Imong Sinulat

Kaisog gikan sa Espiritu Santo

Ni Mathias P., edad 13, Victoria, Australia

Paghulagway pinaagi ni Toby Newsome

Sa dihang gamay pa ko, ang mga doktor misulti sa akong mga ginikanan nga ako adunay selective mutism. Kana usa ka sakit sa sobrang pagkabalaka nga maoy hinungdan aron lisod nga makig-istorya sa ubang tawo. Makahimo lang ko sa pagpakig-istorya sa akong suod nga mga sakop sa pamilya.

Ako mobati og kabalaka sa tanang higayon, labi na kon ang usa ka tawo makig-istorya nako. Ang pag-ampo kanunay makapanindot sa akong gibati ug makapakalma nako. Ako nakigkita usab sa usa ka magtatambag sa eskwelahan alang sa tabang. Apan akong gibati nga mora og wala man gayod ko moarang-arang. Hapit na ko mawad-i sa paglaom, apan gipadayon nako ang hugot nga pagtuo.

Ang akong ikawalo nga adlawng natawhan umaabot na. Ang akong mga ginikanan mihagit kanako sa pagbasa sa Basahon ni Mormon ug mag-ampo aron matabangan ko nga makadesisyon kon magpabunyag ba. Kada gabii nag-ampo ko aron mangutana kon kinahanglan ba ko nga magpabunyag. Kanunay ko nga nakakuha sa sama nga tubag—usa ka init, makapakalma nga pagbati diha sa akong kasingkasing. Ako nasayod nga ang Espiritu Santo misulti nako nga ang pagpabunyag mao ang saktong pagpili.

Sa dihang ako gihatagan sa gasa sa Espiritu Santo human sa akong bunyag, akong nadungog ang mga pulong sa paglaom, gugma ug pag-awhag. Ako nasayod nga ang Espiritu Santo mohupay kanako ug mohatag kanako og kaisog.

Ako nakadesisyon nga mosulay sa pagpakig-istorya sa akong suod nga higala, si Charlie. Misulay ko tibuok semana, apan lisod kaayo kadto. Apan usa ka adlaw si Charlie ug ako nag-inusara sa tanaman sa eskwelahan. Nag-ampo ko sa hilom diha sa akong hunahuna. Langitnong Amahan, palihog tabangi ako nga makasulti og bisan usa lang ka pulong.

Dayon gibuka nako ang akong ba-ba ug miingon, “Oy, Charlie!” Nahingangha gayod kaayo siya. Nalipay kaayo ko!

Human niana nga adlaw, mas sayon na ang pagkompleto og mas daghan nga tumong. Sa wala madugay ako nakig-istorya na sa hapit tanan nga tawo! Ako mapasalamaton nga ang Espiritu Santo mihatag kanako og kaisog nga makig-istorya ni Charlie.