“Feʻiloaki mo ʻEletā Petuliki Kīloni,” Ko e Kaumeʻá, Mē 2024, 7.
Uiuiʻi ʻo e ʻAposetolo Foʻoú
Feʻiloaki mo ʻEletā Petuliki Kīloni
Toʻo mei he Trent Toone, “The ‘beautiful’ and ‘stretching’ life experiences that prepared Elder Kearon to be an Apostle,” Church News, 23 Sanuali 2024.
Ko ʻEletā Petuliki Kīloní ʻa e mēmipa fakamuimui taha ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻe fāʻeleʻi mo ohi hake ia ʻi ʻIngilani. Naʻá ne nofo foki mo hono fāmilí ʻi Sauti ʻAlepea lolotonga ia e ngāue ai ʻene tamaí. Naʻe uiuiʻi ia ko ha ʻAposetolo ʻi he ʻaho 7 ʻo Tīsema 2023.
ʻI he kei hoko ʻa ʻEletā Kīloni ko e tokotaha lahi kei talavoú, naʻá ne fetaulaki mo ha kau faifekau ʻi Lonitoni mei Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ka naʻe ʻikai ke ne fie ʻilo ki heʻena pōpoakí. Kimui angé, ʻi hono kamata akoʻi ia ʻe he ongo faifekaú fekauʻaki mo e ongoongoleleí pea naʻá ne ongoʻi ai ʻa e Laumālie Māʻoniʻoní. Lolotonga e ako lahi ange ʻa ʻEletā Kīloni ki he Siasí, naʻá ne maʻu ha tāpuaki ʻo e lakanga fakataulaʻeiki. Naʻá ne pehē ko ha aʻusia fakaʻofoʻofa naʻá ne tokoniʻi ai ia ke fili ke kau ki he Siasí. Naʻá ne papitaiso ʻi he Efiafi kimuʻa he Kilisimasí ʻi hono taʻu 26.
ʻOku ʻi ai ha fānau ʻe toko fā ʻa ʻEletā Kīloni mo hono uaifi ko Senifaá. Naʻe siʻi mālōlō ʻena ʻuluaki tamá ʻoku kei valevale. Ko ha taimi fakamamahi moʻoni ia kia ʻEletā mo Sisitā Kīloni. Ka naʻe tokoni ia ke fakamālohia ʻenau tui ki he toetuʻú mo e ongoongolelei ʻo Sīsū Kalaisí. Naʻe ui ʻa ʻEletā Kīloni ko ha Fitungofulu Taki Māʻolunga ʻi he taʻu 2010. ʻOkú ne saiʻia ke mamata ki hono tokoniʻi ʻe he kāingalotu ʻo e Siasí ʻa e kakai faingataʻaʻia ʻi he funga ʻo e māmaní.
ʻOku houngaʻia ʻa ʻEletā Kīloni ʻi he palani ʻo e fakamoʻuí. ʻOkú ne ʻiloʻi naʻa mo e ngaahi taimi faingataʻá te tau lava maʻu pē ʻo ongoʻi ʻa e ʻofa ʻa e Tamai Hēvaní mo e Fakamoʻuí.