“Nagsukod kadto diha sa Baseball Field,” Friend, Hulyo 2023, 32.
Higala ngadto sa Higala
Nagsugod Kadto diha sa Baseball Field
Gikan sa usa ka interbiyo uban ni Lucy Stevenson Ewell.
Mga paghulagway pinaagi ni Brian Michael Weaver
Niadtong 13 anyos pa ko, midula ako diha sa usa ka baseball team uban sa pipila ka mga higala. Dili pa ko miyembro sa Ang Simbahan ni Jesukristo sa mga Santos sa Ulahing mga Adlaw, apan duha sa akong kauban sa team mga miyembro. Kaluha sila. Ang ilang mga ngalan mao si Rob ug si Lane.
Usa ka adlaw atol sa praktis gidapit ko nila nga moadto sa home evening uban sa ilang pamilya. Wala ko kahibalo unsa nang home evening, mao nga nangutana ko bahin niini. Gisultihan ko nila nga magkat-on kami bahin sa mga butang sa simbahan ug manganta. Wala kaayo ko naghinam-hinam kabahin niana. Apan misaad sila nga adunay dessert, mao nga nakahukom ko nga moadto.
Ang akong pamilya miadto sa ilang balay alang sa home evening. Lahi gayod ang akong gibati. Wala ko nakahibalo kon unsa kadto, apan mura og pamilyar ang pamati niini. Nindot ang pamati. Gibati usab kini sa akong mama.
Wala ko kahibalo niadto nga ang akong mama miyembro na diay sa Simbahan. Nabunyagan na siya isip usa ka batan-ong babaye. Apan wala kaayo siya mosimba.
Human nianang gabhiona, misugod na usab si mama sa pagsimba. Miuban ko niya aron makakat-on pa. Paglabay sa pipila ka bulan, gibunyagan ko sa papa ni Rob ug Lane.
Mapasalamaton kaayo ko nga sila si Rob ug Lane nagpakabana gayod sa pagpaambit sa ebanghelyo kanako. Karon bulahan ko nga nakabaton og mahangtorong pamilya. Ug nagsugod kadtong tanan diha sa usa ka baseball field!
Sama ni Rob ug Lane, kamo adunay gamhanan nga epekto ngadto sa uban. Makahimo kamo og kalainan sa inyong pamilya. Mahimo ninyong ipaambit ang ebanghelyo ngadto sa inyong mga higala.