“Ko e Lotu Loto ʻa e Kakai ʻo ʻAlamaá,” Kaumeʻá, Mē 2024, 26–27.
Ngaahi Talanoa mei he Folofolá
Ko e Lotu Loto ʻa e Kakai ʻo ʻAlamaá
Tā fakatātā ʻa Andrew Bosley
Ko ʻAlamaá ko ha palōfita naʻá ne akoʻi ʻa e kakaí. Naʻe papitaiso ʻa kinautolu naʻe tuí. Naʻa nau fai ha fuakava ke muimui ki he ʻOtuá.
Naʻe hoko ha tangata angakovi ko hono hingoá ko ʻAmulone, ko e pule ki he kakai ʻo ʻAlamaá. Naʻá ne taʻeʻofa ʻaupito kiate kinautolu. Naʻá ne ʻai ke nau fuesia ha ngaahi kavenga mafasia.
Naʻe lotu ʻa ʻAlamā mo hono kakaí ki ha tokoni. Ka naʻe fokotuʻu ʻe ʻAmulone ha lao ʻe tāmateʻi ai ha taha pē naʻe lotu.
Naʻe ʻikai toe lotu leʻolahi ʻa e kakaí. Ka naʻa nau kei lotu pē ʻi honau lotó mo e ʻatamaí. Naʻe tali ʻe he ʻOtuá ʻenau lotú!
Naʻe ʻafioʻi ʻe he ʻOtuá kuo nau fai ha fuakava mo Ia. Naʻá Ne palōmesi te Ne fakamālohia kinautolu. Naʻá Ne fakafiemālieʻi kinautolu pea fakamaʻamaʻa ʻenau ngaahi kavengá. Kimui ange aí, naʻe tokoniʻi kinautolu ʻe he ʻOtuá ke nau hao meia ʻAmulone ʻo fononga ki ha feituʻu malu.