Përshëndetje nga Nikaragua!

Mëso rreth fëmijëve të Atit Qiellor kudo nëpër botë.

Nikaragua është një vend në Amerikën Qendrore. Pothuajse 7 milionë njerëz jetojnë atje.

Gjuha

Gjuha zyrtare është spanjishtja. Disa njerëz gjithashtu flasin gjuhë amtare si miskitoisht, sumoisht dhe ramaisht.

¿Nahki sma?

Kjo do të thotë “Si je?” në miskitoisht.

Shpërndarja e Ungjillit

Misionarët e parë shkuan në Nikaragua në vitin 1953. Tani ka më shumë se 100 000 anëtarë të Kishës atje. Ka madje një tempull në ndërtim e sipër.

Peshkaqenët e Liqenit Nikaragua

Peshkaqenët e Nikaraguës mund të jetojnë në ujëra me kripë dhe ujëra të ëmbla. Kjo do të thotë që ata mund të jetojnë në oqeane, lumenj dhe liqene. Ata notojnë nga Oqeani Atlantik nëpër një lumë të gjatë që të jetojnë në liqenin Nikaragua.

Palo de Majo

Njerëzit në Nikaragua zhvillojnë një festival të madh të quajtur Palo de Majo kur fillon stina e shirave. Ata zbukurojnë një pemë ose një shtyllë me fjongo plot ngjyra që të vallëzojnë përreth saj dhe të argëtohen gjatë gjithë muajit.

Veprimtaria

Çuisi

Çuisi është një lojë që e luajnë fëmijët në Nikaragua. Për ta luajtur këtë lojë, të duhen mashurka jeshile (ose shkopinj) dhe një vrimë në tokë (ose një gotë). Jepi secilit lojtar pesë mashurka jeshile. Lojtari i parë i hedh mashurkat jeshile një e nga një në gropë. Nëse nuk e fut njërën prej tyre, ai lojtar ndalon dhe luan një lojtar tjetër. Fiton lojtari i parë që i fut që të pesta mashurkat në gropë.

Receta

Gallopinto

Në Nikaragua, shumë njerëz e hanë çdo ditë këtë pjatë me oriz e fasule. Ja ku është një variant që mund ta provosh!

1. Nxehi 2 lugë gjelle vaj dhe gjysmë qepë të verdhë, të prerë në copa të vogla. Përzieje për 5 minuta.

2. Shto 1 gotë e gjysmë oriz të bardhë dhe përzieje për 2 deri në 3 minuta.

3. Shto kripë dhe 3 gota ujë. Hiqi farat e një gjysmë speci jeshil dhe vendose atë mbi oriz.

4. Mbuloje me kapak dhe lëre të ziejë për 15 minuta derisa të largohet shumica e ujit.

5. Hiqe specin e gatuar dhe shto 2 gota fasule të kuqe ose të zeza të gatuara dhe një gjysmë luge çaji me pluhur hudhre. Gatuaje për 10 minuta.

Sigurohu që të marrësh ndihmë nga një i rritur.

Ilustrimet nga Dave Klüg