“Ang Kapunongan sa Paghimo sa mga Butang nga Mas Maayo,” Higala, Hulyo 2023, 20–21.
Ang Kapunongan sa Pahimo sa mga Butang nga Mas Maayo
Nasayod si Josie og usa ka paagi nga sila makasunod sa ehemplo ni Jesukristo.
Kini nga istorya nahitabo sa USA.
Si Josie naglingkod uban sa iyang ig-agaw nga si Ashlyn ubos sa punoan sa kahoy sa gawas sa iyang balay.
“Maayo unta nga aduna tay kalingawan nga buhaton aron mokita og kwarta,” miingon si Josie.
“Tingali mokita ta og kwarta pinaagi sa pagbuhat og mga butang alang sa mga tawo,” miingon si Ashlyn.
“Unsa kaha kon ato kining himoon nga kapunongan?” Mahinamon nga miambak si Josie. “Sama sa kapunongan nga mopahimutang sa mga binuhing hayop o kapunongan nga magpalakaw-lakaw sa iro.”
“Makahimo kita sa tanang matang sa mga butang,” miingon si Ashlyn. “Ang mga tawo kanunayng nagkinahanglan og tabang. Ug sila mobayad nato.”
Husto si Ashlyn. Sa matag adlaw si Josie makakita og mga tawo nga nagkinahanglan og tabang.
Sa kalit lang si Josie adunay laing ideya. Siya mibati og kainit sa kahiladman. Nagpahinumdom kini niya sa iyang bunyag sa miagi nga tuig. Misaad siya nga mohinumdom kanunay ni Jesus ug mosunod sa Iyang ehemplo. Siya nasayod og usa ka paagi nga siya makahimo niana.
“Unsa kaha kon aduna tay kapunongan nga libre ra nga motabang sa mga tawo?” Nangutana si Josie. Ang init nga pagbati nagkakusog.
Misiga ang mga mata ni Ashlyn. “Lingaw gyod kaayo kana,” miingon siya. “Makatabang kita sa mga tawo sa eskwelahan ug sa simbahan—hapit bisan asang dapit.”
“Mahimo nato kining tawagon og Kapunongan sa Paghimo sa mga Butang nga Mas Maayo!” Miingon si Josie. “Atong sugdan ugma sa eskwelahan.”
Sa pagkasunod adlaw atol sa recess, si Ashlyn ug si Josie midagan ngadto sa daplin sa playground.
“Makakita ba ka og bisan kinsa nga atong matabangan?” Mibarog nga nagkinto si Ashlyn ug mitan-aw ngadto sa libaungon nga rainbow nga padailosan.
“Wala pa.” Si Josie nangita didto sa kabyonanan [monkey bars] ug sa mga duyan [swing set]. Ang mga bata nanagdailos ug nanagduyan. Nagpauntol sila og mga bola ug nag-iktin-iktin sa mga pisi. Walay usa kanila nga mura og nagkinahanglan og tabang. Ang tanan ingon og adunay usa ka higala. Dayon nakakita siya og usa ka mas manghod nga batang babaye nga nag-inusara nga adunay jump rope.
Gibira ni Josie ang bukton ni Ashlyn. “Tan-awa didto!”
Si Josie ug si Ashlyn nakakita og mga jump rope ug milakaw paingon ngadto sa batang babaye.
“Kumusta. Ako si Josie.”
“Ug ako si Ashlyn. Unsay imong ngalan?”
Ang batang babaye mura og nakalitan. “Ako si Leslie.”
“Ganahan ka makigdula namo?” Gipakita ni Josie ang jump rope.
Si Leslie mipahiyom. “Oo!”
Gitudloan nilang Ashlyn ug Josie si Leslie og bag-ong paagi sa pag-iktin sa pisi. Sa dihang mibagting na ang bagtinganan, nanamilit sila. Maayo ang gibati ni Josie. Nasayod siya nga mao kadto ang Espiritu Santo.
Pagkahuman niadto, sa higayon nga makit-an nilang Josie ug Ashlyn si Leslie diha sa hawanan, sila motimbaya kaniya.
Sila si Josie ug Ashlyn nangita pa og dugang nga mga tawo nga tabangan. Usahay mosulti sila og maanindot nga mga butang sa mga tawo ug maningkamot sa pag-abiba kanila. Sa uban nga mga panahon sila moimbitar sa mga bata nga makigdula kanila.
Usa ka adlaw, si Josie mipahiyom sa usa ka batang lalaki sa gawas sa eskwelahan. “Ganahan ko sa imong shirt nga dinosaur,” miingon siya.
Mingisi ang batang lalaki ug miduko lantaw sa iyang shirt. “Salamat.”
Sa paglingkod ni Josie, nakaamgo siya nga wala man diay niya kana mabuhat alang sa kapunongan! Bag-o lang gyod niya kining gibuhat.
Naghunahuna si Josie sa tanan niyang nahigala sukad nga siya ug si Ashlyn nagsugod sa ilang kapunongan. Ganahan gyod si Josie nga motabang sa mga tawo. Nakapahimo kini niya nga gustong mobuhat og dugang pa nga mga maayong butang ngadto sa uban. Ang Kapunongan sa Paghimo sa mga Butang nga Mas Maayo nakapahimo niya nga mas maayo. Ug kana talagsaon nga pamation.
Mga Paghulagway pinaagi ni Tania Rex