanga mohio e kore ai i a ia tenei mahi.

13. No te mea kua whakaurua e ia ki roto i o ratou ngakau kia mahi penei, a ma te korero teka e ki ai ratou, kua mau koe i a ratou, i roto i nga kupu i kiia ai e koe, nau i whakamaori..

14. He pono, taku e mea atu nei ki a koe, e kore au e tuku i a Hatana kia whakatutuki i tana tikanga kino i roto i tenei mea,

15. Ina, kua whakaurua e ia ki roto i o ratou ngakau kia meinga koe kia whakamatautau i te Ariki, i tou Atua, kia tono kia whakamaoritia ano;

16. A, ko reira ratou ki ai, mahara ai i roto i o ratou ngakau, e kite tatou kua hoatu ranei e te Atua he mana ki a ia hei whakmaori; me he mea kua pera, ka hoatu ano e ia taua mana ki a ia;

17. A ki te hoatu ano e te Atua taua mana ki a ia, ara, ki te whakamaori ano ia, ara, ki te whakaputaina mai e ia ko aua kupu ano, nana, kei a tatou ano era, kua rereke hoki i a tatou:

18. No reira, e kore e rite, a, ka ki tatou, kua korero teka ia i roto i ana kupu, a kaore ona homaitanga, kaore hoki ona mana:

19. No reira, ka whakamoti tatou i a ia, me te mahi ano hoki, a ka penei ta tatou meatanga, kia kore ai tatou e whakama i te mutunga, kia whiwhi ai hoki tatou ki te kororia o te ao.

20. He pono, he pono taku e mea atu nei ki a koe, kua whai kaha nui a Hatana ki o ratou ngakau, e whakakiki ana hoki ia i a ratou kia tutu ki te pai.

21. A kua kino o ratou ngakau, ki tonu i te tutu me te whakarihariha, a nui ke atu to ratou aroha ki te pouritanga i to ratou ki te maramatanga; he kino hoki no a ratou mahi, no reira e kore ratou e ui mai ki a au.

22. E whakakiki ana a Hatana i a ratou kia arahina ai e ia o ratou wairua ki te whakangaromanga.

23. A penei kua takoto i a ia he tikanga mokeke, i runga i te whakaaro kia whakamoti i te mahi a te Atua, heoi, ka tonoa tenei e ahau i o ratou ringaringa, a ka riro tenei hei whakamatanga, hei whakahenga mo ratou a te ra whakawa;

24. Ae ra, e whakakiki ana ia i o ratou ngakau, kia riri ki tenei mahi;

25. Ae ra, e mea ana ia ki a ratou, e tinihanga, e whanga puku ki te hopu, kia whakangaro ai koutou; kahore he kino i tenei, a e penei ana tana whakapatipati i a ratou, me te ki ano ki a ratou, kaore he hara o te korero teka, kia mau ai i a ratou he tangata i roto i tetahi korero teka, kia whakangaro ai ratou i a ia.

26. A penei ai ana whakapatipatinga i a ratou, a ka arahina haeretia ratou, a toia ana e ia o ratou wairua ki raro ki te reinga; a penei tana meatanga i a ratou kia mau ai ratou i roto i ta ratou ake mahanga.

27. A penei tonu tana haere, tona kopikopiko i te ao, e rapu ana kia whakamatea nga wairua o nga tangata.

28. He pono, he pono taku e mea atu nei ki a koe, aue te mate mo te tangata e korero teka ana hei tinihanga mana, i te mea e whakaaro ana ia, kei te korero teka tetahi atu hei tinihanga mana, ina, kaore e kore te whakawa tika a te Atua e tau ki nga pera.

29. Nana, kua whakarereketia e ratou enei kupu, no te mea e ki ana a Hatana ki a ratou, kua tinihangatia koutou e ia, a penei tonu ana whakapatipatinga i a ratou kia mahi i te kino, hei mea i a koe kia whakamatau i te Ariki i tou Atua.

30. Nana, ko taku kupu ki a koe, kaua koe e whakamaori ano i aua kupu kua taka atu nei i roto i ou ringaringa;

31. Nana, e kore e tutuki i a ratou a ratou whakaaro kino i te korero teka mo aua kupu. No te mea, nana, ki te whakaputa koe i aua kupu ano ka mea ratou kua korero teka koe, kua mea hoki koe ki te whakamaori, otira kua he koe i tau i tuhituhi ai.

