“Taimi Talanoa Mei he Folofolá,” Kaumeʻá, Mē 2024, 30–31.
Taimi Talanoa Mei he Folofolá
“ʻOku ʻi ai ha taha ʻoku ʻi ai haʻane tohi ʻokú ne fiemaʻu ke u lau he ʻahó ni?” Ko e fehuʻi ange ia ʻa Misa ʻOtó.
Naʻe hoko ʻa e talanoá ni ʻi Kana.
Naʻe pehē ʻe Misa ʻOto, “Ko e taimi laukongá ʻeni.”
Naʻe tangutu hangatonu hake ʻa Naiamei. Naʻe fakalata ʻa e taimi laukongá!
Ko e ʻaho kotoa pē ʻi he akó, naʻe lau leʻolahi ʻe heʻenau faiakó ha tohi ki he kalasí. Naʻá ne laukonga ʻi he taimi ʻe niʻihi fekauʻaki mo e fanga monumanú. Naʻá ne laukonga he taimi ʻe niʻihi fekauʻaki mo e kakai ʻi he ngaahi fonua kehé. Pea ʻi he taimi ʻe niʻihi naʻá ne ʻeke ki he kalasí pe naʻe ʻi ai haʻanau tohi naʻa nau fiemaʻu ke ne lau.
“ʻOku ʻi ai ha taha ʻoku ʻi ai haʻane tohi ʻokú ne fiemaʻu ke u lau ʻi he ʻahó ni?” Ko e fehuʻi ange ia ʻa Misa ʻOtó.
Naʻe hiki hake ʻe Naiamei hono nimá. “ʻIo!” Naʻá ne ala hifo ki heʻene kató ʻo toʻo hake ʻa e tohi naʻá ne saiʻia taha aí. Ko ha tohi talanoa ia ʻo e Tohi ʻa Molomoná! Naʻá ne ʻomi ia ke lau ʻi he tuku ʻa e akó lolotonga ʻene tatali ke ʻave ia ʻe heʻene faʻeé. Naʻe tokoni ʻene sio ki he ngaahi fakatātaá ke mahino kiate ia ʻa e ngaahi talanoa mei he folofolá.
Naʻe fehuʻi ʻe Misa ʻOto ʻi heʻene sio ki he fuʻu tohí. “He ʻikai ke tau maʻu ha taimi feʻunga ke lau kotoa ia. ʻOku ʻi ai nai ha konga pau ʻokú ke loto ke u lau?”
Naʻe tali ange ʻe Naiamei, “ʻIo.” Naʻá ne huke ʻa e ʻū pēsí kae ʻoua kuó ne maʻu e talanoa naʻá ne saiʻia taha aí. “Te ke lava nai ʻo lau ʻeni, kātaki? ʻOku ui ko e ‘Misi ʻa Līhaí.’”
“ʻOku fekauʻaki ʻa e talanoá ni mo e hā?” Ko e fehuʻi ange ia ʻa Misa ʻOtó.
“ʻOku fekauʻaki ia mo ha palōfita naʻá ne maʻu ha vīsone. Naʻá ne mamata ki ha fuʻu ʻakau fakaʻofoʻofa mo ha fua ifo.” Naʻe tuhu ʻa Naiamei ki ha fakatātā ʻo e fuʻu ʻakaú. “Naʻá ne fiemaʻu hono fāmilí ke nau kai fakataha mo ia ʻa e fuaʻiʻakaú. Te ke lau nai ia?” Naʻe ʻoange ʻe Naiamei ʻa e tohí ki heʻene faiakó.
“ʻIo,” ko e tali ange ia ʻa Misa ʻOtó. Naʻá ne kamata lau leʻolahi leva. Naʻá ne lau fekauʻaki mo e hala fāsiʻi ʻoku fakatau ki he fuʻu ʻakaú. Naʻá ne lau fekauʻaki mo e vaʻa ukameá. Pea naʻá ne lau fekauʻaki mo hono tauhi ʻo e ngaahi fekaú.
Naʻe hiki hake e nima ʻo e kaungāmeʻa ʻo Naiameí ko Selomi. Naʻá ne fehuʻi ange kia Naiamei, “Ko e faʻahinga ʻakau fēfē ia?”
Naʻe pehē ange ʻe Naiamei, “Heiʻilo. Ka naʻe fuʻu lelei ʻaupito ʻa e fuá. Pau pē ʻoku lelei ange ia ʻi ha fuʻu mango!” Naʻe tuʻu leva ʻa Naiamei ʻo fakakaukau. “Naʻá ku ako ʻi he lotú ʻoku ʻuhinga ʻa e fuá ki he ʻofa ʻa e ʻOtuá. Ko ia ʻoku mahino naʻe fuʻu ifo mo makehe!”
ʻI he tuku ʻa e kalasí, naʻe tangutu ʻa Naiamei ʻi tuʻa ʻo tatali ki heʻene faʻeé. Naʻá ne toʻo hake ʻene tohi talanoa ʻo e Tohi ʻa Molomoná ke toe lau.
Naʻe pehē ange ʻe Selomi, “Ko ha talanoa lelei ia.” Naʻá ne tangutu ʻi he tafaʻaki ʻo Naiameí. “ʻE lava nai ke u lau mo koe ha talanoa ʻe taha?”
“ʻIo!” Naʻe huke ʻa Naiamei ki ha talanoa ʻe taha. Naʻá na laukonga fekauʻaki mo ʻApinetai mo e Tuʻi ko Noá.
Naʻe tokolahi ange hona kaungā ako ne omi ke fanongó. ʻI he taimi ne nau maʻu ai ha ngaahi fehuʻí, naʻe tali kinautolu ʻe Naiamei. Naʻe aʻu ʻo ne fai ange ha ngaahi fehuʻi ke siviʻi kinautolu fekauʻaki mo e ngaahi talanoa ne nau laú!
Ne ʻikai fuoloa kuo sio atu ʻa Naiamei ki he lue mai ʻene faʻeé kiate kinautolú. Naʻá ne pehē ange ki he toenga ʻo e fānaú, “Mālō hoʻomou laukonga mo aú.” Naʻá ne tāpuniʻi e tohí peá ne malimali. Naʻá ne fiefia ʻi he saiʻia hono ngaahi kaungāmeʻá ʻi he ngaahi talanoá ʻo hangē pē ko e lahi ʻene saiʻia ʻiate kinautolú.
Tā fakatātā ‘a Zhen Liu