Dali, Sunod Kanako nga mga Kalihokan

Alang sa home evening o pagtuon sa kasulatan—o lingaw-lingaw lamang!

Sunda ang Lider

Mga paghulagway pinaagi ni Katy Dockrill

Alang sa Mga Buhat 1–5

Istorya: Human namatay si Jesus, si Pedro gitawag nga mahimong lider sa Simbahan sa Ginoo. Mabasa ninyo kini nga istorya sa pahina 46 o sa Mga Buhat 2–3.

Awit: “Barogan ang Kamatuoran” (Songbook sa mga Bata, 81)

Kalihokan: Pagpili og usa ka tawo nga mahimong lider. Hangyoa ang lider sa pagbuhat og aksiyon (sama sa pagtakingking o pagtuyok). Ang uban mosundog nila. Kon ang lider mousab sa aksiyon, ang uban mosundog sa bag-o nga aksiyon. Magbanos-banos sa pagkahimong lider hangtod ang matag tawo makabaton og usa ka turno.

Limpyo na Usab

Alang sa Mga Buhat 6–9

Istorya: Usa ka lalaki ginganlan og Saulo misulay sa pagguba sa Simbahan ni Jesukristo. Dayon naghinulsol siya ug miusab sa iyang kinabuhi. Nahimo siya nga misyonaryo ug nagtudlo sa mga tawo bahin ni Jesukristo. Siya nailhan isip Pablo. (Tan-awa sa Mga Buhat 9:1–20.)

Awit: “Ako Nasayod Akong Amahan Buhi” (Songbook sa Mga Bata, 8)

Kalihokan: Pagbutang og hugaw sa imong mga kamot. Unsa man ang imong bation kon ang imong mga kamot hugaw? Sunod, hugasi ang imong mga kamot sa sabon ug tubig. Ang paghugas sa atong mga kamot sama sa paghinulsol. Tungod ni Jesus, kita makahinulsol ug mahimong malimpyohan og usab human kita makasala.

Hagit sa Misyonaryo

Alang sa Mga Buhat 10–15

Istorya: Si Barnabas ug si Pablo mga misyonaryo (tan-awa sa Mga Buhat 13:2–4). Sila nagtudlo sa mga tawo bahin sa Manluluwas. Ang mga misyonaryo karon nagtudlo sa mga tawo bahin usab Kaniya.

Awit: “Suginli Ko sa mga Kaagi ni Jesus” (Songbook sa mga Bata, 36)

Kalihokan: Pagpili og usa ka hagit gikan sa mga pahina 38–39 nga buhaton og dungan, sama sa pagserbisyo sa usa ka silingan. Unsaon nimo nga mahimong usa ka misyonaryo karon?

Usa ka Litrato Nimo

Alang sa Mga Buhat 16–21

Istorya: Ang Apostol nga si Pablo nagtudlo nga kitang tanan mga anak sa Dios (tan-awa sa Mga Buhat 17:28–29). Ang Langitnong Amahan nahigugma sa tanan Niyang mga anak. Siya mihatag sa matag usa kanato og lain-laing mga gasa ug mga talento.

Awit: “Ako Anak sa Dios” (Songbook sa mga Bata, 2–3)

Kalihokan: Pagdrowing sa imong kaugalingon nga hulagway. Sa ibabaw, isulat ang “Ako Anak sa Dios.” Sa palibot sa hulagway, isulat o drowinga ang mga butang nga gusto nimong buhaton. Unsaon nimo sa paggamit ang imong mga talento aron sa pagtabang sa uban?

Adtoa ang pahina 49 alang sa Dali, Sunod Kanako nga mga kalihokan alang sa mas gagmay nga mga bata.