“Ang Talagsaon nga Papa ni Magnolia,” Higala, Hulyo 2023, 40–41.
Ang Talagsaon nga Papa ni Magnolia
“Ang uban nga mga bata miingon nga kami dili maayo nga pamilya tungod kay si Papa dili usa ka miyembro sa atong simbahan.”
Kini nga istorya nahitabo sa USA.
“Magnolia! Lily!” Mitawag si Papa. “Panahon na alang sa kasulatan ug pag-ampo!”
Si Magnolia miyaka sa salog tupad sa ilang iro,si Raindrop. Gigakos ni Lily ang paborito niyang habol.
Ang panahon sa pamilya sa kasulatan makalingaw. Usahay mag-uban sila nga idrama ang mga istorya sa kasulatan. Nakatabang kini ni Magnolia nga makahulagway sa mga istorya. Dugang pa, si Raindrop kanunayng motabang kon adunay mga hayop diha sa istorya!
Giablihan ni Papa ang iyang kasulatan ug mibasa og usa ka bersikulo. Dayon iyang gipasa ang dako, bug-at nga Biblia ngadto ni Magnolia. Nagpuli-puli sila sa pagbasa.
“[Ug pagmabination] kamo ang usa ngadto sa usa”, gibasa ni Magnolia.*
Nagmug-ot siya. Ang mga tawo dili kanunay nga mabination ngadto kaniya diha sa simbahan.
“Ma, Pa, mahimo ba ko nga mosulti ninyo kabahin sa usa ka butang?” nangutana siya.
“Siyempre,” miingon si Mama. “Unsa man na?”
“Sa Primary gahapon, ang uban nga mga bata misulti nako nga kita dili usa ka maayo nga pamilya tungod kay si Papa dili usa ka miyembro sa atong simbahan.”
Ang papa ni Magnolia nahisakop sa lahi nga simbahan. Miadto siya sa miting sa sakramento uban sa ilang pamilya Madominggo. Siya mihatag og mga pakigpulong kabahin sa Espiritu Santo atol sa mga bunyag nilang Lily ug Magnolia. Ang tanan miingon nga talagsaon ang iyang gibuhat. Siya usa ka talagsaon nga papa.
“Ang ilang gisulti nakapahimo nako nga gustong mohilak.” Mihingos-hingos si Magnolia. “Ngano kaha nga ang mga tawo magbinagis man?”
Si Mama ug si Papa nagtinan-away sa usag usa.
“Nalipay ko nga gisultihan kami nimo,” miingon si Papa. “Si Mama ug ako naghigugmaay og maayo sa usag usa. Ug ang atong pamilya importante kaayo kanato.”
Mitando si Mama. “Ug ang atong pamilya importante usab sa Langitnong Amahan. Siya nahigugma sa tanan Niyang mga anak.”
Si Raindrop midip-ig ngadto ni Magnolia. Gihapohap niya ang mga dunggan ni [Raindrop].
“Ang Langitnong Amahan nakaila kanato, ug Siya nasayod nga kita naghigugmaay sa usag usa,” miingon si Papa. “Walay pamilya nga perpekto, apan kita maningkamot sa atong labing maayo.”
“Apan makapasakit gihapon kini kon ang mga tawo mosulti og bangis nga mga butang mahitungod sa atong pamilya,” miingon si Magnolia. “Si Jesukristo mitudlo kanato nga magmabination ngadto sa tanan. Ang pagsulti og bangis nga mga butang mura og wala magsunod ni Jesus.”
“Sakto ka,” miingon si Papa. “Tingali kon mobati ka nga mura og mosulti og butang nga bangis, mahinumdoman nimo kon unsay imong gibati sa dihang ang uban wala magmabination diha nimo. Dayon makasulti ka hinoon og butang nga mabination.”
Miginhawa og lawom si Magnolia. “OK.” Nalipay siya nga nakaistorya siya ngadto ni Mama ug ni Papa.
“Oras na alang sa grupo nga paggakos sa tibuok pamilya!” Gibira ni Papa sila si Lily ug Magnolia aron gakson og maayo ug gigakos sila og hugot kaayo. Si Mama migakos nilang tulo. Si Raindrop midagan naglibot-libot sa tanan.
“Dili ko kaginhawa!” pasiaw ni Lily. Mikatawa si Magnolia.
“Karon pahinumdomi ko—kang kinsa na ang turno sa pagbasa?” Nangutana si Papa. Iyang gibuhian ang mga batang babaye ug mipunit sa iyang kasulatan.
“Ako nang turno!” miingon si Lily. “Ug kang Papa na nga turno sa pag-ampo.”
Sa dihang nahuman na sila sa pagbasa, ang tanan miluhod aron mag-ampo. Si Magnolia mibati og kamalinawon samtang naminaw siya ni Papa nga nag-ampo. Nasayod siya nga ang Langitnong Amahan naghigugma sa iyang pamilya.
Mga paghulagway pinaagi ni Constanza Basaluzzo