“Kofta alang sa Paniudto,” Higala, Hulyo 2023, 12–13.
Kofta alang sa Paniudto
“Unsa na ang lahi nga butang nga imong gikaon?”
Kini nga istorya nahitabo sa USA.
Si Roy milingkod sa lamesa ug giablihan ang iyang bag nga sudlanan sa paniudto. Ang iyang pamilya bag-o lang nga mibalhin, ug kini ang iyang una nga adlaw sa iyang bag-o nga eskwelahan. Ang iyang mama naghimo sa iyang paborito nga Armenian nga pagkaon, ang kofta. Siya naghinam-hinam na nga mokaon niini!
Giablihan ni Roy ang wax paper nga giputos sa kofta. Parehas kini sa taas, niwang nga bolabola. Ganahan siya sa baho sa mga lamas nga giluto nganha sa karne. Ug ang lungag sa tunga nakapahimo niini nga mora og gamay nga pito. Gibutang niya kini sa iyang ngabil ug mihuyop. Dayon mikaon siya og gamay. Lami!
“Oy,” miingon ang usa ka batang lalaki sa atbang sa lamesa. “Unsa na ang lahi nga butang nga imong gikaon?”
Gibati ni Roy nga miinit ang iyang mga aping. “Ako kining paniudto.”
“Nan, dili siya nindot tan-awon.” Mikatawa ang batang lalaki.
Wala makahibalo si Roy kon unsay isulti. Wala siya makahibalo nga walay usa dinhi nga mokaon og Kofta. Dili siya ganahan nga sila maghunahuna nga siya lahi! Mao nga iyang gihipos ang iyang paniudto ug midagan sa gawas alang sa recess.
Human sa klase, nakita ni Roy si Mama nga nangabli og mga kahon.
“Dili na ko ganahan nga magdala og kofta sa eskwelahan,” miingon si Roy.
“Ngano man?” Nangutana si Mama. “Imo kining paborito!”
Gisultihan siya ni Roy unsa ang nahitabo sa eskwelahan. “Makauulaw kaayo kadto!”
“Gikasubo ko nga nahitabo kana,” miingon si Mama. “Kadaghanan sa mga tawo dinhi wala gayod nakasulay og kofta. Unsa kaha kon hatagan nato ang ubang bata og kahigayonan sa pagtilaw og pipila niini?”
“Ngano man?” Nangutana si Roy. “Dili sila mokaon niini.”
“Nan, dili ka makahibalo kon dili ka mangutana! Nakahibalo ko nga lisod ang paghimo og bag-o nga mga higala. Apan kitang tanan mga anak sa Dios. Usahay kinahanglan lang nga mas ila-ilahon nato ang usag usa.”
Naghunahuna si Roy mahitungod niini. Dili siya ganahan nga himoong kataw-anan. Apan ganahan usab siya nga hatagan ang mga bata atol sa tingpaniudto og mas maayo nga kahigayonan nga makasabot. Ug ang kofta lami gayod kaayo.
Mitando siya. “OK. Maghimo ta og dugang pa.”
Pagkasunod adlaw sa tingpaniudto, si Roy miginhawa og lawom. Milingkod siya tupad sa batang lalaki nga mikatawa niya.
Giablihan ni Roy ang iyang bag nga sudlanan sa paniudto. “Aduna bay bisan kinsa ninyo nga ganahan motilaw og Armenian nga pagkaon?”
Ang ubang bata nagpundok palibot samtang giablihan ni Roy ang kofta.
“Mosulay ko og tilaw,” miingon ang batang lalaki.
“Ako usab,” midugang og sulti ang usa ka batang babaye. Gipasa ni Roy ang kofta aron ang tanan makatilaw niini. Dayon silang tanan mikaon og gamay.
“Lami kaayo kini!” miingon ang batang lalaki. “Unsay tawag niini?”
“Kofta,” miingon si Roy.
“Kanindot!” Mipahiyom ang batang lalaki. “Ako si John. Ganahan ka ba nga makigdula inig recess?”
Mitando lamang si Roy tungod kay puno ang ba-ba. Sakto ang iyang mama—sila tanan anak usab sa Dios! Ug ang pagpanghatag nakatabang gayod niya nga makahimo og mga higala.
Paghulagway pinaagi ni Mark Robison