Ko Ha Talanoa mo ʻIsapela fekauʻaki mo e Ngaahi Fuakavá

Ko e haʻu ʻa ʻIsapelá mei ʻAlahuela, Kosita Lika. Naʻá ma ʻeke ange ha ngaahi fehuʻi fekauʻaki mo ʻene mahino ki hono tauhi ʻene ngaahi fuakava ʻi he papitaisó.

Fakamatala mai kau kiate koe.

ʻOku ou taʻu 13. ʻOku ou saiʻia ke vaʻinga ʻakapulu, feimeʻatokoni, tuitui, kakau, mo tokoni ki he niʻihi kehé. Ko ʻeku fakaʻānauá ke u hoko ko ha toketā ki he fanga monumanú he ʻoku ou saiʻia ke tokoni ki he fanga monumanú. Ko e meʻakai ʻoku ou saiʻia taha aí ko e sipēketi mo e pisa, pea ko e lanu ʻoku ou saiʻia taha aí ko e lanu vāletí.

ʻOkú ke tauhi fēfē hoʻo ngaahi fuakava ʻi he papitaisó?

ʻOku ou fakatomala mo maʻu ʻa e sākalamēnití he uike kotoa pē. ʻOku ʻi ai hoku fatongia ʻi heʻeku kalasi ʻi he Kau Finemuí, pea ʻoku ou feinga ke fakahoko fakamātoato ia. ʻOku ou tauhi foki ʻeku ngaahi fuakavá ʻaki ʻeku tokoniʻi e niʻihi kehé.

Ko e hā ʻokú ke fai ke tokoni ki he niʻihi kehé?

ʻOku ou manako ke tokoni ki hoku fāmilí. ʻOku ou faʻa vaʻinga mo hoku kiʻi tokoua ʻoku taʻu tolu ko Liná, lolotonga e ngāue ʻene ongomātuʻá. ʻOku ou saiʻia ke tokoni ki heʻeku ongo kuí ʻi heʻena fiemaʻu ʻeku tokoní. ʻOku ou toe tokoni foki ki hoku kaungā akó ki heʻene sivi faka-Falanisē ʻi he akó.

Fakamatala mai angé fekauʻaki mo hoʻo uiuiʻí.

Ko e tokoni ʻuluaki au ʻi heʻeku kalasi ʻi he Kau Finemuí. ʻOku kau ʻi hoku ngaahi fatongiá ʻa e ngāue fakaetauhi ki he kau finemuí. ʻOku ʻuhinga ʻeni ke tokoniʻi kinautolu ʻi ha meʻa pē te nau fiemaʻu. ʻOku ou ʻalu ki he kalasí mo e ngaahi ʻekitivitií, pea ʻoku ou feinga ke u hoko ko ha kaungāmeʻa ki he tamaiki fefine kehe ʻi heʻeku kalasí ʻoku ʻikai ke haʻú.

Ko e hā ha faleʻi te ke fai ki ha taha fekauʻaki mo honau fuofua uiuiʻí?

Te u talaange ʻoku ʻikai fiemaʻu ia ke nau tailiili. Ko e uiuiʻí ko ha founga pē ia te ke lava ai ʻo tokoni ki he ngāue ʻa e Tamai Hēvaní. Ko e founga lelei taha ke tokoniʻi ai e niʻihi kehé ko hoʻo tā sīpingá!

Ngaahi tā fakatātā ʻa Vivian Mineker