32. A, nana, ka panui atu ratou i tenei, a ka whakapakeke a Hatana i nga ngakau o te iwi, ka whakaoho i a ratou kia riri ki a koe, kia kore ai ratou e whakapono ki aku kupu.

33. A penei tonu ai nga whakaaro a Hatana kia taea ai tau whakaaturanga i roto i tenei whakatupuranga, kia kore ai e puta mai te mahi (a te Atua) i roto i tenei whakatupuranga.

34. Otira, nana, he whai-whakaaro tenei, a no te mea ka whakaaturia e ahau he whai-whakaaro ki a koe, he meatanga mau, kaua e whakakitea atu ki te ao kia poto rawa i a koe te whakamaoritanga.

35. Kaua e miharo ki taku i mea ai ki a koe, he whai-whakaaro tenei, kaua e whakakitea ki te ao; ina, i ki ai ahau kia kaua e whakakitea ki te ao, kia tiakina ai koe.

36. Nana, e kore ahau e ki, kaua koe e whakakitea atu ki te hunga tika;

37. Otira i te mea kaore koe e matau i nga wa katoa ki te hunga tika, ara, i te mea kaore koe e mohio i nga wa katoa ko tehea te hunga kino i te hunga tika, na reira taku kupu ki a koe, e noho puku ai taka noa te wa e whakaaro ai ahau hei hurahanga i nga mea katoa ki te ao mo tenei mea.

38. Na, he pono taku e mea atu nei ki a koe, kei runga i nga papa o Niwhai e mau ana tetahi whakaaturanga o nga mea kua oti nei i a koe te tuhituhi, kua taka atu nei hoki i ou ringaringa:

39. Ae ra, e mahara ana hoki koe i korerotia i roto i aua tuhituhinga tera te tino whakaaturanga o enei mea kei runga i nga papa o Niwhai e mau ana.

40. Na, no te mea e tino pa ana te whakaaturanga e mau nei i runga i nga papa o Niwhai, ki nga mea, i runga i toku whai-whakaaro, era e hurahia atu e ahau ki te matauranga o te iwi i roto i tenei tuhituhinga;

41. No reira, me whakamaori koe i nga tuhituhinga e mau nei i runga i nga papa o Niwhai, a tae koe ki te whakahaeretanga o Kingi Peniamine, ara, tae noa ki taua wahi kua oti te whakamaori e koe, kua puritia nei hoki e koe;

42. Nana, me panui atu ia e koe ko te tuhituhinga o Niwhai, a penei ka whakapoauau ahau i te hunga nana i whakarereke aku kupu.

43. E kore ahau e tuku ma ratou e whakangaro taku mahi; ae ra, ka whakaatu ahau ki a ratou nui ke atu toku matauranga i to te rewera tinihanga.

44. Nana, kei a ratou tetahi wahi anake, ara, tetahi whakapototanga o te tuhituhinga o Niwhai

45. Nana, he nui nga mea e mau nei i runga i nga papa o Niwhai, e tino whakamarama ana i nga tikanga o taku Rongo-pai; na reira, he whai-whakaaro i roto i a au, kia whakamaori koe i tenei, i te wahi timatanga o te tuhituhinga o Niwhai, ka tuku atu ai i roto i tenei tuhituhinga.

46. A, nana, kei roto i nga wahi toenga katoa o tenei tuhituhinga aua wahi katoa o taku Rongo-pai i hiahiatia ai e aku poropiti tapu, ae ra, e aku akonga ano hoki i roto i a ratou inoinga kia puta mai ki tenei iwi.

47. A i mea atu ahau ki a ratou, ka rite ki to ratou whakapono i roto i a ratou inoinga, te meatanga atu ki a ratou;

48. Ae ra, ko to ratou whakapono tenei, ko taku Rongo-pai i hoatu nei e ahau ki a ratou, kia kauwhautia atu e ratou i roto i o ratou ra, kia puta hoki ki o ratou teina, ki nga Ramana, ki te hunga ano hoki kua riro nei hei Ramana, he mea na a ratou tautohetohenga.

49. Na, e hara tenei i te katoa—ko to ratou whakapono ia i roto i a ratou inoinga, ko tenei Rongo-pai kia whakaaturia hoki, me he mea e taea kia nohoia tenei whenua (Amerika) e etahi iwi ke;

50. A i runga i tenei ahuatanga i waiho ai e ratou he manaakitanga ki runga i tenei whenua i roto i a ratou inoinga, kia whiwhi ai ki te oranga-tonutanga te hunga katoa e whakapono ana ki tenei Rongo-pai i tenei whenua;

51. Ae ra, kia ai ia (te Rongo-pai) he mea here-kore ki te katoa, ahakoa no tehea iwi, hapu, reo, huihuinga tangata ranei.

