Ngaahi ʻEkitivitī ʻo e Haʻu, ʻo Muimui ʻIate Aú

Maʻá e efiafi ʻi ʻapí pe ako folofolá—pe ke maʻu pē ha fiefia!

ʻAʻeva ʻi Hono Halá

Ki he Mōsaia 4–6

Naʻe tauhi ʻe he Tuʻi ko Mōsaiá ʻa e ngaahi fekaú pea “[ʻaʻeva] ʻi he ngaahi hāʻeleʻanga ʻo e ʻEikí” (Mōsaia 6:6). Tā ho laʻivaʻé ʻi ha laʻipepa pea kosi takai. Hiki ʻi ho laʻivaʻe ne taá ha founga te ke lava ai ʻo muimui kia Sīsū. Fokotuʻu ho laʻivaʻe ne taá ʻi ha feituʻu te ke lava ʻo manatuʻi ke muimui ai ki he sīpinga ʻa Sīsū Kalaisí.

Maʻá e fānau iiki angé: ʻAlu ʻo luelue. ʻAi ke akoako molomolomuivaʻe hoʻo fānaú ʻiate koe. Talanoa fekauʻaki mo e founga te tau muimui ai ʻia Sīsū Kalaisi ʻaki hono fai e ngaahi meʻa naʻá Ne faí, hangē ko e tokoni ki he niʻihi kehé mo e papitaisó.

Muimui ʻi he Palōfitá

Ki he Mōsaia 7–10

Naʻe akoʻi ʻe ʻĀmoni ʻoku lava ʻa e kau palōfitá ʻo mamata ki he ngaahi meʻa ʻe hokó (vakai, Mōsaia 8:16–17). Huke ki he peesi 2 ke lau e pōpoaki ʻa Palesiteni Nalesoni mei he konifelenisi lahí. Ko e hā naʻá ne akoʻi mai kiate kitautolú? Tā ha fakatātā fekauʻaki mo ia pea ʻomi ia kiate kimautolu ʻi he Kaumeʻá.

Maʻá e fānau iiki angé: Hivaʻi ʻa e “Muimui He Palōfitá” (Tohi Hiva ʻa e Fānaú, 58–59) mo ho fānaú. ʻI he taimi kotoa pē ʻokú ke hivaʻi ai ʻa e foʻi lea palōfitá, tuhu ki ha tā ʻo e palōfitá.

Ko Ha Maama ʻi he Fakapoʻulí

Ki he Mōsaia 11–17

Naʻe akoʻi ʻe ʻApinetai ko Sīsū Kalaisí “ko ha maama ʻoku ʻikai hano ngataʻanga, ʻa ia ʻoku ʻikai lava ʻo tāmateʻi” (Mōsaia 16:9). Fufuuʻi ha meʻa ʻi he falé. Tāmateʻi ʻa e māmá pea ʻai ke feinga e taha kotoa ke kumi ia ʻi he fakapoʻulí. Fufuuʻi leva ʻa e meʻa ko iá pea feinga ke kumi ia ʻaki ʻa e ngaahi māmá pe ngaahi meʻahulú. Ko e fē ʻa e founga naʻe faingofua angé? ʻOku tokoniʻi fēfē kitautolu ʻe Sīsū ʻo hangē ko e tokoni atu ʻa e māmá?

Maʻá e fānau iiki angé: ʻAi hoʻo fānaú ke nau akoako fakamoʻui pe tāmateʻi ha meʻahulu pe maama. Pea talanoa leva fekauʻaki mo e founga ʻoku hoko ai ʻa Sīsū Kalaisi ko ha maama he ʻikai lava ke fufuuʻi pe tāmateʻí.

Taha Honau Lotó ʻi he Uouangataha

Ki he Mōsaia 18–24

Naʻe akoʻi kitautolu ʻe ʻAlamā ke “taha [hotau] lotó ʻi he uouongataha mo e feʻofoʻofani” (Mōsaia 18:21). ʻOku ʻuhinga ia ʻoku totonu ke tau ngāue fakataha mo fakahaaʻi ʻetau ʻofá ki he niʻihi kehé. Ngaohi ha sēini ʻo ha ngaahi foʻi haati ke fakamanatu atu! Kosi ʻo toʻo ha ngaahi foʻi haati pepa pea tohiʻi ai ha hingoa ʻo ha mēmipa ʻo e fāmilí ʻi he laʻipepa takitaha. Fakaava ʻi lotomālie ʻi he foʻi haati takitaha pea tui kinautolu ke fehokotaki ʻa e ngaahi foʻi hātí. Tautau ʻa e sēini hātí ʻi he feituʻu te ke lava ʻo sio maʻu pē ki aí!

Maʻá e fānau iiki angé: Fehuʻi ki hoʻo fānaú ha meʻa ʻe taha ʻoku nau ʻofa ai fekauʻaki mo e tokotaha takitaha ʻi he fāmilí. Talaange ki hoʻo fānaú ha meʻa ʻoku nau fai ʻoku fakahaaʻi ai ʻa e ʻofa ki he niʻihi kehé!

Ngaahi tā fakatātā ʻa Katy Dockrill