“Ko e Fakafanongo ki he Laumālie Māʻoniʻoní,” Kaumeʻá, Mē 2024, 39.
Tohi ʻe Koe
Ko e Fakafanongo ki he Laumālie Māʻoniʻoní
ʻI ha ʻaho ʻe taha lolotonga e efiafi fakafāmili ʻi ʻapí, naʻe talanoa ʻeku faʻeé fekauʻaki mo e Laumālie Māʻoniʻoní. Naʻá ne pehē ʻoku faʻa lea ʻa e Laumālie Māʻoniʻoní ʻaki hono ʻoatu ha fakakaukau kiate koe.
ʻI heʻene lea ʻaki iá, naʻá ku fuʻu ʻohovale. Naʻá ku lotu kimuʻa ange mo kole ki heʻeku Tamai Hēvaní ke tokoni mai ke u fanongo ki he Laumālie Māʻoniʻoní. Ka naʻe ʻikai ke u ʻilo ʻe lava ke lea mai ʻa e Laumālie Māʻoniʻoní kiate au ʻi hoku ʻatamaí ʻo hangē ko iá. Naʻá ku maʻu ʻi heʻeku moʻuí kotoa ha ngaahi fakakaukau naʻá ne tataki au ke u fili ki he totonú. Kuó u ʻiloʻi ʻeni naʻe haʻu ʻa e ngaahi fakakaukau ko iá mei he Laumālie Māʻoniʻoní!
Talu mei ai mo ʻeku fakatokangaʻi lahi ange ʻa e Laumālie Māʻoniʻoní. ʻI he Sāpate kuo ʻosí, ne mau toe fakahoko ai ʻemau efiafi fakafāmili ʻi ʻapí. Ko e taimi ko ʻení naʻe fekauʻaki ia mo e ngaahi fakamoʻoní. Naʻe ʻikai ke u ʻiloʻi pe ko e hā ʻa e fakamoʻoni, ko ia ne u ʻeke ange ki heʻeku tamaí. Naʻá ne talamai ko e fakamoʻoní ko ha meʻa ia ʻokú ke ʻiloʻi pe tui ʻoku moʻoni. Naʻá ne pehē ʻoku tau maʻu ʻetau fakamoʻoní mei he Laumālie Māʻoniʻoní. Naʻá ku fakakaukau leva ki he founga ne u kamata fakatokangaʻi lahi ange ai ʻa e Laumālie Māʻoniʻoní, pea fakaʻohovale! Naʻe ʻi ai mo ʻeku fakamoʻoni!
ʻOku ou ongoʻi fiefia ange ʻi heʻeku ʻiloʻi ʻení. ʻOku ou fie hoko ko ha tokotaha muimui lelei ange ʻo Sīsū Kalaisi pea fakafanongo maʻu pē ki he Laumālie Māʻoniʻoní.
Ngaahi tā fakatātā ʻa Brenna Vaughan