Tore sa Hugot nga Pagtuo

Ni Gretchen Picklesimer Kinney

(Gibase sa usa ka tinuod nga istorya)

Gusto ni Dashanel nga ang iyang hugot nga pagtuo ni Kristo mahimong taas ug lig-on.

Kini nga istorya nahitabo sa Jamaica.

Managsoon nga nagpatong-patong og mga tasa samtang nagtan-aw ang mga misyonaryo

Gitabangan ni Dashanel ang iyang magulang nga lalaki sa pagpagawas sa pan nga hinimo sa nut gikan sa oven. Humot kaayo kini!

Dayon nakadungog siya og tuktok sa pultahan. “Ania na ang mga misyonaryo!” mitawag ang iyang igsoong babaye.

Midagan si Dashanel sa pultahan. Ganahan siya kon moabot ang mga misyonaryo. Nindot kanunay ang iyang pagbati kon sila mobisita. Usahay magdala sila og mga dulaanan aron siya ug ang iyang mga igsoon makadula.

“Si Tyrell naghimo na usab og pan gamit ang nut!” Miingon si Dashanel. Ang iyang igsoong lalaki ganahan nga magluto og pagkaon alang sa mga misyonaryo.

“Naghinamhinam nako nga motilaw niini,” miingon si Elder Colas. Siya ug si Elder Yusaki misulod ug milingkod sa salog. Si Dashanel, iyang igsoong lalaki ug babaye, ug si Mama milingkod atbang nila.

“Unsay atong buhaton alang sa leksiyon karon?” Nangutana si Dashanel.

Gikuha ni Elder Yusaki ang gipatong-patong nga mga tasa. “Maghimo kita og tore sa hugot nga pagtuo. Matag usa niini nga mga tasa nagrepresentar og usa ka butang nga atong mabuhat aron sa pagpalig-on sa atong pagtuo diha ni Jesukristo.”

Si Elder Yusaki nagsugod sa pagpatong-patong sa mga tasa aron mahimong tore. Nakita ni Dashanel nga ang mga tasa adunay mga pulong sama sa “pag-ampo,” “pagtuon sa kasulatan,” ug “simbahan” nga nakasulat niini.

“Kini ang tanan nga mga butang ang inyong gihangyo namo nga buhaton isip usa ka pamilya,” miingon siya.

“Tinuod kana,” miingon si Elder Colas. “Kon buhaton ninyo kini nga mga butang, inyong gipalig-on ang inyong pagtuo diha ni Jesukristo.”

Si Dashanel ug ang iyang mga igsoon nagpuli-puli sa pagtukod sa ilang kaugalingon nga mga tore gamit ang mga tasa samtang naminaw sila sa leksiyon.

Human mibiya ang mga misyonaryo, gihunahuna ni Dashanel ang ilang gitudlo. Gusto niya nga ang iyang hugot nga pagtuo ni Kristo mahimong taas ug lig-on, sama sa tore nga iyang gitukod.

Sa paglabay sa mga bulan, si Dashanel nakat-on og dugang ug dugang pa kabahin sa ebanghelyo gikan sa mga misyonaryo. Nagsugod siya sa pag-adto sa simbahan uban ang iyang pamilya. Iyang gihunahuna ang iyang tore sa hugot nga pagtuo nga nagtubo pataas ug pataas pa.

Usa ka adlaw human mibiya ang mga misyonaryo, si Dashanel nakig-istorya ni Mama. “Pwede ba ko nga magpabunyag?” nangutana siya.

“Sigurado ka ba nga andam na ka?” nangutana si Mama.

“Oo,” miingon si Dashanel. “Gusto ko nga mosunod ni Jesus.”

“OK,” miingon si Mama. “Kon ganahan ka, pwede ka nga magpabunyag.”

Ang igsoong lalaki ug babaye ni Dashanel mipili usab nga magpabunyag. Si Mama miingon nga wala pa niya gibati nga andam na nga magpabunyag.

Misyonaryo nga nagbunyag og batang babaye

Sa adlaw sa ilang bunyag, si Dashanel ug ang iyang mga igsoon nagsul-ob og puti nga mga sinina. Ang matag usa nila mapailobon nga naghulat aron mabunyagan.

Sa dihang kahigayonan na ni Dashanel, si Elder Yusaki mitabang niya padulong sa tubig. Dayon gisulti niya ang mga pulong sa pag-ampo sa bunyag ug gipaubos siya ngadto sa ilalom sa tubig. Sa dihang si Dashanel mibalik sa pagsaka, dili siya makahunong sa pagpahiyom! Mibati siya nga malipayon ug limpyo. Dili gayod niya gusto nga makalimtan kini nga pagbati.

Si Dashanel nagpadayon sa paghimo og mga butang aron sa pagpalig-on sa iyang pagtuo ni Jesukristo. Siya nagbasa sa mga kasulatan uban sa iyang pamilya. Siya nag-ampo sa Langitnong Amahan. Siya naghimo og mabinationg mga butang ngadto sa uban. Ug iyang gihinumdoman unsa ang iyang gibati sa dihang siya gibunyagan. Gusto niya nga si Mama makabaton usab niana nga pagbati.

“Ma, nganong dili man ka magpabunyag?” Usa ka adlaw nangutana si Dashanel.

Nahilom si Mama og kadiyot. “Ikaw nagpakita og usa ka maayong ehemplo alang nako. Karon kinahanglan ko nga magpakita og ehemplo alang nimo,” miingon siya. “Gusto usab ako nga magpabunyag.”

Sa adlaw sa pagbunyag ni Mama, malipayon kaayo si Dashanel. Sa dihang si Mama mihaw-as gikan sa tubig, ang tanan nagpahiyom. Karon ang tibuok pamilya ni Dashanel dungan na nga makatukod sa ilang mga tore sa hugot nga pagtuo.

Istorya nga naa sa PDF

Mga paghulagway pinaagi ni Alyssa Tallent