“Angaʻofa he Taimi Kai Hoʻataá,” Kaumeʻá, Mē 2024, 36–37.
Angaʻofa he Taimi Kai Hoʻataá
ʻE fakakata ʻaki nai ia ʻe he tamaiki tangata kehé?
Naʻe hoko ʻa e talanoa ko ʻení ʻi he ʻOtu Filipainí.
Naʻe fanongo ʻa Teivi ki he tukituki ange ʻene faʻeé ʻi hono loki mohé. Kuo taimi ke ke ʻā. Naʻá ne tuʻu hake mei he mohengá ʻo tafitafi hono matá. Naʻá ne kau atu leva mo Mami, Teti, mo e toenga ʻo e fānaú ʻi he loki ʻi muʻá.
Naʻe pehē ange ʻa Mami, “Mālō ʻetau maʻu ki he pongipongí ni.” Naʻe malimali fiemohea ʻa Teivi. Naʻe tūʻulutui ʻa e fāmilí, pea fai ʻe Teti ha lotu ke kamata honau ʻahó.
Naʻe pehē ange ʻa Mami, “ʻOku ou fie vahevahe ha potufolofola maʻongoʻonga he pongipongí ni.” Naʻá ne fakaava hake e Tohi ʻa Molomoná. “Ko e Molonai 7:45 ʻeni. ‘Pea ʻoku kātaki fuoloa ʻa e manavaʻofá, pea ʻoku ʻofa ia.’”
Naʻe fakakaukau ʻa Teivi ki he folofolá ʻi heʻene teuteu ki he akó. Kimuʻa peá ne hū ki tuʻa he matapaá, naʻá ne fai ha lotu. Naʻá ne lotu ʻo pehē, “Kātaki ʻo tokoni mai ke u angaʻofa he ʻahó ni.”
Naʻe ongoʻi fiefia ʻa Teivi ʻi he kalasí ʻi heʻene fai ʻene ngāue fakaakó. Naʻá ne fakafanongo lelei ʻi hono ʻoange ʻe Faiako Filita ha ngaahi foʻi lea sipela foʻou ke ako.
Ne ʻikai fuoloa kuo taimi ʻa e kai hoaʻataá. Naʻe fakatau mai ʻe Teivi ha kumala melie mo ha inu mokomoko. Naʻá ne tangutu hifo mo hono ngaahi kaungāmeʻá ʻo kamata talanoa.
Naʻe ʻikai fuoloa kuó ne fanongo ki ha fānau ʻe niʻihi ʻi he tēpile hokó. Naʻe ʻi ai ha ongo tamaiki tangata naʻá na fakamataliliʻi ha kiʻi tamasiʻi foʻou ange ko Hōsea. Naʻe tupu siʻisiʻi ʻa Hōsea ʻi hono taʻu motuʻá, ka naʻá ne angalelei ki he niʻihi kehé mo ngāue mālohi ʻi he kalasí. Naʻe ʻi ai e kai hoaʻatā ʻa e tamaiki tangata kehé, ka naʻe hala ʻa Hōsea.
Naʻe fehuʻi ange ʻe ʻAnitoniō, “Ko e hā ʻokú ke fuʻu siʻisiʻi pehē aí? ʻOku ʻikai ke ʻi ai haʻo meʻakai ʻi ʻapi?”
Naʻe tafoki taimi siʻi atu ʻa Teivi ki he tamaiki tangatá ke sio kia Uakini ʻokú ne toʻo e kato ʻa Hōseá ʻo tolongi kia ʻAnitoniō. Naʻe tulimui atu ʻa Hōsea ʻia ʻAnitoniō ke fakafoki mai ʻene ʻū meʻá.
Naʻe pehē ange ʻe Hōsea, “Kātaki ʻo fakafoki mai ʻeku kató.”
Ka naʻe ʻikai fanongo ʻa ʻAnitoniō mo Uakini. Naʻe talaange ʻe Uakini, “ʻOku fuʻu motuʻa mo palakū hoʻo kató!”
