“Ang Pagpanglimpyo sa Tanaman,” Higala, Hulyo 2023, 4–5.

Ang Pagpanglimpyo sa Tanaman

Ni Lucy Stevenson Ewell

(Gibase sa usa ka tinuod nga istorya)

“Kinsa ang atong madapit aron motabang kanato?”

Kini nga istorya nahitabo sa England.

Inahan ug batang lalaki nga nagsul-ob og mga gwantes alang sa pagtanom ug nagkupot og mga pangputol sa tanom

Si Jonah mikaon sa iyang kataposan nga ingkit sa pagkaon ug mipahiyom. Ang panihapon kanunay nga mas lingaw kon naa ang mga misyonaryo.

“Kami ganahan nga mopaambit og mensahe kaninyo mahitungod sa pagserbisyo,” miingon si Sister Kearl. “Nganong importante man ang pagserbisyo sa uban?”

“Tungod kay kini makapalipay ni Jesus!” miingon si Eliza, ang manghod nga babaye ni Jonah.

“Eksakto ka! Kini makapalipay kaayo Niya. Ug kon kita motabang sa uban, kini makapalipay usab nato,” miingon si Sister Christensen. “Nakaila ba kamo og bisan kinsa nga nagkinahanglan og tabang?”

Naghunahuna si Jonah sa makadiyot. “Dili ko makahunahuna og usa ka tawo, apan ang among tanaman sa eskwelahan nagkinahanglan og tabang.”

“Maayo nga ideya,” miingon si Mama.

Ang eskwelahan ni Jonah adunay tanaman diin makahimo sila og mga kalihokan sa gawas. Apan walay bisan usa nga nakaatiman sa tanaman sa taas nga panahon. Tag-as na kaayo ang mga sampinit. Aduna usab kini daghan nga sagbot.

“Ganahan kami nga motabang nimo niana!” miingon si Sister Kearl. “Kinsa ang atong madapit aron motabang sa paglimpyo uban nato?”

“Ang among mga ig-agaw!” miingon si Jacob, igsoong lalaki ni Jonah.

“Ug ang among mga kauban sa klase sa Primary,” miingon si Jonah.

Pagkasunod adlaw, si Mama nakig-istorya og usa ka tawo sa eskwelahan aron mananghid. Nagpili sila og adlaw aron sa paglimpyo sa tanaman. Dayon gitabangan ni Mama si Jonah ug ang iyang mga igsoon aron tawagan ang ilang mga ig-agaw ug mga kauban sa klase sa Primary.

Pipila ka semana human niana, si Jonah ug ang iyang pamilya nakigtagbo sa mga misyonaryo didto sa eskwelahan. Ang ilang mga ig-agaw ug mga higala sa Primary didto usab. Oras na aron magtrabaho!

Gisul-ob na ni Jonah ang usa ka paresan sa dagkong goma nga gwantes nga gamiton sa pagtanom. “Tan-awa, Mama. Dako ang akong mga kamot!”

Mikatawa si Mama. “Magamit nimo kana nga dagkong mga kamot aron motabang sa pagputol niini nga mga sampinit.”

Gihatagan niya si Jonah ug mga pangputol nga mora og higante nga mga gunting. Dayon siya [si Mama] mitabang niya sa pagputol sa mga patay nga sanga.

“Makalingaw kini,” miingon si Jonah.

Batang babaye ug sister nga mga misyonaryo nga nagkupot og mga pala

Samtang si Jonah namutol, si Eliza nitabang sa pagkalot palibot sa tanaman. Si Jacob mitabang ni Papa sa paghimo og bag-o nga balay sa langgam. Ang uban nangibot sa mga sagbot ug nagpundok sa mga stick. Gibutang nila kini sa dako nga asul nga mga bag nga plastik. Bisan ang kinamanghoran nga igsoong lalaki ni Jonah, si Ezra, mitabang sa pagpamunit og mga bato.

Sa wala madugay nalimpyo na ang tanaman. Giihap ni Jonah ang mga bag nga ilang napuno. “Adunay 13 ka bag!” siya miingon. “Nakalimpyo kita og daghan kaayo nga basura.”

Mipahiyom si Sister Christensen. “Karon gikinahanglan nato ang dagko nga mga bukton sa tanan aron tabangan kita nga madala kini ngadto sa sakyanan.”

Si Jonah, Jacob, ug Eliza nagtagsa og kuha og usa ka bag. Si Jonah mibati og kalipay samtang iyang gialsa ang kataposan nga bag ngadto sa sakyanan. Ang pagtabang sa mga misyonaryo makalingaw. Gusto niya nga mahimo usab nga misyonaryo ugma damlag. Sa dili pa kana, adunay daghang paagi nga siya makaserbisyo. Dili na siya makahulat sa paghunahuna sa iyang sunod nga proyekto!