52. A inaianei, ka rite ki to ratou whakapono i roto i a ratou inoinga, taku kawenga i tenei wahi o taku Rongo-pai ki te matauranga o toku iwi. Nana, e kore ahau e kawe i a ia hei whakangaro i tera kua riro noa atu nei i a ratou, engari hei hanga ake.

53. A mo tenei take kua ki atu ahau, ki te kore tenei whakatupuranga e whakapakeke i o ratou ngakau, ka whakaturia e ahau taku Hahi ki waenganui i a ratou.

54. Na, kahore ahau e ki ana i tenei hei whakangaro i taku Hahi, engari hei hanga ake i taku Hahi;

55. No reira, ko nga mema o taku Hahi kaore he ritenga kia wehi, ka nohoia hoki te kingitanga o te rangi e nga pera;

56. Erangi ko ratou, ko te hunga kaore nei e wehi ki a au, kaore nei hoki e pupuri i aku whakahaunga, erangi e hanga ake ana i nga hahi ki a ratou ano kia whai taonga ai ratou, ae ra, me te hunga hoki e mahi kino ana e hanga ake ana i te kingitanga o te rewera, ae ra, he pono, he pono taku e mea atu nei ki a koe ko ratou taku e whakararuraru ai, a e mea ai kia wiriwiri, kia oioi hoki a, roto rawa.

57. Nana, ko Ihu Karaiti ahau, ko te Tama a te Atua. I haere mai ahau ki oku ake, a kihai oku ake i manako mai ki a au.

58. Ko ahau te maramatanga e tiaho ana i roto i te pouritanga, te matauria hoki e te pouritanga.

59. Ko ahau ia i mea ra ki aku akonga, he hipi atu ano aku e hara nei i tenei kahui, a he tokomaha kihai i matau ki aku kupu.

60. A ka whakaaturia e ahau ki tenei iwi he hipi atu ano aku, a, he manga hoki ratou no te whare o Hakopa;

61. Ka hurahia hoki e ahau ki te maramatanga a ratou mahi whakamiharo, i meatia ai e ratou i roto i taku ingoa;

62. Ae ra, ka whakaputaina mai hoki e ahau ki te maramatanga taku Rongo-pai i minitatia atu ai ki a ratou, a nana, e kore ratou e whakakahore i tena kua whiwhi na koe, engari ka hanga ake e ratou, ka whakaputaina mai hoki ki te maramatanga nga pitopito pono o taku akoranga, ae ra, o te akoranga anake i roto i a au.

63. A ka meatia tenei e ahau kia whakaturia ai e ahau taku Rongo-pai, kia iti haere ai hoki nga tautohetohenga; ae ra, e whakakiki ana a Hatana i nga ngakau o te iwi kia tautohetohe mo nga tikanga o taku akoranga; a e pohehe ana ratou i roto i enei mea, ina, e whakawiri ana ratou i nga karaipiture, te matau hoki ki a ratou;

64. Koia ahau ka hurahia tenei mea ngaro ki a ratou;

65. No te mea nana, ka whakaminea ratou e ahau ka peratia ano me te heihei e whakamine nei i ana pi ki raro i ona parirau, me he mea ki te kore ratou e whakapakeke i o ratou ngakau.

66. Ae ra, ki te pai ratou kia haere mai, e whakaaetia ana, kia inu noa i nga wai o te ora.

67. Nana, ko taku akoranga tenei: ko ia e ripeneta ana me te haere mai ki a au, no taku Hahi nga pera.

68. Ko te tangata e whakapuaki ana kia nui atu, kia iti iho ranei i tenei, e hara i a au ia, engari he hoa-riri ki a au, no reira e hara i taku Hahi ia.

69. A tenei nana, ko te tangata o taku Hahi e u tonu ana ki taku Hahi taea noatia te mutunga, ka whakapumautia ia ki runga ki taku kamaka, e kore hoki nga kuwaha o te reinga e whai kaha ki runga ki a ratou.

70. Na, maharatia nga kupu ana, (a te Karaiti) ko ia nei te ora me te maramatanga o te ao, to koutou Kai-hoko to koutou Ariki me to koutou Atua. Amine.