Naʻe fanongo ʻa Teivi ki he ngaahi foʻi lea taʻeʻofa kotoa ko ʻení, ka naʻá ne manavasiʻi ke tokoni kia Hōsea. Ko e hā e fakakaukau ʻa e tamaiki kehé? ʻE fakakata ʻaki nai ia ʻe Uakini mo ʻAnitoniō?
Naʻá ne fakakaukau leva ki he potufolofola naʻe lau ʻe Mami he pongipongi ko iá. ʻOku angalelei ʻa e ʻofa faka-Kalaisí. ʻE fiemaʻu ʻe Sīsū Kalaisi ke ne angaʻofa. Ko e meʻa totonu ia ke faí.
Naʻe tuʻu hake ʻa Teivi ʻo hanga atu ki he tamaiki tangata kehé. “Tuku hono fakamataliliʻi ʻa Hōseá. Kātaki ʻo fakafoki ange ʻene kató.”
Naʻe fehuʻi ange ʻe Uakini, “Ko e hā hoʻo palopalemá?”
Naʻe pehē ange ʻe Teivi, “Ko e hā ʻokú ke anga taʻeʻofa pehē ai kia Hōseá? Naʻe ʻikai ke ne fai ha meʻa hala.” Naʻá ne kiʻi mānava lōloa leva. “ʻOku ʻofa ʻa Sīsū ʻiate kitautolu kotoa, pea ʻokú Ne finangalo ke tau angaʻofa. Kātaki ʻo tuku hono fakamataliliʻi ʻa Hōseá. ʻOku hala ʻa e fakamamahí. Kapau te ke hokohoko atu hono fai iá, te u ui mai ʻa Faiako Filita.”
Naʻe sio hifo ʻa ʻAnitoniō ki hono suú. Naʻá ne ʻoange kia Hōsea ʻene kató. Naʻá ne pehē leʻo siʻi ange, “Fakamolemole.” Naʻá ne foki atu mo Uakini ki hona nofoʻangá.
Naʻe pehē ange ʻe Hōsea, “Mālō.”
Naʻe tātaaʻi ʻe Teivi ʻa e uma ʻo Hōseá. “ʻOkú ta kaungāmeʻa ʻeni.”
Ne malimali ʻa Hōsea.
Naʻe talaange ʻe Teivi ki hono fāmilí ʻi ʻapi ʻa e meʻa naʻe hokó.
Naʻe talaange ʻe Teti, “Naʻe ʻikai ko ha meʻa faingofua ia, ka naʻá ke fai e meʻa totonú.”
Naʻe pehē ange ʻe Mami, “ʻOku ou laukau ʻaki koe ʻi hoʻo angaʻofá.”
ʻI he tokoni ʻa Mami he ʻaho hono hokó ke faʻo ʻene meʻakai hoʻataá, naʻe fehuʻi ange ʻe Teivi, “ʻE sai nai ke ta ngaohi ha sanuisi ʻe ua?”
“He ko e hā? ʻOkú ke fuʻu fiekaia?” Ko e fehuʻi atu ia ʻa Mamí.
Naʻe kata ʻa Teivi. “ʻIkai, ka naʻá ku fakatokangaʻi ʻaneafi naʻe ʻikai ha meʻakai ʻa Hōsea. ʻOku ou fie vahevahe ʻeku meʻakaí mo ia.”
“Ko ha fakakaukau lelei ia!” Naʻe toe ʻomi ʻe Mami ha mā pea ngaohi ʻe Teivi ha sanuisi ʻe taha.
ʻI he taimi kai hoaʻataá, naʻe tangutu ʻa Teivi mo Hōsea ʻo kai fakataha ʻena sanuisí. Naʻe fiemaʻu ha loto-toʻa ke taʻofi e toenga ʻo e fānau akó mei hono fakamamahiʻi ʻo Hōseá. Ka naʻe ʻofa ʻa Teivi ʻi hono kaungāmeʻa foʻoú, pea naʻá ne ʻiloʻi naʻe fiefia ʻa e Tamai Hēvaní ʻi heʻene fili ke angaʻofá.
Ngaahi tā fakatātā ʻa Mark Robison