Naghisgot si Benjamin kabahin sa Family History

Si Benjamin gikan sa Buenos Aires, Argentina. Kami nangutana kaniya og pipila ka pangutana kabahin sa family history.

Giunsa nimo pagsugod sa pagbuhat sa family history?

Akong gisugdan ang pagbuhat sa family history uban sa akong papa. Mag-uban kami sa pagbuhat niini kada Dominggo. Ang akong papa mitabang nako nga makakat-on kon unsaon sa paggamit ang FamilySearch. Kinahanglan ko nga magpraktis ug magpraktis. Karon magbuhat ko sa family history uban sa akong papa o sa akong ig-agaw si Jasmina.

Unsay ganahan kaayo nimo kabahin sa family history?

Ganahan ko nga makakita og bag-ong mga tawo nga idugang ngadto sa akong family tree. Una, mangita ko og karaan nga mga rekord. Dayon akong pangitaon ang mga ngalan sa akong mga katigulangan. Akong pangitaon ang ilang mga petsa sa adlaw nga natawhan ug kon diin sila natawo. Akong pangitaon ang uban nga mga dapit nga ilang gipuy-an usab.

Unsa ang imong nahibaloan mahitungod sa imong mga katigulangan?

Akong nahibaloan nga ako adunay mga katigulangan gikan sa Italy ug Germany. Usa sa akong mga katigulangan gikan sa Italy adunay parehas nga ngalan sa akong igsoon nga lalaki! Ang ngalan sa akong igsoon nga lalaki mao si “Santiago,” nga sa Italian “Giacomo”. Ako usab nahibaloan nga ang among apilyedo lahi ang espeling kaniadto.

Unsaon nimo pagtabang sa ubang mga tawo nga mohimo sa family history?

Ako motabang sa akong lola nga mogamit sa FamilySearch. Ako siya nga gitudloan kon unsaon sa pagdugang og mga handomanan. Mitabang usab ko niya sa pagdugang sa nawala nga mga tawo ngadto sa iyang family tree. Ang uban sa iyang mga paryente adunay daghan kaayo nga mga ngalan! Midangat og taas nga panahon ang pagbutang nilang tanan. Apan nalipay gyod ko nga ako nakatabang niya nga makat-on sa paggamit sa FamilySearch, sama sa akong papa nga mitabang nako.

Unsa nga mga proyekto sa family history ang gusto nimo nga buhaton sa sunod?

Gusto ko nga maghimo og mga bidyo alang sa akong mga higala ug pamilya aron matabangan sila nga makakat-on kon unsaon sa paggamit ang FamilySearch. Sa dihang akong gisugdan, ako nagkinahanglan nga makat-on og daghan. Gusto ko nga magtudlo sa uban nga mga tawo aron sila makahimo sa samang butang.

Mga paghulagway pinaagi ni Laura Zarrin