Përshëndetje nga Nepali!

Mëso rreth fëmijëve të Atit Qiellor kudo nëpër botë.

Ilustrimet nga Brenna Vaughan

Nepali është një shtet në Azinë Jugore. Atje jetojnë rreth 30 milionë njerëz.

Një Flamur i Veçantë

Nepali është i vetmi shtet me një flamur që nuk është një drejtkëndësh! Në të është një diell dhe një hënë.

Mali Everest

Nepali është vendi i malit më të lartë në botë, i cili është 8 849 metra i lartë. Më shumë se 6 000 njerëz janë ngjitur deri në majën e tij.

Miq nga Besimi Hindu

Shumë njerëz në Nepal ndjekin hinduizmin. Në këtë fe, lopët janë kafshë të shenjta që trajtohen me respekt.

Dal Bhati

Çdo ditë njerëzit hanë një vakt me dal (thjerrëza) dhe bhat (oriz). Ata shpesh i shoqërojnë ato me ushqime të tjera, si kerri bimor dhe perime turshi.

Libri i Mormonit

Libri i Mormonit i plotë u botua në Nepal për herë të parë në vitin 2017. Anëtarët e Kishës atje ishin tepër të emocionuar!

Veprimtaria

Gatti (Loja me Pesë Gurë)

Ulu në tokë dhe shpërndaji pesë guralecë përpara vetes. Merre një guralec dhe hidhe në disa centimetra lartësi. Ndërkohë që është në ajër, përdor të njëjtën dorë për të marrë një guralec tjetër. Më pas kape guralecin që hodhe, me të njëjtën dorë. Vazhdo derisa t’i kesh mbledhur të pestë guralecët. Mund të luash vetë ose me disa shokë e shoqe!

Receta

Dal (Supë me Thjerrëza)

1. Hidh 2 lugë gjelle vaj në një tenxhere. Prit në copëza 1 qepë dhe 2 thelpinj hudhre dhe gatuaji në zjarr mesatar për pak minuta.

2. Shto 1 lugë çaji me secilën nga erëzat në vijim: koriandër, spec djegës, shafran, kanellë dhe xhenxhefil. Trazoje për disa minuta.

3. Shto 2 gota uji me thjerrëza (të shpëlara me ujë) dhe 4 gota me ujë.

4. Gatuaji në zjarr mesatar për 20 minuta ose derisa të zbuten thjerrëzat. Nëse dëshiron, prit pak selino të freskët për t’ia shtuar në fund.

Sigurohu që të të ndihmojë një i rritur!

Këshilla të Shëndetshme

Mrekullia e të Qenit në Mjedis të Hapur

Të qenit në natyrë është një mënyrë e shkëlqyer për të bërë disa ushtrime fizike dhe për të marrë ajër të pastër. Provo të bësh një shëtitje ose të bësh një ngjitje në mal me familjen tënde si një veprimtari zbavitëse, të shëndetshme.