“Toe Maʻa,” Kaumeʻá, Mē 2024, 18–19.
Toe Maʻa
Naʻe ʻikai ke u lava ʻo fili ki he totonú ke lava ha ʻaho! Ko e fakakaukau ia ʻa ʻEmelií.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe tuʻu ʻa ʻEmelī ʻi he loto vaí mo Teti pea malimali. Kuó ne tatali ki he ʻaho ko ʻení ʻi ha ngaahi uike lahi! Naʻe tā vave hono mafú he kuo teʻeki ke uku ʻi ha vai kimuʻa. Ka naʻá ne fuʻu fiefia ke papitaiso ʻo hangē ko Sīsū Kalaisí.
Naʻá ne kuikui ʻo fanongo ki he fai ʻe Teti ʻa e lotu papitaisó. Naʻá ne puke hono ihú, kuikui hono matá, pea peluki hono ongo tuí ʻi hono fakauku ia ʻe Teti ʻi he vaí.
Naʻe fokotuʻu vave hake ia ʻe Teti mei he vaí. Naʻe pau ke holoholoʻi ʻe ʻEmelī ʻa e vaí mei hono fofongá, ka naʻá ne malimali. Naʻá ne ongoʻi makehe ʻi he taimí ni. Na‘e fakafonu ia ʻe ha ongo‘i foʻou mo fakafiefia. Naʻá ne loto ke ongoʻi maʻu pē ia!
Naʻe fāʻofua ange ʻene Tetí kiate ia. Naʻe fakakaukau ʻa ʻEmelī, ʻoku ou ʻilo e founga ke tauhi ai e ongo lelei ko ʻení. Ko e meʻa pē ke u faí ko e fili ki he totonú pea hoko ʻo hangē ko Sīsū Kalaisí! Naʻá ne ongoʻi fakapapau te ne lava ʻo fai ia.
ʻI heʻenau aʻu ki ʻapí, naʻe lele atu ʻa ʻEmelī mei he kaá ki he matapā ʻi muʻá. Naʻe pehē pē mo hono kiʻi tuongaʻane taʻu fā ko Sioná. ʻI he aʻu atu pē ʻa ʻEmelī ki he matapaá mo kamata fakaava iá, naʻe pukeʻi ʻe Siona hono pivá ʻo fusiʻi ki mui—fusiʻi lahi.
“ʻOua!” Ko e kaila ia ʻa ʻEmelií. Naʻá ne fusiʻi mai hono pivá mei hono nimá. Naʻá ne taʻofi leva ia ke ʻoua naʻá ne tomuʻa hū ki loto. Naʻá ne ongoʻi ʻita ʻaupito!
Naʻá ne tuʻu fakafokifā. Na‘e fakafonu ia ʻe ha ongo‘i taʻeoli. Naʻá ne ʻunu ki he tafaʻakí kae tuku ke lele ʻa Siona ki loto.
Naʻá ne ui atu ki ai, “fakamolemole!” Kuó ne fai ha fili hala. He ʻikai teitei kaikaila ʻa e Fakamoʻuí kia Siona. Naʻe anga fēfē ʻene fehalaaki levá? Naʻe mole ʻene ongoʻi fiefia foʻoú.
Naʻá ne fakakaukau, kuó u maumauʻi ia. ʻOku ʻikai ke u lava ʻo fili ki he totonú ke lava ha ʻaho ʻe taha!
Ko e ʻaho hono hokó ko e ʻaho Sāpate. ʻI he teuteu ʻa ʻEmelī ki he lotú, naʻá ne fakakaukau ki he founga naʻá ne kaikaila ai kia Sioná. Naʻá ne kei ongoʻi taʻeoliʻia pē.
Lolotonga e houalotu sākalamēnití, naʻe kole ʻe he pīsopé kia ʻEmelī ke haʻu ki muʻa. Naʻe hilifakinima ia. Ko hono ʻuhingá, te ne maʻu ʻa e meʻafoaki ʻo e Laumālie Māʻoniʻoní. Naʻá ne nofo hifo ʻi hono seá. Naʻe hili māmālie ʻe Teti hono ongo nimá ki hono ʻulú.
Naʻe kuikui ʻe ʻEmelī hono matá ʻi he kamata lea ʻa Tetí. Naʻá ne fanongo ki heʻene lea ʻaki e lea, “Maʻu ʻa e Laumālie Māʻoniʻoní.”
Naʻe kei fakafanongo pē ʻa ʻEmelī.
Naʻe pehē ange ʻe Teti, “ʻEmelī, manatuʻi maʻu pē koeʻuhí ko Sīsū Kalaisi, te ke lava ʻo fakatomala ʻi he taimi ʻokú ke fai ai ha fili ʻoku halá. Ko e taimi kotoa pē ʻokú ke maʻu ai ʻa e sākalamēnití, te ke lava ʻo fakakaukau ki he fuakava naʻá ke fai ʻi hoʻo papitaisó. Te ke lava ʻo toe palōmesi ke muimui kiate Ia.”
ʻI hono fakaʻosi ʻe Teti ʻa e tāpuakí, naʻe ongoʻi fiefia mo nonga ʻa ʻEmelī. Naʻá ne ʻiloʻi naʻe talaange ʻe he Laumālie Māʻoniʻoní ʻe lelei ʻa e meʻa kotoa pē. ʻOku LELEI pē kapau ʻoku ʻikai ke ne haohaoa. Koeʻuhí ko Sīsū Kalaisi mo ʻEne Fakaleleí, ʻe lava ke fakatomala pea fakamolemoleʻi ai ia! Naʻá ne fakameʻapangoʻia ʻi heʻene kaikaila kia Sioná, pea naʻe ʻafioʻi ʻe he Tamai Hēvaní te ne kei feinga pē.
Naʻe malimali ʻa ʻEmelī ʻi heʻena foki atu mo Teti ki hona nofoʻangá. Naʻe hoko mai ʻa e sākalamēnití, pea naʻe hanganaki fiefia atu ʻa ʻEmelī ki ai.
Tā fakatātā ʻa Audrey Day