“Mga Istorya sa Bunyag,” Higala, Hulyo 2023, 30–31.
Mga Istorya sa Bunyag
“Ang usa ka pioneer mao ang usa ka tawo kinsa unang mibuhat og usa ka butang,” miingon si Mama.
Kini nga istorya nahitabo sa USA.
Si Mary mituyok-tuyok ug midayeg sa iyang puti nga sinena diha sa salamin. Mao kadto ang sama nga senina nga gisul-ob sa iyang mama sa iyang bunyag. Si Lola sa tuhod Marluce miayo niini aron mainsakto ni Mary. Karon si Mary makasul-ob na niini sa iyang kaugalingon nga bunyag!
“Kagwapa nimo!” Gigunitan ni mama ang kamot ni Mary ug gituyok-tuyok siya pag-usab.
Miagik-ik si Mary. “Mahimo bang isul-ob ko ni sa tibuok adlaw?”
“Atoa kining itagana aron imong masul-ob sa imong bunyag aron magpabilin kining nindot ug limpyo, OK?” Miingon si Mama.
“OK.” Si Mary mabunyagan inig edad niya og utso, ug taudtaod na niya kining gipangandaman. Nagtambong siya sa Primary, nagbasa sa mga kasulatan, ug gani moadto sa mga bunyag sa iyang mga higala. Apan ang iyang adlaw nga natawhan ingon og layo pa kaayo!
Si Mary nagpasabak ni Mama diha sa sofa. “Mama, pila man imong edad sa dihang gibunyagan ka?”
“16 akong edad.”
“Wow! Nganong dugay man kaayo ka nga nagpaabot?”
Hugot nga gigakos ni Mama si Mary. “Tungod kay wala pa ko nakahibalo kabahin sa gipahiuli nga Simbahan ni Jesukristo kaniadto. Apan misugod ko sa pag-adto sa mga kalihokan sa Simbahan uban sa pipila ka higala. Ug samtang nagkadaghan ang akong nahibaloan, mas nagkadako akong gusto nga mabunyagan!”
“Ngano man?” Nangutana si Mary.
Tungod kay gusto ko nga makaangkon og hangtod sa kahangtoran nga pamilya.” Gitudlo ni mama ang litrato sa templo nga gibitay sa ibabaw nila. “Nahibaloan nako nga ugma damlag ako masilyo ngadto sa akong pamilya diha sa templo hangtod sa kahangtoran. Ang pagbaton og hangtod sa kahangtoran nga pamilya mao ang akong damgo. Ug ang bunyag mao ang unang lakang! Karon ang akong mga damgo matinuod na.”
Mipahiyom si Mary. “Ikaw aduna ni Papa, ni Mallory, ug ni baby Maeva! Ug ako usab, siyempre.”
“Oo, siyempre. Ug si Lola Angela.”
“Si Lola nabunyagan ba uban nimo?”
“Naghulat siya og pipila ka tuig. Apan sa higayon nga mobiyahe kami sa duol nga mga templo, ganahan mi nga mohunong ug motan-aw niini.”
Si Mary naghunahuna kabahin ni Mama ug ni Lola nga nag-uban sa pagtan-aw sa mga templo. “Ug si Papa diay? Pila ang iyang edad sa dihang gibunyagan siya?”
“11 pa Siya.”
“Ug siya nagpuyo sa Bazil kaniadto?”
“Sakto na,” miingon si Mama. “Adunay mga tawo sa tibuok kalibotan nga nagkat-on kabahin ni Jesus ug sa bunyag. Daghan kanila mga pioneer.”
“Mga pioneer?”
“Ang usa ka pioneer mao ang usa ka tawo kinsa unang mibuhat og usa ka butang,” mipasabot si Mama.
Naghunahuna si Mary mahitungod niana. “Sama sa paagi nga ikaw ang unang tawo sa imong pamilya nga nabunyagan?”
Mitando si Mama ug mipahiyom.
Dihadiha dayon, misulod si Papa sa lawak ug misingit og lingkod sa sofa.
“Pa, pioneer ka ba sa imong pamilya?”
“Murag ingon ana. Human ako mabunyagi, akong nasayran nga si Lola Rosimere miyembro na diay sa atong simbahan! Apan wala na siya nagsimba sulod sa daghang katuigan.”
“Mao ba? Unsa may nahitabo?”
“Misugod ko sa pagsimba. Unya ang akong mga igsoon nga lalaki misugod sa pagsimba, dayon si Lola Rosimere usab. Bisan si Lola sa tuhod Marluce miapil!”
Gihunahuna ni Mary si Papa nga moadto sa simbahan nga siya ra, dayon nagdala og daghan pa sa iyang pamilya uban kaniya.
“Wow,” miingon si Mary. “Ganahan ko makadungog sa imong mga istorya. Kini mas nakapahinam nako nga magpabunyag.”
“Salamat sa pagpangutana kanamo niining tanan nga mga pangutana, Mary,” miingon si Papa. “Karon mahimo ba kaming mangutana kanimo og usa?”
Mitando si Mary. Unsa kaha ilang ipangutana?
“Ngano man nga gusto nimo nga mabunyagan?”
Naghunahuna si Mary kon unsay iyang nakat-onan gikan sa mga kasulatan ug unsay iyang gibati sa simbahan. “Tungod kay gusto ko nga mosunod ni Jesus ug makauban ang akong pamilya hangtod sa kahangtoran.”
Si Mama ug Papa parehong mipahiyom, ug si Mary mihamag sa paggakos sa iyang mga ginikanan. “Dili na ko makapaabot!”
Mga paghulagway pinaagi ni Tammie Lyon