“Kaungāmeʻa ʻi he Vaʻinga Veimaú,” Kaumeʻá, Mē 2024, 14–15.
Kaungāmeʻa ʻi he Vaʻinga Veimaú
Te nau vaʻinga fēfē kapau ʻoku ʻikai ke nau femahinoʻaki?
Naʻe hoko ʻa e talanoá ni ʻi Siamane.
“Lolotonga ʻeku nofó!” Ko e hiva ia ʻa Mativí. Naʻe hiva fakataha mo ʻene faʻeé mo hono tehina ko Taimofí. Naʻe fakapoʻuli ʻi tuʻa ʻi he matapā sioʻata ʻo e kaá. Ka naʻe tokoni ʻa e foʻi hivá ke toe kiʻi ongo maama ange ʻa e meʻa kotoa pē.
Ko ha taimi fakailifia ia kia Mativi mo hono fāmilí. Naʻa nau hiki ki Siamane koeʻuhí naʻe ʻikai ke toe malu honau ʻapí. Kuo nau fononga ʻi ha ʻaho ʻe ua, pea kuo nau mei aʻu ʻeni ki ai. Naʻe ʻave kinautolu ʻe ha pīsope ʻi Siamane ki ha feituʻu ke nau nofo ai.
Naʻe fiefia ʻa Mativi ʻi hono tokoniʻi kinautolu ʻe he Tamai Hēvaní ke nau aʻu lelei ki Siamané. Ka naʻá ne ʻofa ki heʻene Tetí. Naʻe pau ke ne nofo pē ʻi honau fonuá koeʻuhí ko e taú. Naʻe hohaʻa lahi ʻa Mativi ki ai.
Naʻe tau ʻe he pīsopé ʻa e kaá ʻi tuʻa ʻi ha fale. “ʻOku talitali lelei kimoutolu ki hoku ʻapí.”
Naʻe toʻo ʻe Mativi ʻene kató ʻo muimui atu ʻi hono fāmilí ki loto. Naʻe lōngonoa ia. Pau pē naʻe ʻosi mohe e fāmili ʻo e pīsopé.
Naʻe pehē ange ʻe he pīsopé, “Te ke lava ʻo nofo ʻi he loki ʻo Mati mo Lolé lolotonga hoʻo ʻi hení.”
Naʻe pehē ʻa Mami, “ʻOleva. ʻOku ʻikai fiemaʻu ia ke na mavahe mei hona ongo lokí koeʻuhí ko kimautolu.”
Naʻe malimali ʻa e pīsopé. “ʻOkú na fiefia ke fai ia. ʻOku mau loto ke mou ongoʻi fiemālie.”
Naʻe kamokamo pē ʻa Mami. “Mālō ʻaupito.”
ʻI he pongipongí, naʻe ʻalu ʻa Mativi mo Taimofi ki peito ke kai pongipongi. Naʻe tangutu ʻa e pīsopé ʻi he tēpilé mo ha kiʻi tamasiʻi mo ha kiʻi taʻahine. Ne na mei toʻu pē mo Mativi.
Naʻe pehē ange ʻe he pīsopé, “Ko ʻeku fānaú ʻeni, ko Mati mo Lole.”
Naʻe talaange ʻe Taimofi, “Fiefia ke feʻiloaki mo kimoua.”
Naʻe kiʻi puputuʻu ʻa Mati mo Lole.
Naʻe pehē ange ʻe he pīsopé, “ʻOku ʻikai ke na lea ʻaki hoʻo lea fakafonuá. Ka ʻoku ou tui te mou hoko ko ha kaungāmeʻa lelei.”
Naʻe fakafulofula ʻa Mativi. Te nau kaungāmeʻa fēfē kapau ʻoku ʻikai ke nau lava ʻo fetalanoaʻaki? Naʻá ne ongoʻi ʻo hangē kuo pulia ʻa e huelo ʻo e laʻaá naʻá ne hiva ʻo kau ki ai ʻanepoó.
Hili ʻenau kaí, naʻe fakaʻaliʻali ange ʻe Mati mo Lole ha loki vaʻinga. Naʻe vaʻinga e ongo tamaiki iiki angé mo ha ngaahi meʻa vaʻinga. Naʻe mahalo ʻa Mativi ko e siʻisiʻi naua ʻia Mati mo Lolé.
Naʻe lea ʻaki ʻe Mati ha meʻa. Naʻe ongo hangē ha fehuʻí, ka naʻe ʻikai ʻilo ʻe Mativi ʻa e meʻa naʻá ne lea ʻakí. Naʻe tangutu hifo ʻa Mati ʻo fakaava hake ha puha pele. Naʻá ne fokotuʻutuʻu kinautolu ki ha ngaahi fokotuʻunga. Naʻá ne toʻo hake leva mo Lole ʻena pelé. Naʻe fie vaʻinga ʻa Mativi. Ka naʻe ʻikai ke ne poto ai!
Naʻe tuku hifo ʻe Mati ha laʻi pele pea sio atu kia Mativi. Naʻá ne toe lea ʻaki ha meʻa.
Naʻe fie tangi ʻa Mativi. Naʻe ʻikai ke ne fie nofo ʻi Siamane kapau naʻe ʻikai mahino ki ai ha lea ʻa ha taha.
Naʻe lea ʻaki ʻe Lole ha meʻa kia Mati, peá ne lele leva ki he kolōsetí. Naʻá ne foki mai ʻo fokotuʻu ha keimi foʻou ʻi he falikí.
Naʻe ʻiloʻi ʻe Mativi ʻa e keimi ko ʻení. Naʻe hangē ʻa e ngaahi kongokonga papá ko ia naʻá ne maʻu ʻi ʻapí. Ko e vaʻinga veimaú! Kuó ne vaʻinga veimau mo Teti kimuʻa. Naʻe kamokamo fiefia ʻa Mativi. Naʻá ne poto ʻi he vaʻinga ko ʻení.
Naʻe malimali lahi ʻa Lole pea kamata ke ne fokotuʻutuʻu ʻa e ngaahi paté.
Naʻe ʻunuakiʻi ʻe Mativi ʻene paté ʻi ha konga ʻe ua pea sio ki hono ʻunuakiʻi ʻe Lole ʻene naité. Pea ʻunuakiʻi ʻe Mativi ʻene pīsopé ki he naite ʻa Lolé. Naʻá ne fiefia mo Taimofi. Naʻe leʻo ʻita ʻa Lole, ka naʻá ne malimali pē.
Naʻa nau vaʻinga ʻi ha taimi lōloa. Ne ʻikai fuoloa kuo nau kakata. Naʻe ʻikai ke nau femahinoʻaki ʻi heʻenau lea fakafonuá, ka ne nau kei fiefia pē.
ʻI he ngaahi uike siʻi hono hokó, naʻa nau maʻu ha ngaahi vaʻinga kehe ne nau ʻiloʻi. Naʻa nau vaʻinga soka ʻi tuʻa mo e fānau Siamane kehé. Naʻe ako foki ʻe Mativi ha ngaahi foʻi lea faka-Siamane ʻe niʻihi. Naʻá ne fai ha ngaahi fehalaaki ʻi he taimi ʻe niʻihi, ka naʻe kei feinga pē.
Naʻe kei ʻofa pē ʻa Mativi ki heʻene tamaí mo hono ʻapí. Ka naʻá ne houngaʻia ʻi hono tokoniʻi ia ʻe he Tamai Hēvaní ke ne maʻu ha ngaahi kaungāmeʻa foʻoú.
Ngaahi tā fakatātā ‘a Hannah Li