1. He pono, ko te kupu tenei a te Ariki ki a koutou, ki ana e aroha ana, a ko te hunga e arohaina ana e ahau, e pakia ana ano e ahau, ma reira hoki o ratou hara ka murua ai, kei roto hoki i te pakinga i a ratou taku whakaputanga i a ratou ki waho i te whakamatautauranga i roto i nga mea katoa, kua aroha ano hoki ahau ki a koutou.

2. No reira, e tika ana kia pakia koutou, kia riria hoki i mua i toku aroaro.

3. Kua hara hoki koutou ki a au, he hara tino taumaha ano, ara kahore koutou i mahara ki te tino whakahaunga i roto i nga mea katoa, kua hoatu e ahau ki a koutou mo te hanganga i toku whare,

4. Ina hoki kahore koutou i mahara ki te whakatakatutanga i hiahiatia ai e ahau kia whakatakatutia aku apotoro, hei whakapai i taku maara-waina mo te wa whakamutunga, he mea e whakaputaia ai e ahau aku mahi whakamiharo, kia ringihia atu ai e ahau toku Wairua ki runga ki nga kikokiko katoa.

5. Nana, he pono taku e mea atu nei ki a koutou, he maha kua oti te whakatapu i waenganui i a koutou kua karangatia nei e ahau, otira he ruarua o ratou kua whiriwhiria.

6. Ko ratou kua whiriwhiria kua hara i tetahi hara taumaha, i te mea e haere ana ratou i roto i te pouritanga, ahakoa e awatea ana.

7. A mo taua ahua, ka hoatu e ahau ki a koutou tenei whakahaunga, ara karangatia e koutou tetahi huihuinga karakia mo koutou, kia tae ake a koutou noho-pukutanga, a koutou tangihanga ki nga taringa o te Ariki o nga Mano, ko tona tikanga ina whakamaoritia, ko te Kai-hanga o te ra tuatahi, te timatanga me te whakamutunga.

8. Ae ra, he pono taku e mea atu nei ki a koutou, kua oti te hoatu e ahau he whakahaunga ki a koutou kia hanga e koutou tetahi whare, i whakaaro hoki ahau hei roto i taua whare te hunga i whiriwhiria e ahau ka whakawhiwhi ai ki te mana i heke iho i irunga;

9. Ko ta te Matua hoki tenei i whakaari ai ki a koutou; no reira koutou i whakahaua ai e ahau kia noho, kia pera me aku apotoro i Hiruharama;

10. He ahakoa ra kua hara aku pononga, he tino taumaha ano to ratou hara, a ara ake ana nga tautohetohenga i roto i te kura o nga poropiti, a he tino mea kino tena ki a au, e ai ta to koutou Ariki; no reira ka tukua atu ratou e ahau kia pakia.

11. He pono ko taku kupu tenei ki a koutou, ko taku e pai ai kia tahuri koutou ki te hanga whare, ki te puritia e koutou aku whakahaunga ka whai kaha koutou ki te hanga i taua whare;

12. A ki te kahore e puritia e koutou aku whakahaunga, e kore te aroha o te Matua e noho ki a koutou, no reira ka haere koutou i roto i te pouritanga.

13. Na tenei te matauranga, me ta te Ariki i pai ai; hanga te whare, kaua ia e rite ki ta te ao, e kore hoki ahau e pai kia rite ta koutou noho ki te noho a te hunga o tenei ao;

14. No reira, hanga te whare kia rite ki te tauira ka whakaaturia e ahau ki te hunga tokotoru o koutou, ma koutou hoki ratou e whakarite, e whakawhiwhi ki tenei mana.

15. Ko tona rahi kia rima tekau ma rima puutu te whanui, kia ono tekau ma rima puutu te roa, i te marae o roto;

16. Ko raro o te marae o roto, me whakatapu tena ki au, hei wahi e hoake ai koutou i a koutou hakarameta, hei kauwhautanga mo koutou, hei noho pukutanga mo koutou, hei inoitanga mo koutou, hei wahi hoki e hoake ai koutou i o koutou hiahia tapu ki a au, e ai ta te Ariki.

17. Ko runga o te marae o roto me whakatapu ki a au, hei kura mo aku apotoro, e ai ta te Tama, ta Amana; ara ki tetahi ritenga o te kupu, ko Arepa; ara ki tetahi kupu ano, ko Omeka; ae ra ko Ihu Karaiti, ko to koutou Ariki. Amine.